காலம் எட்டி உதைக்காத நாட்களில்லை
விரலிடுக்கில் சொடுக்கினாற் போல் வருகிறது
வலிகளும்.. துக்கங்களும்!
சொல்லத் துணியா வார்த்தைகளுக்கிடையில்
மறுக்கவும் மறக்கவும் முடிந்திடாத - ஏக்கங்களுக்கு நடுவே
சிரிக்கத் துணிந்த வாழ்க்கையில் தான் -
சொல்லி மீளாப் போராட்டாங்கள் எத்தனை...எத்தனை(?)
நான் தான் மனிதனாயிற்றே என.... நெஞ்சு
நிமிர்த்திய போதேல்லாம் - கர்வம் தலையில் தட்டி
மார்பு உடைத்த நாட்கள் எண்ணிலடங்காதவை;
விட்டுக் கொடுப்பது தானே - வாழ்க்கையென
உணர்ந்து மன்னித்துவிடுகையில் 'கோழை, பயந்தாங்கொல்லியெனப்
பெற்றப் பட்டங்களும் குறைவொன்ருமில்லை;
இரண்டுக்கும் நடுவே - விட்டும் கொடுத்து
கம்பீரமாய் எழுந்தும் நின்று வெற்றியென கர்ஜிக்கையில்
எழும் போட்டிகளும் பொறாமைகளும் – காண்கையில்
மிருங்கங்களுக்கு நடுவே வாழுதடா மனிதஜென்மமென
பயின்ற - பாடங்கள் ஏராளம்;
'போடா மனிதா' வென மனிதனை வெறுத்து
'கடவுளே' என இறைவனை வேண்ட அமர்கையில்
வேண்டுவதற்குக் கற்ற பாடங்களில் கூட -
கண்ணில் பட்டும் படாமலுமிருக்கும் குறைகள் கணக்கிலடங்காதவை;
ஆயிரம் கடவுள்கள்..
ஆயிரம் வேதங்கள்..
எல்லாம் உண்மையும் பொய்யுமாய் -
மனிதம் கொள்ளவும் துணிகிறதே என்ற - உதாரண வலிகள்
அறிவை உருத்தாமலில்லை;,
காற்றினைப்போல் - நறுமணம் போல் - மின்சாரம் போல் -
கண்ணில் படாது எங்கிருந்தோ - இயங்கும்
ஒரு இறைமையின் உணர்வு -
உள்ளே ஊடுருவி உயிரைத் துளைத்தெடுக்க;
இடையே -
எது உண்மை..? யார் சரி..?
யாரை வேண்டுவது..? எப்படி வேண்டுவது?
யாரை அறிவது? எப்படி நாடுவது?
எங்கிருக்கிறேன்? என்ன செய்கிறேன்?
எதற்கு பிறந்தேன்? ஏனிந்த வாழ்க்கை?
என்ன நரகமிது இறைவா யென
நெஞ்சு கணக்கையில் -
ஜென்மம் செத்து செத்து பிழைப்பதின்னும் - எத்தனை காலத்திற்கோ???????!!!!!!!!!!!!
நீள நெடுக்களிலெல்லாம் போராட்டம். மரணம். கொலை. கொள்ளை..
இன்னும் எத்தனை இலங்கை(?) எத்தனை பாலஸ்தீனம் (?)
எத்தனை காஸ்மீர் ?? எத்தனை மனிதர்கள்???
எத்தனை மரணத்தை - மண் தின்று மிஞ்சுமோ உலகத்தீரே??????!!!!!
நரம் தின்னத் தயங்கும் மனிதம்
உயிர் குடித்து -வெற்றியென கர்ஜிகையில் -
இன்னும் எத்தனை காலங்கள் - இப்படி
இரத்தமாய் சொட்டித் தீருமோ(?)!"
வெறும் செத்து மடிவதும் –
சாகப் பிறப்பதுமா
வாழ்கை?
எனில் – சாவதற்கும் வாழ்வதற்குமேடையே
மரண வாசத்தில் நொடிகள் நகர்வதா - காலமாற்றம்????
“ஏதோ ஒரு பயம் -
எப்போதோ ஒரு சந்தோஷம்:
"ஏதோ ஒரு பதட்டம்-
எங்கோ ஒரு நிம்மதி:
"எத்தனை எத்தனையோ தோல்வி -
யாரோ இழந்த வெற்றி:
"எதற்கோ கவலை-
எப்படியோ ஒரு சிரிப்பு;
“எது பாதையென்றே தெரியாமல் பயணம் -
எதையோ எட்டிவிட்டத் திமிர்;
எதுவுமே நிலைமாறாத வேதனை
மீண்டும் எல்லாம் பெற ஆசை - யென
வெறும் சில்லறை சப்தங்களாக தான்
நகர்கிறது வாழ்கை!!
------------------------------வித்யாசாகர்

சிறப்பான சிந்தனை !!!!!!!!

சிறப்பான கவிதைக்குப் பாராட்டுக்கள். வாழ்த்துகள். மனிதர்களின் தோற்றத்தின்போதே வாழ்க்கையில் போர் முறைகள் தொடங்கப் பட்டிருக்கும் என நினைக்கிறேன். என்னத்தான் முயன்றாலும் போரையோ அல்லது தனிப்பட்ட ஒருவரின் கொலையையோ இனிமேல் தடுக்க முடியாது. எல்லாவற்றையும் சகித்துக்கொண்டு வாழ்ந்து செத்து மடிய வேண்டியதுதான். போரோ தனிப்பட்ட மரணமோ சம்பந்தப்பட்ட நபரையோ குடும்பத்தையோ மட்டும்தான் பாதிக்கச்செய்கிறது. படைப்பாளராக இருந்து நாம் கவிதை போன்ற இலக்கியங்களைத்தான் செய்ய முடியும்.

கவிதையில் ஆயிரம் கடவுள்கள் என்று வருகிறது. நான் படித்தறிந்த வரையில் உலகுக்கெல்லாம் ஒரே கடவுள்தான் இருக்க முடியும். கடவுள் கற்பனையாக இருப்பினும் ஒருவனேதான். ஆனால் தெய்வங்கள் ஆயிரக்கணக்கிலோ லட்சக்கணக்கிலோ இருக்கலாம். கடவுளும் இறைவனும் ஒரே பொருள் குறித்த இரு சொல் என்பதால் ஆயிரம் கடவுள்கள் என்ற வார்த்ததையை ஆயிரத்தைத் தவிர்த்து கடவுள் என்று குறிப்பிட்டால் கவிதை வரியில் அழுத்தம் குறைவதைக் காணமுடிகிறது. ஆயிரம் கடவுள்கள் என்ற வார்த்தைகளுக்குப் பதில் ஆயிரம் தெய்வங்கள் என்று இருந்தால் கவிதையின் பொருள் சிறக்கும் என் நினைக்கிறேன். மற்றுமொரு சிறு திருத்தம் நிறைய ?குறிகளும் ! குறிகளும் இருப்பதும் அழகல்ல. ஒரு கேள்விக் குறியும் அதிக பட்சம் மூன்று !!! இருப்பதே முறை.

அருமையான கவிதை!