பசிக்குக் கொஞ்சம் மண்ணேனுமிடு - வித்யாசாகர்!!

பசிக்குக் கொஞ்சம் மண்ணேனுமிடு.....

1
ஒவ்வொரு பருக்கைச் சோற்றிலும்
ஒருவரின் பசி அடைக்கப் பட்டிருப்பதை
அறியாமலே குப்பையில்
கொட்டப் படுகிறது தினமும்

பழைய சாதம்!!
--------------------------------------------------------------------

2
மணக்க மணக்க
உண்டுமுடிக்கும் முன்
ஒரு கை சோறு ஒதுக்கி
பிறருக்கும் தர இயலுமெனில்
ஒரு உயிரேனும்
உயிர் பிழைக்கும்!!
--------------------------------------------------------------------

3
டீ குடித்து
பண் தின்று வாழ்பவர்களுக்கு
சாபம் பணத்திலா
உழைப்பிலா
பதிலேயில்லை பல காலமாய்..
--------------------------------------------------------------------

4
காக்கை குருவி கூட
எதையோ தின்று விடுகிறது
மனிதன் எதையோ தின்பதிலும்
தின்னாமையிலும் -
இறக்கிறான் இறக்கிறான் இறக்கிறான்
பசி மட்டுமே
பெரிதாகப் பேசப்படுகிறது..
--------------------------------------------------------------------

5
உப்பு
காரம்
புளிப்பு
சுவையெல்லாம் வேண்டாம்
ஒரு உண்டை சோறிடு
மண்ணேனுமிடு -
உயிர்' பசியால் போதல் தீது..
--------------------------------------------------------------------

6
மரம் நட்டான்
மலை குடைந்தான்
வானம் பொறாமைப் பட
வீடும் கோவிலும் கட்டினான்
விமானம் செய்தான்
வான் வழியே மேகம் கிழித்து
விண்முட்டி நின்றான்;
இத்தனை -
உயரச் சென்ற மனிதன்

திரும்பிப் பார்க்காதலில் -
கீழே விழுந்துகிடக்கிறது சில பிணங்கள் -
பசியால் இன்றும்!!
--------------------------------------------------------------------

7
சட்டைப் பை
சூட்கேஸ்

வீட்டு அலமாரி
வங்கி கணக்கு
வேறு எங்கெல்லாம்
சேமித்து வைத்திருப்பீர்களோ' பணத்தை
அங்கெல்லாம் -
நன்றாக சற்றுக் கிளறிப் பாருங்கள் -

ஒரு எளியவன்
திருட எண்ணிய கணமும்
திருடவைத்த பசியும்,

அவன் உழைக்க மறுத்த கணமும்
உழைக்கக் கிடைக்காச் சூழலும்
அங்கே மரணமாய் முனுமுனுத்துக் கிடக்கலாம்..
--------------------------------------------------------------------

8
வீரம்

வீம்பு
வியாக்யானம்,
மானம்
மரியாதை
மனசாட்சி,
அண்ணன்தம்பி
அக்காத் தங்கை
அம்மாப் பிள்ளை'
அத்தனையையும் மறக்கடிக்கும் பசியென்று
பசியில் மட்டுமேப் புரியும்...
--------------------------------------------------------------------

9
முடிந்தால்
இரண்டோ மூன்றோ நாள்
பட்டினியிருந்து பாருங்கள்
பசியில் இறப்பவரின் வலியை
ஒரு முறையேனும் -
உண்டுத் தீருங்கள்..

மறுநாள் கிடைக்கும் உணவில்
பசிக்கும் எவரோ ஒருவரின் முகம்

கனவு போலேனும் தெரியும்; காணுங்கள்!!
--------------------------------------------------------------------

10
குப்பைத் தொட்டி
திருமண மாளிகையின் வாசல்
அல்லது பின்புறம்,
விழாநாளில் மிச்சப்படும் உபரி,
உணவகங்களில் -
நிறைய ஆர்டர் செய்துவிட்டு
பாதியில் எழுந்துப் போகும் நாகரிகம்'

எப்படியறியும் - எங்கோ ஓருயிர்
பசியால் செத்து நம்மை
கொலைக் காரனாக்குவதை..
--------------------------------------------------------------------
வித்யாசாகர்

குறிப்பு: இக்கவிதைகளனைத்தும்
சோமாலியாவில் பசியினால் பாதிக்கப் பட்டுள்ள முப்பது சதவிகித
குழந்தைகளுக்குச் சமர்ப்பணம். சமர்ப்பணம் மட்டுமல்ல, சிறுதொகையும் உணவுச்
செலவிற்கென அனுப்பி வைக்கப் பட்டுள்ளது. நீங்களும் உரியோரை தொடர்பு கொண்டு
முடிந்தால் உதவுங்களேன்.. பாவம் நிறையக் குழந்தைகள் அங்கே பசியால் இருக்கிறதாம்..

by **நிலாமதி** Thu Oct 27, 2011 9:24 pm

பாவம் நிறையக் குழந்தைகள் அங்கே பசியால் இறக்கிறதாம் ..

by **vinitha** Thu Oct 27, 2011 9:37 pm

by mravi Thu Oct 27, 2011 10:03 pm

அக்கினி குஞ்சோன்று கண்டேன் என பாரதி முழக்கம்போலே பசி எனும் அரக்கனின் கொடுமைகண்டு பரிதவிக்கும் உள்ளங்களுக்கான உள்ளுணர்வை
கவித்தாய் வடித்திருக்கிறார்.....அற்புதமான கவிதை.
உங்களின் கோரிக்கை ஏற்க்கப்பட்டது. யுஜின் தோழரே!

நன்றி நண்பரே ரவி

by **தங்கை கலை** Thu Oct 27, 2011 10:06 pm

mravi wrote:அக்கினி குஞ்சோன்று கண்டேன் என பாரதி முழக்கம்போலே பசி எனும் அரக்கனின் கொடுமைகண்டு பரிதவிக்கும் உள்ளங்களுக்கான உள்ளுணர்வை
கவித்தாய் வடித்திருக்கிறார்.....அற்புதமான கவிதை.
உங்களின் கோரிக்கை ஏற்க்கப்பட்டது. யுஜின் தோழரே!

by **thaliranna** Fri Nov 04, 2011 8:55 pm

பசிக்குக் கொஞ்சம் மண்ணேனுமிடு - வித்யாசாகர்!! 548321

பசிக்குக் கொஞ்சம் மண்ணேனுமிடு - வித்யாசாகர்!! 446419

by **கவியருவி ம. ரமேஷ்** Thu Jan 12, 2012 12:19 pm

ஒவ்வொரு பருக்கைச் சோற்றிலும்
ஒருவரின் பசி அடைக்கப் பட்டிருப்பதை
அறியாமலே குப்பையில்
கொட்டப் படுகிறது தினமும்

பழைய சாதம்!!
- வருத்தம்தான்... பசிக்குக் கொஞ்சம் மண்ணேனுமிடு - வித்யாசாகர்!! 2077966078