“ஊழலை ஒழிப்பேனென்பார்
      தேர்தல் வெற்றிக்கு
      ஊழலே வழியென்பார்!”
கொஞ்சம் ஹைக்கூ போல இல்லை!?
      “கைரேகையில் இல்லை
      கைகளில் உள்ளது
      எதிர்காலம்”.
தன்னம்பிக்கையூட்டும் கைராசிக் கவிதை.
      “நாளை என்று
      நாளைக் கடத்தாதே
      இன்றே முடி”.
      “மன இருள்
      விரட்டும் விளக்கு
      திருக்குறள்”.
      “ஓரே வரியில்
      ஒப்பற்ற அறம்
      ஆத்திச் சூடி”.
அரம் பயன்படுத்தத் தெரிந்த அரக்கர்களுக்கு அறம் புரியவில்லையே!
      “இருப்பை உணர்த்தி
      இரையானது பாம்புக்கு
      தவளை”.
இருப்பை இறுமாப்பாகச் சொல்லி வாழும் தவளை போன்றவர்களுக்கு வருமான வரித்துறைப் பாம்பு, படமெடுப்பது தெரியவில்லையே!
      “இனிப்பதில்லை
      பழமானாலும்
      வேப்பம்பழம்”
நிலவேம்பு கசாயம் தேடுவோர் கவனத்திற்கு.
      “பூனையில் சைவம் இல்லை
      பசுவில் அசைவம் இல்லை
      இயற்கையின் இயல்பு”.
      “தெரிவதில்லை
      கண்களுக்கு
      சுற்றும் பூமி”.
பூமியின் பேதம் புரியாத விவேகமற்றவர்கள், “எல்லாம் அவன் செயல்” எனக் கூறுவோர், விஞ்ஞானம் அறியாத அஞ்ஞானிகள்.
      “குடை விரித்தது
      மழை நின்றதும்
      காளான்”.
      “பூ, காய், இலை
      முழுவதும் பயன்படும்
      முருங்கை மரம்”.
ஆண்மையான மூவரிகள்.
      “பிரிய மனமில்லை,
      பிரித்தது காற்று
      மரத்திலிருந்து இலை”.
காற்றுக்குத் தெரிந்த உண்மை இ’லை’களுக்குத் தெரியவில்லையே!
      “நடுவதோடு சரி
      பாரமரிப்பதில்லை
      மரம்”.
அடிக்கல் மட்டும் நாட்டும் மரத்துப் போன மனிதர்களுக்கு கவனஈர்ப்பு.
      “கோபம் கொள்வதில்லை
      ஊடல் கொள்வதில்லை
      மலர்கள்”
மனிதக் காற்றுக்கு மலர்கள் கூறும் அறிவுரை.
      “உடன் இருந்தாலும்
      ஒட்ட விடுவதில்லை நீரை
      தாமரை”.
ஒட்டாமல் உறவாடும் ஆட்சிக்கு ஒரு ராஜதந்திரக் கவிதை வரிகள்.
      “கணக்கில் அடங்காது
      வண்ணங்களின் எண்ணிக்கை
      மலர்கள்!”.
தினமொரு கட்சி தோற்றத்திற்கு இக்கவிதை ‘மலர்க் கண்காட்சி’.
      “தோற்றுப் போனேன்
      பிடிக்க முயன்று
      வண்ணத்துப்பூச்சி”.
தேர்தலில் நிற்கும் சிலர் தெரிந்தே செய்யும் தவறு.
      “வானில் வட்டமிடும்
      பருந்து
      பயத்தில் குஞ்சுகள்”.
மேலே இருப்போரைக் கண்டு அஞ்சும் கீழே இருப்போர்! – யாருக்கு யார்?! ஆழப்படித்தால் அர்த்தம் புரியும்!
      “பணபடுத்தப் படைத்தது
      புண்படுத்தப் பயன்படுகிறது
      மதம்”.
      “மனிதனை
      விலங்காக்கும்
      சாதிவெறி”.
தேர்தலுக்குத் தேவைப்படும் பயங்கர ஆயுதங்கள்.
      “மது மீதான ஆசை
      உயில் பறித்தது
      மனிதனை”.
தற்கொலைக்கு மனிதன் கண்டுபிடித்த மகத்தான மருந்து.
      “கழிவறை சுத்தம் செய்வதை
      குடித்து மகிழும் அவலம்
      குளிர்பானம்”.
