இலங்கையில் இறுதிகட்ட போரின் போது 5 மாதத்தில் 40 ஆயிரம் தமிழர்கள்
கொல்லப்பட்டதாகவும், போர்க்குற்றம் நடந்ததாகவும் ஐ.நா. விசாரணை குழு
அறிக்கையில் கூறப்பட்டுள்ளது.


இலங்கையில் கடந்த 2009-ம் ஆண்டு இறுதிகட்ட போர் நடந்தபோது அப்பாவி
தமிழர்கள் மீது தடை செய்யப்பட்ட கொத்து குண்டுகளை சிங்கள விமானப்படை
வீசியது. அதில் ஆயிரக்கணக்கான மக்கள் பலியாகினார். மேலும்,
ஆயிரக்கணக்கானோர் உடல் உறுப்புகளை இழந்து அவதிப்பட்டு வருகின்றனர்.
இதையடுத்து, சர்வதேச மனித உரிமை சட்டம் மற்றும் போர்க்குற்றம் நடந்ததாக
குற்றச்சாட்டு எழுந்தது.


எனவே, இந்த கொடுஞ்செயல் குறித்து விசாரிக்க ஐ.நா., பொதுச் செயலர் பான்
கீ மூன், மூன்று பேர் கொண்ட குழுவை அமைத்தார்.இந்தோனேஷியாவை சேர்ந்த
மார்சுகி தருஸ்மன், அமெரிக்காவை சேர்ந்த ஸ்டீவன் ரட்னர், தென் ஆப்ரிக்காவை
சேர்ந்த யாஸ்மின் சூகா ஆகியோர் அந்த குழுவில் இடம் பெற்றிருந்தனர். அந்த
குழுவை இலங்கைக்குள் அனுமதிக்க முடியாது என ராஜபக்சே அரசு அறிவித்தது.
எனினும், கடந்த 10 மாதங்களாக பல்வேறு ஆவணங்களை ஆய்வு செய்து அந்த குழுவினர்
விசாரணையை நடத்தி முடித்து , 214 பக்க அறிக்கையை ஐ.நா., பொது செயலர் பான்
கீ மூனிடம் நேற்று முன்தினம் சமர்ப்பித்தனர்.


அந்த அறிக்கையில், இறுதிகட்ட போரின் போது 40 ஆயிரம் அப்பாவி தமிழர்களை
கொன்று இலங்கை ராணுவம் போர்க்குற்றத்தில் ஈடுபட்டதாக குற்றஞ்சாட்டப்பட்டு
இருக்கிறது. இலங்கை அரசு மீது போர்க்குற்ற விசாரணை நடத்தவும் பரிந்துரை
செய்துள்ளது.


ஐ.நா., நிபுணர் குழு இந்த அறிக்கையை வெளியிடக் கூடாது என, இலங்கை அரசு
எதிர்ப்பு தெரிவித்தது.அறிக்கை வெளியிடப்பட்டால், நிவாரண பணிகள் பாதிக்கக்
கூடும் எனவும், அது கூறியிருந்தது. ஆனால், இலங்கை அரசின் எதிர்ப்பை மீறி,
இந்த அறிக்கையை ஐ.நா., வெளியிட்டுள்ளது.


அந்த அறிக்கையில் கூறப்பட்டுள்ளதாவது:-


இலங்கையில் இறுதிகட்ட போர் நடந்தபோது 5 மாத காலத்துக்குள் 40
ஆயிரத்துக்கும் மேற்பட்ட மக்கள் படுகொலை செய்யப்பட்டுள்ளனர். இலங்கை அரசு
நடத்திய குண்டு வீச்சினாலேயே அவர்களில் பெரும்பாலானோர் உயிரிழந்தனர்.
மருத்துவமனைகள் மீதும் குண்டுகள் வீசப்பட்டன. போர் நடைபெறும் நிலையில்
மக்களுக்கு உணவு, மருத்துவ வசதி போன்ற அடிப்படை மனித உரிமைகள் கிடைப்பதை
அரசு மிக கவனமாக தடுத்துள்ளது.


