இந்த வருடத்திற்கான தேசிய விருதை வாங்க போகும் நடிகை யார் என்பது தான் இன்றைய தேதியில் சினிமா உலகின் பேச்சாக இருந்தது. பாலிவுட்டில் மிகவும் பிரபலமான நடிகையின் பெயர் பரிந்துரையில் இருந்ததால் அவருக்கே விருது கிடைக்கும் என்று அனைவரும் நம்பினர். தமிழ் திரையுலகின் (கோலிவுட்டின்) சார்பில் புதிதாய் அறிமுகமான நடிகை மகிஷாவின் பெயர் பரிந்துரைக்கப்பட்டிருந்தது.

மகிஷாவிற்கு விருதுகள் மீதெல்லாம் நம்பிக்கை இல்லை. வழக்கம் போல் அன்றும் படப்பிடிப்பிற்கு பத்து நிமிடம் முன்னதாகவே வந்து விட்டாள். மற்ற நடிகைகளை போல் ஆப்பிள் சாறு, விலையுயர்ந்த வாகனம், தவறான உச்சரிப்புடனான தமிழ் என்று அலட்டிக் கொள்ளாத நடிகை மகிஷா. எப்போதும் தான் உண்டு தன் வேலை உண்டு என்று இருப்பவள்.

மாலை நான்கு மணியளவில் தன் முதல் படத்தின் இயக்குனர் குருவிடம் இருந்து தனக்கு நான்கைந்து முறை துண்டிக்கப்பட்ட அழைப்பு (மிஸ்டு கால்) வந்திருந்ததை கவனித்தாள்.

மகேஷ்வரியாக இருந்தவளை தன் படத்தில் வாய்ப்பு கொடுத்து மகிஷாவாக மாற்றியவன் குரு தான். படப்பிடிப்பிற்கு நடுவில் கைபேசியை உபயோகிக்க கூடாது என்று மகிஷாவிற்கு சொல்லி கொடுத்தவனே குரு தான். அதனால் குருவை மீண்டும் அழைக்காமல் அப்படியே விட்டு விட்டாள் மகிஷா.

[You must be registered and logged in to see this image.]

இயக்குனர் குரு திறமைக்கு மட்டுமே மதிப்பு தர கூடியவன். நல்ல நடிப்பு திறமை இருக்கும் நடிகர் நடிகைகளுக்கு மட்டுமே தன் படத்தில் நடிக்க வாய்ப்பு தருவான். திமிரு பிடித்தவன், தலைக்கனம் உடையவன் என்று பலர் குற்றம் சாற்றினாலும் சினிமா உலகில் தாக்குப் பிடிக்க வெற்றியும், திறமையுமே மட்டுமே முக்கியம் என்பதால் இன்னும் வெற்றி இயக்குனராக வலம் வந்து கொண்டிருக்கிறான்.

சில மணி நேரங்கள் கழித்து குருவிடம் இருந்து தனக்கு வந்திருந்த குறுஞ்செய்தியை நோக்கினாள். அதை பார்த்தவளின் முகத்திலும், மனதிலும் அத்தனை மகிழ்ச்சி. இதை கவனித்த நடிகர் அஜய் அவளிடம் விசாரிக்க, இந்த வருடத்திற்கான சிறந்த நடிகைக்கான தேசிய விருது அவளுக்கு கிடைத்திருப்பதை கூறினாள்.

இந்த விஷயம் படப்பிடிப்பு குழுவில் இருக்கும் அனைவருக்கும் பரவ எல்லோரின் வாழ்த்துக்களையும் பாராட்டுக்களையும் பெற்றுக் கொண்டு இயக்குனர் குருவின் வீட்டிற்கு கிளம்பினாள்.

பொதுவாக சினிமா நடிகர்கள் நடிகைகள் மீது கிசுகிசுக்கள் என்ற பெயரில் ஏதாவது பொய் வதந்திகள் பரப்பப்படுவது சகஜமே. அதே போல தான் இயக்குனர் குரு நடிகை மகிஷாவை காதலர்கள் என்று சில பத்திரிக்கைகள் எழுதின. இவை அனைத்தையும் தாண்டி குரு மகிஷா இருவருக்கும் இடையே நல்ல நட்பும் ஒருத்தர் மீது இன்னொருத்தருக்கு மதிப்பும், மரியாதையும் இருந்தது.

மகிஷாவின் முதல் படம் “மனமே!! மனமே!!”. அதில் மனநிலை பாதிக்கப்பட்ட பெண்ணாக மிக அற்புதமாக நடித்திருந்தாள் மகிஷா. அந்த படத்திற்கு பின் இரண்டு படங்களில் மகிஷா நடித்து விட்டாலும் இன்னும் மக்கள் மத்தியில் அவள் மனமே மனமே படத்தில் நடித்த மன நலம் பாதிக்கப்பட்ட பெண் கதாப்பாத்திரமே மக்கள் நெஞ்சில் இன்னும் நீங்காமல் உள்ளது. இயக்குனர் குருவுக்கு ஒரு பெரிய திருப்புமுனையை ஏற்படுத்திய படம் அது.

குருவை சந்தித்ததும் அவன் காலில் விழுந்து ஆசீர்வாதம் பெற்றுக் கொண்டாள் மகிஷா. திரையுலகில் பலரும் மகிஷாவை தொடர்பு கொண்டு அவளுக்கு வாழ்த்துக்களை தெரிவித்து கொண்டனர். பல படங்களை இயக்கிய உச்ச இயக்குனர்கள் கூட கைபேசி மூலம் மகிஷாவுக்கு வாழ்த்துக்களை தெரிவித்து கொண்டனர். அவளின் நடிப்பை வெகுவாக பலரும் பாராட்டினர். முதலமைச்சர் கூட தனது அறிக்கையில் மகிஷாவிற்கு தன் சார்பாகவும் தமிழக அரசு சார்பாகவும் தனது வாழ்த்துக்களை தெரிவித்தார்.

அன்று வீட்டிற்கு சென்றதும் மகிஷா தன் அன்னையின் புகைப்படத்திற்கு மாலையிட்டு விளக்கேற்றி மறைந்த தன் அன்னையின் ஆசிகளை பெற்றுக்கொண்டான். பிறகு தன் தந்தையின் மடியில் படுத்துக்கொண்டான். தன் அன்னையின் புடைப்படத்தை பார்க்கும் போது அடக்க முடியாமல் அழுகை அழுகையாக வந்தது. பழைய நினைவுகள் அவள் நெஞ்சை தாக்கியது.

கடந்த பதினைந்து வருடங்களாக மன நலம் பாதிக்கப்பட்டு ஒரு குழந்தையாக வாழ்ந்து இறந்த தன் தாய் வாழ்ந்த வாழ்க்கையின் சில துளிகள் தானே மகிஷா மனமே மனமே படத்தில் நடித்தது, தன் தாயின் நினைவுகளோடு அப்படியே உறங்கி போனாள் மகேஸ்வரி.