தேயா இரவு ..

by shanmugam Mon Apr 11, 2011 11:45 am

நன்றி ஆனந்த விகடன் -11.3.2009 இதழ்

கே .ஸ்டாலின் கவிதைகள்

தேயா இரவு ..

முழு நிலவை தரிசித்தபடி

கிடத்தபட்டிருக்கிறது உனது உடல்

வாழ்கையின் விசித்திரங்களை

கேலி செய்யும்

பைத்தியம் ஒன்றின் நடனமென

உனது உடலை

கடந்து போகின்றன

வெவேறு வடிவிலான

வெண்மேக பிம்பங்கள்

நீண்ட யுகத்தின்

ஒற்றை விநாடி என

ஊர்ந்து செல்கிறது

பிணத்துடனான இவ்விரவு.

நாளை உனை தேடி அலையும்

உன் முற்றத்து வெயிலிடம்

சொல்லி கொள்வதற்கென

உனது பெருமை பேசிகொண்டிருக்கும்

எங்கள் குரல்களை

பதிவுசெய்து கொள்கிறது

இக் குளிர் காற்று .

உன் காலடியில் புகையும்

வத்தியின் வாசனையில்

மயங்கி கிடக்கும் தெரு நாய்க்கு

வாய்க்கிறது ஒரு சுகந்தமான இரவு .

அடக்கம் செய்த பின்

ஆளுக்கொரு திசை என

பிரிந்து செல்லும் எங்களிடம்

நிரந்தரமாக -உனது

நினைவுகளை பகிர்ந்துகொள்ளவென

நிலவொன்றை விட்டு செல்கிறாய்

பௌர்ணமி அன்று இறந்த நீ!