இவன் பாட்டுதான் இவங்க எல்லோருக்கும் சோறு!

by **அ.இராமநாதன்** Tue Jul 29, 2014 7:21 am

-
இது கல்கி வாசகி தமிழ்செல்வி நிக்கோலஸின் அனுபவம்:
-
விஜய் டி.வி.யில் பார்வையில்லாமல், கழுத்து நிற்காமல் தலை ஆடிக் கொண்டே இருந்த செந்தில்நாதன் பாடிய பாட்டுக்குள் சூப்பர் சிங்கரில் தமிழக மக்களின் மனத்தில் நெகிழ்ச்சியை உருவாக்கிக் கொண்டிருக்கிறது. அவன் எல்லோரையும் போல் என்னையும் உருக்கி விட்டதால் அந்தச் சிறுவனை நேரில் பார்க்க திருச்சி கிளம்பிப் போனேன்.
-
லூப்ரா பிளைன்ட் ஹோம் - என்ற அவன் தங்கியிருந்த ஹோமுக்குப் போன போது அங்கே 171 பேர் இருந்தாங்க. சிறுவர்கள், முதியவர்கள், பிள்ளைகளால் விரட்டப்பட்ட அநாதைகள் எல்லோரும் அந்தச் சின்ன இடத்தில் கூடி இருந்தாங்க. அந்த ஹோமை நடத்தும் பார்வையற்ற தாமஸை சந்தித்தோம்.
-
செந்தில்நாதனைப் பார்க்க வந்தீங்களா? இப்போ நாங்க ஒழுங்கா மூணு வேளை சந்தோஷமா சாப்பிடுறதுக்குக் காரணம் அவன் பாட்டும், அவன் மூலம் கிடைக்கிற நன்கொடையும்தான். திருச்செந்தூர் கடலோரம் பன்னிரெண்டு வருஷத்துக்கு முன்னாடி பெற்றோர்களால் வீசியெறியப்பட்ட இந்தக் குழந்தையைத் தூக்கிட்டு வந்து வளர்த்தேன். எந்த வேலையும் தானா செய்ய முடியாது. தனியாக சொந்தமா ஒரு வரி கூட பேச மாட்டான். நாம என்ன சொல்றோமோ அதை அப்படியே சொல்வான். பாட்டும் அப்படித்தான். அவனை பார்வையற்ற என் மனைவிதான் பார்த்துக்கிறா. இந்த ஹோமை 27 வருஷமா நடத்துறேன். "ராஜ பார்வை'ன்ற பேரில் பார்வையற்றோர்களைக் கொண்டு இசை நிகழ்ச்சி நடத்தி, அதுல வர்ற வருமானத்துலதான் இந்த ஹோமை நடத்துறோம் என்றார்.
-
சிறிது நேரத்தில் ஒரு வயதான அம்மா செந்தில்நாதனை அழைத்து வந்தார். தமிழகத்து நெஞ்சங்களை உலுக்கிய அந்தச் சிறுவனைப் பக்கத்தில் உட்கார வைத்து எத்தனையோ கேள்விகள் கேட்டேன். ம்.... ம்... யோசித்து சுயமாக எதுவும் சொல்ல முடியாமல் அவன் கை காற்றைத் துழாவியபடி செல்போனையே தேடியது. அதில்தான் அவன் பட்டனை அழுத்தி பாட்டுக் கேட்பானாம். கொஞ்ச நேரத்துக்கு முன் அவனுக்கு லட்டு என்று சொல்லி ஊட்டி விட்டதால் அவன் வாய் லட்டு, லட்டு என்று முணுமுணுத்தபடியே இருந்தது. இவனுக்குள்ளிருந்து பாட்டுத் திறன் எப்படி வெளியே வந்தது என்று ஆச்சர்யமாயிருந்தது.
-
இப்படியான குழந்தைகளைப் படைத்த கடவுளை இரக்கமில்லாதவன் என்பதா? இதுபோன்ற ஜீவன்களைப் பார்த்துக் கொள்ளப் பாடுபடும் தாமஸ் போன்ற பார்வையற்றவர்களின் மனத்தில் பேரன்பை படைத்த இறைவனை கருணைமிக்கவன் என்பதா? நாங்கள் எங்களால் இயன்ற நிதி உதவியை அளித்துக் கிளம்பிய போது நம்மைக் குறையின்றிப் படைத்த இறைவனுக்கு நம்மையறியாமல் வாய் நன்றி சொன்னது.
-
==============================
- தமிழ்செல்வி நெக்கோலஸ்

நன்றி: கல்கி