என் ரசிகையின் கடிதம் (என் மனதை நெகிழ வைத்த ரசிகை)

by **கவிக்காதலன்** Mon Feb 07, 2011 4:21 pm

First topic message reminder :

வாழ்க்கையில் நாம் தினம் தினம் பல பல புதிய மனிதர்களை சந்தித்துக்கொண்டிருக்கிறோம். ஒவ்வொருவரும் ஏதோ ஒரு வகையில் நம் கவனத்தை ஈர்க்கின்றனர். ஆனால் மிக சிலரே நமக்குள் தன் சுவடை பதித்து செல்கின்றனர். ”என் மன வானில்” பகுதியில் இதற்கு முன் நான் ஒன்று குறிப்பிட்டிருந்தேன் எனக்கு இணையதளத்தில் சில மிக சிறந்த நண்பர்கள் இருக்கிறார்கள் என்று. ஆனால் நான் இப்போது சொல்ல வருவது அந்த நண்பர்களை பற்றி அல்ல. இது ஒரு ரசிகையை பற்றியது

ஒவ்வொரு படைப்பாளிக்கும் பாரட்டு என்பது அதிக உற்சாகத்தை தர கூடியது. நான் பிளாக்கில் கவிதை எழுத ஆரம்பித்த பிறகு எனக்கு சில பாரட்டுக்கள் கிடைத்ததுண்டு. சிலர் எனக்கு மெயில் செய்தும் பாரட்டியதுண்டு. சுமார் ஒரு 8 மாதங்களுக்கு முன்பு எனக்கு ஒரு மெயில் வந்தது. கொஞ்சம் கடிதம் வடிவிலும் மீதி கவிதை வடிவில் இருந்தது. அதை வாசித்த போது கற்பனை கொஞ்சம் அதிகமாகி இருப்பதாக தோன்றினாலும் முழுக்க முழுக்க ஆச்சரியமாகவே இருந்தது. அதற்கு முதல் காரணம் அதை அனுப்பியவ்ர் ஒரு பெண் :-) . தனக்கு தமிழில் டை செய்ய சரியாக தெரியாது என்றும், இந்த கவிதையை மூன்று நாட்களாக டைப் செய்தேன் என்றும் அவள் குறிப்பிட்டிருந்தது கூடுதல் ஆச்சரியம். நானும் நன்றி சொல்லி பதில் அனுப்பினேன். அதன் பிறகு நட்பாய் மாறிய அந்த பெண்ணிடம் இரண்டு மூன்று முறை தொலைப்பேசியிலும் பேசியிருக்கிறேன். இரண்டு வெவ்வேறு காரணங்களுக்காய் அவளிடம் அதிகம் பேசுவதை நான் தவிர்த்தேன். ஆனால் இப்போதும் அவள் இணையம் மூலம் தொடர்பிலே இருக்கிறாள்.

ஒரு ரசிகையின் கடிதம் என்று தலைப்பிட்டு எழுதப்பட்ட அந்த கவிதையை இப்போது வாசித்தாலும் ஆச்சரியமாக இருக்கிறது. நானும் பரவாயில்லாமல் கவிதை எழுதுகிறேனோ என்ற ஒரு நம்பிக்கையை தந்த மெயில் அது. அந்த கவிதையை நான் உங்களிடம் பகிர்ந்து கொள்ளலாம் என்று இருக்கிறேன். அவளின் அனுமதி பெற்றே இந்த கவிதையை போடுகிறேன். அவளின் வேண்டுகோளுக்கிணங்க அவள் பெயர் குறிப்பிடவில்லை. இது தான் அந்த கவிதை.

ஒரு ரசிகையின் கடிதம்
*************************************************************

அழகாயிருக்கலாம்-இல்லை
அசிங்கமாயிருக்கலாம்!
உன் முகம்......

இனிமையாயிருக்கலாம்-இல்லை
இம்சையாயிருக்கலாம்!
உன் குரல்......

உயரமாயிருக்கலாம்-இல்லை
குள்ளமாயிருக்கலாம்!
உன் உருவம்......

ரசிக்கவைக்கலாம்-இல்லை
ரணமாக்கலாம்!
உன் பேச்சு......

ரசிக்கும்படியாய்
சொல்லும்படியாய்
உன்னை பற்றி
எதுவும் தெரியாது எனக்கு......

உன்னை பற்றி
எதுவும் தெரியாமல்
உன் கவிதைகளை ரசித்து
சிலாகித்துப் போகிறேன் நான்....

வார்த்தைகள் உனக்கு-இப்படி
வளைந்து கொடுப்பதன் மாயமென்ன?
உன் எண்ணங்கள் எல்லாம்
கவிதையாவதன் காரணமென்ன?

அதிசயமாய் பார்க்கிறேன்
உன்னை நான்......

அன்பு கவிஞனுக்கு
இந்த ரசிகையின் ஒரு வேண்டுகோள்!

உன் பேனாவை
கவனமுடன் கையாளவும்!
உன் கவிதைகளை
வாசித்து வாசித்தே
உன் பேனாவும்
உன்னை காதலிக்ககூடும்......

::அனீஷுக்காக
::அன்புடன் (அவள் பெயர் குறிப்பிட பட்டிருந்தது).

இது தான் அந்த ரசிகை எனக்கு எழுதிய கவிதை(கடிதம்)