மனிதனே ஒரு நடமாடும் கழிப்பறை தானே!
      “பொய் சொன்ன வாய்க்கு
      போசனம் கிடைத்தது
      சோதிடர்”.
பிழைக்கத் தெரிந்தவர்கள்.
      “இப்படை போதுமா
      இன்னும் கொஞ்சம் வேணுமா
      மிரட்சியில் அரசியல்வாதிகள்”.
எதைக் கொண்டு மிரட்டினார்களோ, அதைக் கண்டு மிரள்கிறார்கள்.
      “நம்பலாமா
      சைவம் என்கிறது
      ஓநாய்!”
கொன்றால் பாவம், தின்றால் போச்சு!
      “கொள்கைக்காக அன்று
      கோடிகளுக்காக இன்று
      கூட்டணி.”
கொள்ளைக்காக வெள்ளையடிக்கக் கூடாதா?
      ‘சரியாகச் சொன்னால்
      சிந்தனைச் சிற்பி பெரியார்
      அரசியல் பற்றி”.
      “காற்றில் பறந்தது
      சுயமரியாதைக் கொள்கை
      அரசியல்”.
      சண்டையிட்ட பூனைகளை
      ஏமாற்றிய குரங்காய்
      அரசியல்!
குரங்கு கையில் பூமாலையைக் கொடுத்தது யார் தவறு?
      “நினைவிற்கு வந்தனர்
      காமராசரும் கக்கனும்
      ஆடம்பர அரசியல்!”
நினைவாவது இருக்கிறதே! (தேர்தல் நேரத்தில் மட்டும்)
      “முகத்தில் கரி பூசி
      ஏமாற்றுவதற்கு முன்னோட்டம்
      விரலில் மை”.
      “சட்டம் இயற்றுங்கள்
      தேர்தல் அறிக்கை நிறைவேற்றாவிடில்
      தண்டனை உறுதியென்று”.
      ‘உலகம் சுற்றும் வாலிபரே
      உன் நாட்டையும் பாருங்கள்
      உழவர்கள் தற்கொலை!”.
“நான் ஆணையிட்டால்” ...
      அது நடந்து விட்டால்...
      “பழுது கண்டு வாழ்வாரே, வாழ்வார்
      மற்றவரெலாம தொழுதுண்டு பின் செல்பவர்”.
      “நோய்களை உருவாக்கும்
      காரணி
      மனக்கவலை”.
      “வீணாக்காது வழங்கிடுக
      வேண்டும் விழிப்புணர்வு
      விழிகள் தானம்”.
விழிப்புணர்வு தேவை! உயிரோடு இருக்கும்போதே விழித்துக் கொள்ள!
      உணர்வின் அகரம்
      உயர்வில் சிகரம்
      அம்மா!
      அகர முதல எழுத்தெல்லாம் ஆதி
      பகவன் முதற்றே உலகு.
என்றார்.  ‘ஆதி பகவன்’ அம்மா தானே!
      பொறுமை காத்தவள்
      பெருமை சேர்த்தவள்
      அம்மா!
      “மறக்க முடியாத உறவு
      மறக்கக் கூடாத உறவு
      அம்மா!”                                                                                                                                                                                                                                                                                                                                                                                                                           
      குப்பை கூட
      மக்கினால் உரம்
      மனிதன்?
மக்கியிருக்காது என நினைத்து தோண்டிப் பார்த்து சோதனை செய்ய சவால் விடுவோரை என்ன செய்வது, இப்படிச் சொல்பவர் மாக்களே!
      “விட்டுக் கொடுங்கள்
      ஒழியும் வன்முறை
      நிலவும் அமைதி!”
      “வருடத்தில் ஒரு நாள்
      நினைப்பதல்ல
      காதல்!”
      “மூச்சு இருக்கும் வரை
      நினைவில் இருக்கும்
      முதல் காதல்!”
மற்ற காதல்களுக்கு மூச்சு முட்டுகிறது!
      “கவிதை வழங்கிடும்
      அட்சய பாத்திரம்
      அவள் முகம்!”
      “பிறந்தது பசி
      பிறந்தது மகிழ்ச்சி
      அவள் வருகை!”
மெட்டி ஒலிக்கிறது, கவிதை வார்த்தைகளில்.
