புதுவையில் கடற்கரையில், கூட்டம் கூட்டமாக இறந்த நிலையில் டால்பின்கள் கரை ஒதுங்குவது, சுற்றுச்சூழல் ஆர்வலர்கள் மத்தியில் அதிர்ச்சியை ஏற்படுத்தியுள்ளது.

கடல் வாழ் உயிரினங்களில் டால்பின்கள் புத்திசாலியானவை. இவை மனிதர்களுடன் பழகும் இயல்புடையவை. இந்தியாவின் தேசிய நீர் விலங்கான டால்பின்கள், தற்போது அழியும் நிலையில் உள்ளதால், நாடு முழுவதும் டால்பின்களைப் பாதுகாக்க பல்வேறு நடவடிக்கைகள் எடுக்கப்பட்டு வருகின்றன.

இந்நிலையில், புதுச்சேரி அடுத்த சின்ன வீராம்பட்டினம், புதுக்குப்பம் கடற்கரையில் நேற்று காலை 8 மணிக்கு, கூட்டம் கூட்டமாக இறந்த நிலையில் டால்பின்கள் கரை ஒதுங்கின. சின்ன வீராம்பட்டினத்தில் 11 டால்பின்களும், புதுக்குப்பத்தில் ஐந்து என மொத்தம் 16 டால்பின்கள் கரை ஒதுங்கின. அதிர்ச்சியடைந்த மீனவர்கள், வனத்துறைக்கு தகவல் கொடுத்தனர். வனத்துறை கால்நடை மருத்துவர் குமரன் தலையிலான ஊழியர்கள், வீராம்பட்டினம் கடற்கரையில் கரை ஒதுங்கிய 16 டால்பின்களை பரிசோதனை செய்தனர். பின் அவற்றை பள்ளம் தோண்டி, புதைத்தனர்.

ஒரு டால்பின் மீனை மட்டும் கால்நடை மருத்துவக் கல்லூரிக்கு மேல்கட்ட பரிசோதனைக்காக அனுப்பி வைத்தனர். புதுச்சேரி கடற்கரையில் டால்பின்கள் கூட்டம் கூட்டமாக இறந்து கரை ஒதுங்கியுள்ளது குறித்து தமிழகம், காரைக்கால் மீன்துறைக்கு தகவல் தெரிவிக்கப்பட்டுள்ளது. இதுகுறித்து வனத்துறை டாக்டர் குமரன் கூறியதாவது: புதுச்சேரி கடற்கரையில் 10 பெண், 6 ஆண் டால்பின்கள் என, 16 டால்பின்கள் இறந்த நிலையில் கரை ஒதுங்கியுள்ளன. இவை மூக்கு நீள டால்பின்கள் வகையைச் சார்ந்தவை.

இறந்த டால்பின்களை பரிசோதனை செய்த போது, அவற்றின் உடலில் பெரிய காயம் ஏதும் இல்லை. ஆகவே, கப்பல் அல்லது விசைப்படகுகளில் அடிபட்டு இறந்திருக்க வாய்ப்பில்லை. மேலும், இவற்றில் இரண்டு பெண் டால்பின்கள் கர்ப்பமாக இருந்தன. டால்பின்களுக்கு இது இனப்பெருக்க காலம். இது போன்ற நேரத்தில் ஆண் டால்பின்கள் அசுர வேகமாக செயல்படும். பெண் டால்பின்களை கூட்டம் கூட்டமாக பின் தொடர்ந்து சென்று அச்சுறுத்தி, இனப்பெருக்கம் கொள்ளும்.

ஆண் டால்பின்கள் பிடியில் இருந்து தப்பிக்க, பெண் டால்பின்கள் கும்பலாகச் செல்லும். அப்படி வழி தவறி செல்லும் போது, கரையோரங்களில் ஒதுங்கி விடுகின்றன. அதன் பின், மீண்டும் கடலுக்குள் செல்ல வழி தெரியாமல் இறந்து விடுகின்றன. இவ்வாறு குமரன் கூறினார்.

ஐயோ பாவம்

வருத்தம் கூடாது ..
என்ன பிரச்சினை என்று ஆராய முயலவேண்டும் ..
அதற்க்கு எங்கு நேரம் இருக்க போகுது ..
எல்லாம் தேர்தல் பிசி ...