குஜராத்: கந்து வட்டிக்கு கடன் வாங்கி "கல்வித் தந்தையர்களிடம்%27 கொட்டிக் கொடுத்து விட்டு படிப்பை முடித்து விட்டு வெளியே வந்து படிப்புக்கேற்ற வேலை தேடுவதிலேயே ஆயுளில் பாதி போய்விடும். அப்படியே வேலை கிடைத்து விட்டாலும் சென்னை போன்ற பெருநகரங்களில் வாங்குகின்ற சம்பளத்தில் பாதியை வீட்டு வாடகைக்கு கொட்டிக் கொடுத்து விட்டு மாதக் கடைசியில் பல் துலக்க பயன்படும் பேஸ்ட் டியூபை, ரோடு ரோலர் விட்டு ஏற்றாத குறையாக பிதுக்க நேரிடும். ஆனால், இந்த கண்றாவிகள் ஏதுமின்றி ஒரு ஸ்குரூ டிரைவரும், சிறிய இரும்பு தடிக்கம்பியும் கொண்டு ஒரு திருடன் மாதம் 3.6 இலட்சம் ரூபா சம்பாதித்துள்ளான். அவனது வீரதீர பராக்கிரமங்களைக் கேட்டு பொலிஸாரே கதிகலங்கிப் போயுள்ளனர்.
குஜராத் மாநிலம், ஆமதாபாத் அருகே உள்ள எல்லீஸ் பிரிட்ஜ் பொலிஸ் நிலைய பொலிஸார் இர்பான் சாயிக் (35 வயது) என்ற திருடனை அண்மையில் கைது செய்தனர். அவனிடமிருந்து 25 இலட்சம் ரூபா மதிப்புள்ள நகை, பணம் உள்ளிட்டவை பறிமுதல் செய்யப்பட்டன. இது அவன் கடந்த ஏழு மாதங்களில் கொள்ளையடித்த பொருட்களின் மதிப்பு. அதன்படி அவனது சராசரி மாத வருமானம் 3.6 இலட்சம் ரூபா.
இர்பான் சாயிக்கை கைது செய்ததன் மூலம் யாரின் கைங்கரியம் என்று தெரியாமலேயே இருந்து வந்த பல வழக்குகளுக்கு உயிர் கிடைத்துள்ளது. இர்பான் மீது எல்லீஸ் பிரிட்ஜ் பொலிஸ் நிலையத்தில் மட்டும் ஏழு வழக்குகள் பதிவு செய்யப்பட்டுள்ளன. இதைத் தவிர காலுபூர்,
சாகர்கோடா, கேக்வார்ட், ஹாவேலி, தனிலிம்டா உள்ளிட்ட பொலிஸ் நிலையங்களில் 20 இற்கும் மேற்பட்ட வழக்குகள் உள்ளன. அண்மையில் ஒரு டாக்டர் வீட்டில் தனது கைவரிசையை காட்ட முயன்ற போது தான் பிடிபட்டான். ஒரு பிளாட்டில் இரண்டாவது மாடியில் இருந்த அந்த டாக்டர் வீட்டில் நுழைந்து சாவகாசமாக கிடைத்ததை எல்லாம் சுருட்டிக் கொண்டு படி வழியாக இறங்கினால் மாட்டிக் கொள்வோம் என்று ஜன்னல் வழியாக சேலையை கட்டி இறங்கும் போது அவனது போதாத நேரம் பக்கத்து வீட்டுக்காரர்கள் பார்த்து விட்டனர். அவ்வளவு தான் பொலிஸ் வருவதற்குள் பொதுமக்களே பிடித்து "தர்ம அடி%27 கொடுத்து பொலிஸாரிடம் ஒப்படைத்தனர்.
திருடுவதில் இவனது ஸ்டைலே தனி. வன்முறை இரத்தம் இதெல்லாம் பிடிக்காத அஹிம்சா வழித் திருடன் இவன். அவனிடம் ஒரு ஸ்கூட்டர் உண்டு. தவிர அதன் பக்கத்துப்பெட்டியில் ஒரு ஸ்குரூ டிரைவரும், ஒரு சிறியளவிலான கடப்பாரை இருக்கும். இவை தான் அவன் ஆயுதம். பகல் 12 மணியில் இருந்து 4.30 மணி வரை ஏதாவது ஒரு ஏரியாவை தேர்ந்தெடுத்து அங்கு தன் ஸ்கூட்டரில் வலம் வந்தபடி நோட்டம் விடுவான். தொடர்ந்து சில நாட்களாகப் பூட்டியிருக்கும் வீட்டை தேர்ந்தெடுத்து ஒரு சுபயோக சுபதினத்தில் தனது கைவரிசையை காட்டி விடுவான். இது தவிர திருவிழா நாட்களில் பெண்கள் கூட்டங்களில் புகுந்து நைசாக அவர்களின் நகைகளை அறுப்பதும் அவனுக்கு கைவந்த கலை. தினசரி அலுவலகத்திற்குப் போவது போல இல்லாமல் சாவகாசமாக ஓய்வெடுத்துக் கொண்டு தான் திருட்டு செயல்களில் ஈடுபடுவான். அண்மையில் 45 நாட்களில் இரண்டு வீடுகளில் மட்டுமே அவன் கொள்ளையடித்துள்ளான். ஒரு வீட்டில் 15 இலட்ச ரூபா மதிப்புள்ள நகை, பணத்தையும், ஒரு வீட்டில் 7.7 இலட்ச ரூபா மதிப்புள்ள பொருட்களையும் கொள்ளையடித்திருக்கின்றான். பொலிஸார் தங்கள் "முறைப்படி%27 விசாரித்து பதுக்கியுள்ள பணம், நகை உள்ளிட்ட பொருட்களை மீட்டு வருகின்றனர்.
தினமலர்