ஆராய்ச்சி, ஆராய்ச்சி என்று தன் வாழ்நாளில் ஒவ்வொரு 24 மணி நேரத்தையும் ஆராய்ச்சிக்கென்றே செலவழித்து, தான்
ஆராய்ச்சி மூலம் கண்டுபிடித்தவற்றை மூன்று புத்தகங்களாக எழுதினார்.
இறுதியில் அவரே தனது ஆராய்ச்சிகள் முழுவதும் தவறானவை என்றும், தான் வெளியிட்ட கருத்துக்கள் அனைத்தும் தவறு எனவும் அறிக்கை வெளியிட்டார்.


ஆம்... ரோஜர் பேக்கன் என்னும் இந்த விஞ்ஞானி வாழ்ந்த 1200 முதல் 1300
க்கு இடைப்பட்ட காலம் விஞ்ஞானிகளுக்கு துன்பங்கள் விளைவிக்கப்பட்ட காலம்.
அக்கால மக்கள் ஏற்கனவே அறிஞர்கள் வெளியிட்டுள்ள கருத்துக்களைச்
சோதித்துப் பார்ப்பது கெட்ட செயல் எனக் கருதினர்.


எனவே, இவரது கண்டுபிடிப்புகளான சிறியதை பெரிதுபடுத்திக் காட்டும் கண்ணாடி, வெடிமருந்து போன்றவற்றைக் கண்ட மக்கள் இவன் பேய்களைக் கொண்டு கண்கட்டிவித்தை காட்டுகிறான் என பேசிக் கொண்டனர். விளைவு, இவருக்கு 14 ஆண்டுகள் சிறைத் தண்டனை கிடைத்தது. அச்சிறைத் தண்டனையிலிருந்து தப்பிக்கவே ரோஜர் பேக்கன் மேற்கண்ட அறிவிப்பை வெளியிட்டார்.


1214-ம் ஆண்டு இங்கிலாந்திலுள்ள இல்செஸ்டர் என்னும் இடத்தில் பிறந்த ரோஜர் பேக்கன், ஆக்ஸ்போர்ட் பல்கலைக்கழகத்தில் ‘தியாலஜி’ என்கிற வேதசாஸ்திரத்தைப் பயின்றார்.


இவர்
காலத்தில் மக்கள் ஆட்டின் இரத்தத்தில் வைரம் கரைந்துள்ளதாக நம்பினர்.
இதனை தைரியமாகப் பரிசோதனை செய்து காட்டிய இவர் மக்களின் கருத்து தவறானது
என நிரூபித்துக் காட்டினார்.


1250-ம் ஆண்டு நிலக்கரி, வெடியுப்பு
மற்றும் கந்தகம் கலந்து தயாரிக்கப்பட்ட வெடிமருந்தைக் கண்டுபிடித்தார்.
கண்கள் வேலை செய்யும் விதம் குறித்து தீவிர ஆராய்ச்சி செய்த இவர் 1268-ம்
ஆண்டு தனது கண்டுபிடிப்பான சிறியவற்றை பெரிதுபடுத்திக் காட்டும்
கண்ணாடியைப் பார்வை குறைபாடு உள்ளவர்கள் பயன்படுத்தலாம் என அறிவித்தார்.


பார்ப்பதற்கு சிறியதாகத் தெரியும் சூரியன், சந்திரன் மற்றும் நட்சத்திரங்களும் உண்மையில் மிகப் பெரியவை என ஆராய்ந்து கூறினார்.

1294-ம் ஆண்டு ரோஜர் பேக்கன் தனது எண்பதாவது வயதில் மரணமடைந்தார். தற்போது இவர் ‘நவீன அறிவியலின் தந்தை’ என அழைக்கப்படுகிறார்.