டிரிபோலி : லிபியா தலைநகர் டிரிபோலியின் பெரும்பான்மைப் பகுதிகள் எதிர்ப்பாளர்கள் வசம் வந்து விட்ட நிலையில், வெளிநாட்டுப் பத்திரிகையாளர்கள் தங்க வைக்கப்பட்டுள்ள ரிக்சாஸ் ஓட்டலுக்கு வெளியிலும், கடாபியின் குடியிருப்பான பாப் அல் அஜீசியா வளாகத்திலும் நேற்று கடாபி ராணுவம் மற்றும் எதிர்ப்பாளர்களுக்கு இடையில் கடும் சண்டை நடந்தது. இந்நிலையில், எதிர்ப்பாளர்களால் கைது செய்யப்பட்டதாகக் கூறப்பட்ட கடாபியின் மகன் சயீப் அல் இஸ்லாம், நேற்று தனது ஆதரவாளர்களிடையே தோன்றி பரபரப்பைக் கிளப்பினார்.

டிரிபோலியின் பெரும்பான்மையான பகுதிகளை தாங்கள் வசப்படுத்திவிட்டதாகவும், கடாபியின் மகன்கள் சயீப் அல் இஸ்லாம், அல் சாடி மற்றும் முகமது ஆகிய மூவரைக் கைது செய்துள்ளதாகவும் எதிர்ப்பாளர்கள் தெரிவித்தனர். சயீப் அல் இஸ்லாம் கைது செய்யப்பட்டதை, நெதர்லாந்தின் ஹாக் நகரில் இயங்கி வரும் சர்வதேச கிரிமினல் கோர்ட்டும் உறுதி செய்ததாக தகவல்கள் வெளியாயின. ஆனால் நேற்று அதிகாலையில், டிரிபோலியின் ஒரு பகுதியில் உள்ள ரிக்சாஸ் ஓட்டலின் வெளியில், சயீப் அல் இஸ்லாம் தனது ஆதரவாளர்கள் மத்தியில் தோன்றினார். பின்னர் அந்த ஓட்டலில் லிபிய அரசால் தங்க வைக்கப்பட்டுள்ள வெளிநாட்டுப் பத்திரிகையாளர்களிடம் பேசினார். அவர்களை அழைத்துக் கொண்டு, பாப் அல் அஜீசியா வளாகத்தைச் சுற்றிக் காண்பித்தார். பின்னர் பேசிய அவர்,"எதிர்ப்பாளர்களின் முதுகெலும்புகளை முறிப்போம். டிரிபோலி இன்னும் அரசின் கட்டுப்பாட்டில் தான் உள்ளது' என்றார். கைது செய்யப்பட்டதாகக் கூறப்பட்ட அவர் தப்பித்து வெளியேறிய சம்பவம், கடாபி ராணுவம் மத்தியில் பெரும் உற்சாகத்தை அளித்தது. இதனால், ரிக்சாஸ் ஓட்டலின் வெளிப்புறம் மற்றும் பாப் அல் அஜீசியா வளாகம் ஆகிய இரு இடங்களில், எதிர்ப்பாளர்கள் மீது கடாபி ராணுவம் கடும் தாக்குதல் தொடுத்தது. சில கி.மீ., தூரத்தில் உள்ள கிரீன் சதுக்கத்தில் திரண்டிருந்த எதிர்ப்பாளர்கள் மீது அஜீசியா வளாகத்தில் இருந்து ராணுவம் சிறு ரக ஏவுகணைகளை வீசித் தாக்கியது. இதையடுத்து, டிரிபோலியில் மீண்டும் இருதரப்பிலான போர் துவங்கியது.

இதற்கிடையில், கடாபி இருக்கும் இடத்தைக் கண்டறிவதற்காக, "நேட்டோ' தனது உளவு விமானங்களை ஈடுபடுத்தியுள்ளது. லிபியாவில் நிலவரம் இயல்புக்குத் திரும்பும் வரை தனது ஆதரவு தொடரும் எனவும் தெரிவித்துள்ளது. அமெரிக்க ராணுவ மையம் "பென்டகன்', கடாபி இன்னும் டிரிபோலியில் தான் உள்ளார் எனக் கூறியுள்ளது. சயீப் அல் இஸ்லாம் கைது செய்யப்பட்டதாக தங்களுக்கு தகவல் எதுவும் கிடைக்கவில்லை என, சர்வதேச கிரிமினல் கோர்ட் தெரிவித்துள்ளது. லிபியாவின் தேசிய இடைக்கால கவுன்சில் தலைவர் முஸ்தபா முகமது ஜலீல் நேற்று முன்தினம் எதிர்ப்பாளர்கள் டிரிபோலியைக் கைப்பற்றிய உடன் அளித்த பேட்டியில், கடாபியின் ஆட்சி முடிந்து விட்டதாகத் தெரிவித்தார். ஆனால், டிரிபோலியில் தொடர்ந்து நடந்து வரும் சண்டை, எதிர்ப்பாளர்களின் வெற்றியைக் கேள்விக் குறியாக்கியுள்ளது.