மழை என் பாட்டியை போல

by **sagampari** Fri Apr 08, 2011 1:53 pm

பட்டுத்தெரித்த நீர் திவலைகள்
நெஞ்சினிலே நினைவலைகள்
மழை என் பாட்டியை போல
எப்போது வந்தாலும்
வரவேற்பையும் வசைபாடுதலையும்
கூடுதலாகவே தரும்...! பெறும்...!
எனக்கும் பாட்டிக்குமான நாட்கள்
சூர்ப்பனகைக்கும் மகிஷிக்குமானது
என்ன இப்படி என்கிறீர்களா?

அம்மா ஆசிரியப்பணியிலும்
அப்பா அரசாங்கப் பணியிலுமாக
வீட்டிலும் பணியின் நிழல் தொடர,
எனக்கோ பாட்டிதான் எல்லாமும்!
தீபாவளி கொண்டாட்டம் ஆரம்பித்தால்
வெடிபோடுவது வெளியில் அல்ல
பாட்டியின் கோட்டை அடுப்பில்தான்
புகை அமர்த்த ஊதினால்
பொட்டுவெடி பறையடிக்கும்
சர வெடியின் அதிரடியில்
சல்லடை சல்லடையாகிவிடும்
விளைவாக பாட்டியின் கச்சேரி
அப்புறம் என்னுடைய எதிர் பாட்டு
இத்தனைக்கும் பிறகு
தோல்வி வெற்றியை கணக்கிடாத
எதிரணி தலைவர்கள்போல கைகுலுக்கி
அறுசுவை(?) விருந்தாடுவோம்
பாவம்! நானும் இல்லைஎன்றால்
பிறகு யார்தான் பட்சணங்களை சாப்பிடுவது.

பாட்டிக்கும் அம்மாவிற்குமான போரில்
நான் அவளுக்கு எதிர் முகாமில்
புதிய ஆள்போல் முகம் திருப்புவேன்
தேர்தல் வாக்குறுதிகள் போல
இலவச அறிவிப்பு தருவதோடு நில்லாமல்
உண்மையிலேயே தின்பண்டங்கள் தந்து
மறுபடியும் ஆட்சியை பிடித்து...
எனக்காகவே அம்மாவிடம்
சமாதான படலமும் ஆரம்பிக்கும்

பாட்டியின் இனிய பக்கமும் உண்டு
பேறு காலத்தின் தேவைகளுக்கு
எல்லோரும் தேடுவதும் அவளைத்தான்
இரவு பகல் எந்த நேரமும்
தாயையும் பிள்ளையையும்
தாதிபோல பக்குவம் பார்த்து சீராட்ட
தள்ளாமையை தள்ளி வைப்பாள்.
எனக்கும் அவள்தான் துணை.
எப்படியிருந்தாலும் அவள் என் பாட்டி!

என்னுடய பேரன்கள் எப்படியென்றால்.....?
இன்றைய முதியோர் இல்ல உலகத்தில்
சின்ன குழந்தைகளான பாட்டிகளும்
பெரியவர்களாகிவிட்ட பேரன்களும்
சந்திப்பதும் இல்லை சண்டையிடுவதுமில்லை!

by **arony** Fri Apr 08, 2011 1:59 pm

முடிவு கவலைக்குரியதே....

நல்ல கற்பனை.

by செல்வன் Fri Apr 08, 2011 2:01 pm

sagampari wrote:இன்றைய முதியோர் இல்ல உலகத்தில்
சின்ன குழந்தைகளான பாட்டிகளும்
பெரியவர்களாகிவிட்ட பேரன்களும்
சந்திப்பதும் இல்லை சண்டையிடுவதுமில்லை!

அருமையான பதிவு. பகிர்வுக்கு நன்றி....

இன்றைய பாட்டிகளும், பேரன்களும் ஒன்றாக இருப்பது, நடப்பு தலைமுறை நம்மிடம்தான் உள்ளது...

கற்பனை அருமை

by **சிசு** Fri Apr 08, 2011 2:16 pm

//மழை என் பாட்டியை போல
எப்போது வந்தாலும்
வரவேற்பையும் வசைபாடுதலையும்
கூடுதலாகவே தரும்...! பெறும்...!//

வாவ்.... அருமையான உவமை.

//தள்ளாமையை தள்ளி வைப்பாள்.//

வார்த்தைப் பிரயோகம் கவர்கிறது.

என் பாட்டி(யையும்) நினைவூட்டுகிறது கவிதை. ஆனால் நான் பட்டாசு கொளுத்தியதில்லை Laughing

. பாட்டியின் ஆதரவிலும், அணைப்பிலும், அன்பிலும் வாழும் பாக்கியம் எத்தனை பேருக்குக் கிடைக்கிறது.? சுருக்கம் விழுந்து சொரசொரவென்ற கையின் அன்பு வருடலில் உடலும் உள்ளமும் ஒருசேர சிலிர்க்குமே... அந்த கணம் அற்புதம்.

//சந்திப்பதும் இல்லை சண்டையிடுவதுமில்லை!//

அந்த உலகின் ஆனந்தத்தை அறியாதவரை பேரன்கள் பாட்டியின் அருமையை அறியப்போவதில்லை. வருத்தமே மேலோங்குகிறது.

மழை என் பாட்டியை போல - பிளாஷ் பேக் ...