      என்னவன்
      உதடுகள் வழி
      ஊட்டச்சத்து
      முத்தம்!
ஆரோக்ய உணவை அடையாளம் காட்டியமைக்கு நன்றி!
      தமிழ்த் திரைப்படங்களில்
      தடை செய்யப்பட்டது 
      முத்தம்!
முத்தமல்ல, வெறும் சத்தம், தணிக்கையாளர்களுக்குப் பொறாமை.
      பெயரால் மட்டுமல்ல
      உண்மையில் பெரியார்
      பெரியார்.
பகுத்தறிவுச் சிந்தனை கரை புரண்டோடும் வற்றாத ஜீவ நதி பெரியார்!
      அடுக்குமொழியால்
      அள்ளியவர் உள்ளங்களை
      அறிஞர் அண்ணா!
தமிழ் இனத்தின் சுவாசக் காற்று.
      பொது உடமையானது
      கல்வி
      காமராசர்!
      முன்னவரும் இல்லை
      பின்னவரும் இல்லை
      கலாமிற்கு இணை!
கலாம் பிறக்கவில்லை, தோன்றினார், மறையவில்லை, மறையோதிக் கொண்டிருக்கிறார்.
      அஞ்சாமையின் குறியீடு நீ
      சமரசம் செய்யாத கொள்கையாளன்
      இன்குலாப்!
      ஈழத் தமிழருக்காக மனிதாபிமானக்
      கவிதைகள் யாத்தவன்
      இன்குலாப்!
      எரிச்சலூட்டிய போதும் நன்றி
      உணவு கிடைக்கின்றது
      விளம்பர இடைவெளி!
      நேரம் விழுங்குகிறது
      அன்று தொலைக்காட்சி
      இன்று அலைபேசி!
      தொலைக்காட்சித் தொடர் போல
      தொடரும் முடிவின்றி
      கந்துவட்டி!
      இழந்து விடுகின்றன
      நல்மதிப்பை
      நீதிமன்றங்கள்!
      ‘வாழ்கிறது
      கண்ணி யுகத்திலும்
      காந்தீயம்”.
      “தானாக வந்து சேர்ந்தது
      மேய்ச்சலுக்கு சென்ற
      மாடு”.
தேர்தலில் தோல்வியைத் தழுவிய கட்சியாளர் போல.
      “தனித்து இருந்தால் கிழிக்கலாம்
      சேர்ந்து இருந்தால் கிழிக்க முடியாது
      காகிதம்”
      ‘தூக்கி எரியும்
      யார் தொட்டாலும்
      மின்சாரம்’.
      “வேகமாகச் செல்ல அல்ல
      நிற்பதற்குத் தான்
      மஞ்சள் விளக்கு”.
      “அழுக்காடை சுமக்க வருத்தமில்லை
      சுத்தாடை சுமக்க கர்வமில்லை
      கழுதை”
கற்பூர வாசனை தெரியாதவர்க்கு கழுதை கற்றுத்தரும் பாடம்.
      “கண்களை மூடிய போதும்
      களைப்பின்றிப் பயணம்
      குதிரை!”.
      “நேற்று மழை
      இன்று புயல்
      நாளை?”
தேர்தலுக்கு முன் மழை, தேர்தல் அன்று புயல், முடிவு அறிவித்த பின் அமைதி.
      நடிகனாக மட்டும்
      பாருங்கள்
      நடிகவேள் வேண்டுகோள்.
      “மனத்தால் செதுக்கினான்
      உளியில் செதுக்குமுன்
      சிற்பி”.
மனப்பால் குடித்து தேர்தலில் நிற்போருக்கு அறிவுரை!”
      “ஞானப்பால் வேண்டாம்
      பசும்பால் போதும்
      பசித்து அழும் குழந்தைக்கு”.
      உதட்டில் ஆன்மீகம்
      கண்களில் காமம்
      சாமியார்!
“சாமி-யார்?” எனக் கேட்கும் சாமியார்களுகு “ரஞ்திதமான” கவிதை.
      “அன்றும் இன்றும் என்றும்
      தரும் அறிவொளி
      புத்தகங்கள்!”
      “முதல் மொழி மட்டுமல்ல
      முதன்மை மொழி
      தமிழ்!”
      தமிழுக்கு அமுதென்று பேர்
      சாகா வரம் தரும் அருமருந்து அமிழ்தம்!”