குளிக்கப் போய் சேற்றைப் பூசிக் கொள்வது..

by **அ.இராமநாதன்** Tue Oct 11, 2011 10:04 am

-

கங்கை நதியின் தீரத்தில் பல கோவில் தலங்களில்
ஆனந்தமாகக் குளித்திருக்கிறேன். கங்கையில்
குளித்தால் பாவம் போகுமா என்பது ஒவ்வொரு
மனிதனுடைய தனிப்பட்ட அபிப்ராயம்.

ஆனால் பாவம் போக வழி இருக்கிறது. கங்கையினுடைய
பிரம்மாண்டம், வேகம் பார்க்கிற போது இடையறாது,
இடையறாது வெகு காலத்திற்கு முன்னமிருந்தே ஓடிக்
கொண்டிருக்கிற நதியை கவனிக்கின்ற போது,
மனித வாழ்வைப் பற்றிய சிந்தனையும், காலம் பற்றி
விரிவும் உண்டாகின்றன.

இவ்வளவு பெரிய நதிக்கு முன்னால் தான் தூசு. பெரிய
பெரிய மகான்கள் குளித்து, அவதாரங்கள் குளித்து
கரையேறிய இந்த நதியின் தொன்மைக்கு முன்னால்
தான் ஒன்றுமே இல்லை. தன் வயதில் ஒரு அர்த்தமே
இல்லை என்று தெரிய வர தன் நிலையாமை புரியும்.

தன் நிலையாமை புரிய, தன்னுடைய இருப்பு மிக
சாதாரண விஷயம் என்று தெரிய, கர்வம் கரைந்து போகும்.
கர்வம் கரைய, தான் என்ற அகங்காரம் கரைய உள்ளுக்குள்
இருந்தே தான் யார் என்ற கேள்வியும், அதற்குண்டான
சத்தியமான பதிலும் பிடிபடும். இதுவே பாவம் கரைதல்.

ஒரு பிரம்மாண்டத்தின் முன் நிற்கும் போது ஏற்படுகின்ற
உணர்வு உண்மையை உங்களுக்கு அருகே கொண்டு வந்து
கொடுக்கும்.

இதுதான் கைலாசம் போவதற்கும், கோவில்கள் போவதற்கும்,
தகதகத்து எரிகின்ற அக்னி முன்பு அமர்வதற்கும் காரணம்.

கடலின் பிரம்மாண்டம் கூட இதை கொடுத்துவிடும். தான்
ஒன்றுமே இல்லை என்பதை நன்கு உறுதிபடுத்திக் கொள்ள
முன்னோர்கள் தனிமையில் பயணம் செய்தார்கள்.

பயணங்கள் உங்களை உங்களுக்கு காட்டும். தன்னை அறிவதே
பாவம் போக்கும் வழி. ஆனால் கங்கையில் குளிப்பதற்கும்
கும்பலாக போய், கூச்சலாக இறங்கி, குழப்பமாக குளித்து
சிறு சிறு சண்டைகளோடும், மனஸ்தாபங்களோடும் வெளியே
வர காரியம் கெட்டுப் போகிறது.

சில சமயம் பாவமும் சேர்ந்து விடுகிறது.குளிக்கப் போய்
சேற்றைப் பூசிக் கொள்வது என்பது இது தான்.
-
======================================
>பாலகுமாரன்

by **கவியருவி ம. ரமேஷ்** Tue Oct 11, 2011 10:17 am

சில சமயம் பாவமும் சேர்ந்து விடுகிறது.குளிக்கப் போய்
சேற்றைப் பூசிக் கொள்வது என்பது இது தான்.
-
- இது மற்றொரு வகையில் உண்மைதான்.

நான் என் நண்பர்களுடன் என் கிராமத்தில் சிறு வயதில் மட்டும் அல்ல வாய்ப்பு கிடைக்கும் இப்போதும் குளத்தில் குளிக்கும் போது பாம்பு புற்று மண்ணை எடுத்து சோப்புக்குப் பதிலாக உடம்பெல்லாம் பூசி தேய்த்து குளிப்போம். (சென்ற சனிக்கிழமை கோவிலுக்குப் போய் வந்ததும் இப்படித்தான் குளித்தோம். சற்றேறக் குறைய 15 பேர்)

(வீட்டில் குளித்தால் சோப்புதான் போட்டுக்குவேன்.)

உங்களுக்கு யாருக்கேனும் இந்த அனுபவம் உண்டா?