என் தாய்! ( உயிர் தந்த உறவை என் உயிர் நேசிப்பதால் உதயமான கவிதை!)

by **bparthasarathi** Wed Dec 15, 2010 11:54 am

என் தாய்!

எந்தையிடம் தாவென்று
எனைக் கேட்டு பெற்றவள்;
யாரவள்?
என் தாய்!

என் தாயே!

கருவான நாள் முதலாய்
கவனித்தாய்;
எனை
கண்ணும் கருத்தாய்!

கருவிலே நான் வளர
உன்னுணவை எனக்கும்
தாமாகவே
பகிர்ந்தளித்தாய்!

ஈரைந்து திங்களாய்
இடுப்பு நோவுடன் எனை சுமந்து
மீளாத வலி தாங்கி
மீண்டு வந்து ஈன்றெடுத்தாய்!

கண் விழித்ததும் கண்டு
எனைக் கனிவுடனே கண்ணோக்கி
வாஞ்சையோடு
வாரியணைத்தாய்!

அனுதினமும் அன்போடு
எனை
உன் நெஞ்சணைத்து
அமுதளித்தாய்!

பஞ்சணையி லல்ல; உன்
நெஞ்சணையில் தூங்க வைத்தாய்!
உறவுகளை அறிவித்து எனக்கு
உலகையும் கற்பித்தாய்!

என் மழலை மொழி கேட்டு
உன் துன்பம் தொலைத்திருந்தாய்!
எழுந்து நான் நிற்கையிலே
என் மகனென்று மகிழ்ந்திருந்தாய்!

நோயோ எனை வருத்த
கண் விழித்து பசித்திருந்தாய்!
படைத்தவனை கடிந்து நீயும்
பத்திய உணவு புசித்திருந்தாய்!

என் பசியை நான் மறக்க
உன் பசியை நீ மறந்தாய்!
பாலகனாம் எனை நினைத்து
பகல் கனவு கண்டிருந்தாய்!

அதிகாலை துயிலெழுப்பி
அடுத்த நாளை அறிவித்தாய்!
சிறு வெற்றியை மிகப்பெரிதாய்
சிறப்பு செய்து நீ மகிழ்ந்தாய்!

வேலைக்கு எனை அனுப்ப
வேண்டாமென்று
நீ மறுத்தாய்.
நீ மறத்தாய்!

கை வளையல் தான் வைத்து
கல்லூரிக் கனுப்பி வைத்தாய்!
பொன்னகையை தான் மறந்து
புன்னகையை நீ அணிந்தாய்!

உன்
உதிரத்தை உயிராக்கி
எனக்கூட்டியதால்
உருக்குலைந்தாய்!

நீயோ கனிவின் ஊற்று.
உன் அன்பிற் குண்டோ மாற்று!
நீ பொறுமையின் பிறப்பிடம்.
சகிப்புத் தன்மையின் புகலிடம்!

உன் சேலைச் சோலை
காணக்கிடையா பூங்காவனம்.
சுமை தாங்கியாம் என் தாயே
நீ காணக் கிடைத்த என் தெய்வம்!

உன் உடல் காண் சுருக்கங்கள்
சுருக்கமல்ல தாயே!
நீ எனக்களித்த
ஆயுள் ரேகை!

என்ன தவம் செய்தேன்
என் தாயே!
என் தாயாய்
உனை அடைய!

இனியொரு சொர்க்கம்
தேவையில்லை;
உன் அருகாமை என்றும்
எனக்கிருக்கையிலே!

முழுமை பெற்று விட்டேன்
தாயே!
முழு மதியாய்
உன்னை பெற்றதால்!

'தமிழ் நேசன்'
பா.பார்த்தசாரதி,
[You must be registered and logged in to see this link.]

by **செய்தாலி** Wed Dec 15, 2010 12:00 pm

அம்மாவைப் பற்றிய உங்களின் மனதைதொடும் கவிவரிகள் மிகவும் அருமை நண்பா
வாழ்த்துக்கள் தொடருங்கள் உங்கள் கவிவரிகளை

by **bparthasarathi** Wed Dec 15, 2010 1:14 pm

தங்களின் பாராட்டுக்களுக்கு நன்றி!
தாயைப் போற்றுவோம்!

'தமிழ் நேசன்'
பா.பார்த்தசாரதி,

by **Rikaz (Amarkkalam)** Wed Dec 15, 2010 1:51 pm

bparthasarathi wrote:தங்களின் பாராட்டுக்களுக்கு நன்றி!
தாயைப் போற்றுவோம்!

'தமிழ் நேசன்'
பா.பார்த்தசாரதி,

by **manjubashini** Wed Dec 15, 2010 9:19 pm

எல்லா உயிர்களுக்கும் தாய் என்ற ஒரு உறவு அமைவது தெய்வமே அருகில் இருப்பதுக்கு சமமாகும்.... தெய்வத்தை தொழவில்லை என்றாலும் தாய் தந்தையரை தொழுதால் போதும்...... வாழ்வின் உன்னத நிலையை நாம் அடையலாம்...

தாயின் ஒவ்வொரு செயலையும் தாயின் கருணையையும் தாயின் அன்பையும் அழகாய் வரிவரியாக விளக்கி இருப்பதை கண்டு இறுமாந்துக்கொள்கிறேன்..ஹப்பா முதியோர் இல்லத்தில் இனி ஒரு தாயின் வரவு குறையும் என்று.....

தாயின் தன்னலமற்ற அன்பை முழுமையாய் உணர்ந்தவர் கண்டிப்பாக முதியோர் இல்லத்தில் விடமாட்டார்....

தாயின் ஆசி என்றும் உங்களுக்கு கிடைக்க என் அன்பு வாழ்த்துக்கள் பார்த்தசாரதி...