புதிது புதிதாக நோய்கள், அதனால் அதிகரிக்கும் உயிரிழப்புகள். சிந்திப்பதற்குள் நோய்களால் இறப்பவர்களின் எண்ணிக்கை வானை எட்டி விடுகிறது.
எங்கு பார்த்தாலும் சுதாதாரச் சீர்கேடு, ரசாயன பொருள்களால் செய்யப்படும் துரித உணவுகள், அசுத்தக் காற்று, கலப்படத்தையே மையமாக வைத்து தயாரிக்கப்படும் உணவு வகைகள். இவையெல்லாம் உண்டு நோய்த் தாக்குதலுக்கு உள்ளாகும் போதுதான் தெரிகிறது மருத்துவத்தின் அருமை. இதற்கு யார் காரணம் என்று சிந்திப்பதைவிட நாம் விழிப்புணர்வுடன் இருப்பதே சிறந்தது.
மாரடைப்பு, பக்கவாதம் இவை இரண்டும்தான் நோயாளிகள் இறப்பதற்கு முக்கியக் காரணம். துவக்கத்திலேயே கண்டறிந்து சிகிச்சை பெறுவது மிகவும் அவசியம் என்கின்றனர் மருத்துவர்கள்.
இதய நோயால் பாதிக்கப்படுவோரின் எண்ணிக்கை நாளுக்கு நாள் அதிகரித்துக் கொண்டே இருக்கிறது. போதிய விழிப்புணர்வு இல்லாததே இதற்குக் காரணம்.
175 மில்லியன் பேர் இறப்பு
24 மணி நேரமும் இயங்கிக் கொண்டிருக்கும் இதயத்தை கவனமாக பாதுகாக்க வேண்டியது நமது கடமை.
இதயத்துக்குச் செல்லும் ரத்தக் குழாய்களில் அடைப்பு ஏற்படும் நோயாளிகளில் 80 சதம் பேர் இறக்க நேரிடுவதாக மருத்துவர்கள் கூறுகின்றனர்.
மேலும், மாரடைப்பால் பாதிக்கப்படுபவர்களில் 50 சதம் பேர் 55 வயதுக்குள் இருக்கின்றனர். 20 வயது தாண்டியவர்களும் இந் நோயால் அதிகம் பாதிக்கப்பட்டுள்ளனர். உலகம் முழுவதும் இந் நோயால் ஆண்டுதோறும் 175 மில்லியன் பேர் இறக்கின்றனர்.
உலகில் 30 சதம் பேர் மாரடைப்பு ஏற்பட்டு முதல் ஒரு மணி நேரத்தில் இறக்கின்றனர். 6 பேருக்கு மாரடைப்பு ஏற்பட்டால் மருத்துவமனைக்கு வருவதற்குள் ஒருவர் இறந்து விடுகிறார்.
உடலில் உள்ள கெட்ட கொழுப்பே இதற்குக் காரணம் என்றும் அவர்கள் கூறுகின்றனர்.
மாரடைப்பை தடுக்க
என்ன வழி?
* "எச்டிஎல் எனப்படும் நல்ல கொழுப்புகள் 40 மி.கிராமுக்கு அதிகமாகவும், கெட்ட கொழுப்புகள் 140 மி.கிராமுக்கு குறைவாக இருக்க வேண்டும்.
* கொழுப்புள்ள பொருள்களைத் தவிர்க்க வேண்டும்.
* காய்கறிகள், பழங்கள் அதிகமாக உண்ண வேண்டும்.
* வாரம் இருமுறை மீன் குழம்பும், மீனும் சாப்பிட வேண்டும்.
* பாதாம், முந்திரி, பிஸ்தா போன்ற சத்தான கொழுப்புப் பொருள்களை உண்ண வேண்டும்.
* மன உளைச்சலைத் தவிர்க்க யோகா, உடற்பயிற்சி செய்ய வேண்டும்.
* புகைப்பிடித்தல், மது அருந்துதல் ஆகியவற்றை முற்றிலும் தவிர்க்க வேண்டும்.
* ரத்தத்தில் சர்க்கரை அளவு சாப்பிடுவதற்கு முன்பு 100 மி.கிராமுக்கு குறைவாகவும், சாப்பிட்டு ஒன்றரை மணி நேரம் கழித்து 140 மி.கிராமுக்கு அதிகமாகவும் இருக்க வேண்டும்.
* 20 வயதை தாண்டிய நபர்கள், முழு இதயப் பரிசோதனை மேற்கொள்வது மிகவும் அவசியம் என்கிறார் கோவை ஹார்ட் பவுண்டேசன் இதய சிகிச்சை நிபுணர் வி.ராஜேந்திரன்.
மாரடைப்பில் இருந்து நம் இதயங்களைக் காப்போம். வளமான வாழ்வைப் பெறுவோம்.