என் மனப்பெட்டகத்தில் நான் சட்டமிட்டு..!

by doctorvkk Mon Jan 27, 2014 10:59 am

தாயின் மடியில் குழந்தை
ஆனந்தமாய் அமர்ந்திருந்தது!
தாயோ குழந்தையின் மடியில்
தட்டித் தட்டி உற்சாகப்படுத்தினாள்!
குழந்தை சிரித்துச் சிரித்து மகிழ்ந்தது,
குழந்தையின் வயதோ இரண்டுதான்!

இருவரும் ஆனந்தத்தில் திளைத்தனர்,
யாவரும் அவ்வேடிக்கை விளையாட்டில்
குறுக்கிடாது விழி விரித்து மகிழ்ந்தனர்!
குழந்தையோ கொள்ளை அழகு - தாயோ
குழந்தையின் பூங்கன்னத்தில் மெத்தென
முத்தங்கள் பலப்பல பதித்தாள்!

பனி கோர்த்த அவர்கள் கண்களில்
மின்னலென ஒளி வெள்ளம் தகதகத்தது!
அவள் பெற்ற காதல் பரிசை அள்ளி
அரவணைத்துக் கொண்டாள் இறுக்கமாக!
அக்காட்சியினைப் படமாக்கி மனப்பெட்டகத்தில்
நான் சட்டமிட்டுப் பதிந்து கொண்டேன்!

இருவர் பார்வையிலும் ஆனந்தமய மாட்சி,
துறுதுறு கள்ளமிலாப் பார்வையே அங்கே ஆட்சி,
குறுக்கீடு செய்வாரிலர்! சொல் நீயே சாட்சி,
இருவர் அன்பும் எல்லையில்லா ஒரு நீட்சி,
இருவரின் அன்பிலும் கட்டற்ற நீர்வீழ்ச்சி,
காண அது ஓர் கண் கொள்ளாக் காட்சி!