எனவே, இலங்கை ராணுவம் நடத்திய இறுதிகட்ட தாக்குதலானது, போர்க்
குற்றங்களாகவே உள்ளன. இதுபோல, அப்பாவி மக்களை மனிதக் கேடயமாக பயன்படுத்திய
விடுதலைப்புலிகளின் செயலும் போர்க்குற்றமாகும்.


இறுதிகட்ட போர் நடந்தபோது ஒரே இடத்தில் 3 லட்சத்து 30 ஆயிரம் தமிழர்கள்
முடக்கப்பட்டனர். தடை விதிக்கப்பட்ட குண்டுகளும் வீசப்பட்டுள்ளன. இரு
தரப்பினருமே பொது மக்களின் அருகிலேயே அபாயகர ஆயுதங்களை பயன்படுத்தினர்.
போரில் பாதிக்கப்பட்ட மக்களுக்கு அடிப்படை மருத்துவ வசதிகளை கூட அளிக்காமல்
மனித உரிமைகள் மீறப்பட்டன.


பத்திரிகைகளுக்கும் அனுமதி மறுக்கப்பட்டு ஊடக அடக்கு முறை
கையாளப்பட்டுள்ளது. பெண்கள் ஈவு இரக்கமின்றி கற்பழிக்கப்பட்டனர். எனவே,
இலங்கையில் நடந்தது போர்க்குற்றமாகும். இது தொடர்பாக இலங்கை அரசு மீது
போர்க்குற்ற விசாரணை நடத்தலாம். அதற்காக, சுதந்திரமான விசாரணை அமைப்பை
ஏற்படுத்தும் நடவடிக்கைகளை ஐ.நா. பொதுச் செயலாளர் தொடங்கலாம்.


இவ்வாறு ஐ.நா. விசாரணை குழு அறிக்கையில் கூறப்பட்டுள்ளது.


இதனால், இலங்கை அரசை சர்வதேச கோர்ட்டில் நிறுத்தி போர்க் குற்ற விசாரணை
நடத்த வேண்டும் என பல்வேறு நாடுகளும் வலியுறுத்தி உள்ளன. நிïயார்க்கை
சேர்ந்த சர்வதேச மனித உரிமை குழுவின் ஆசிய மண்டலத்துக்கான இயக்குனர் பிராட்
ஆடம்ஸ் கூறுகையில், "இது குறித்து சுதந்திரமான விசாரணை அமைப்பை ஏற்படுத்த
வேண்டும். ஆனால், ரஷியா மற்றும் சீனா ஆகிய நாடுகள் இந்த முயற்சிக்கு
முட்டுக்கட்டை போடுகின்றன'' என்றார்.


ஐ.நா.வுக்கான அமெரிக்க தூதர் சூசன் ரைஸ் கூறும்போது, "மனித உரிமைகள்
அப்பட்டமாக மீறப்பட்டதை ஐ.நா. விசாரணை அறிக்கை சுட்டிக் காட்டியுள்ளது. இது
குறித்து சுதந்திரமான விசாரணை நடத்தப்படுவது அவசியம். இதற்கு, இலங்கை
அரசில் உள்ளவர்கள் ஆக்கப்பூர்வமான தெளிவான பதிலை அளிக்க வேண்டும்''
என்றார்.


இதற்கிடையே, அறிக்கை தொடர்பாக ஐ.நா. பொதுச் செயலாளர் பான் கி மூன் கூறியதாவது:-


இலங்கை அரசுக்கு எதிராக போர்க்குற்ற விசாரணை நடத்துமாறு தனியாக என்னால்
உத்தரவிட முடியாது. அத்தகைய விசாரணை நடத்த சம்பந்தம்பட்ட நாடு (இலங்கை)
ஒப்புக்கொள்ள வேண்டும். அப்படி இல்லாவிட்டால், உலக நாடுகளை உறுப்பினர்களாக
கொண்ட ஐ.நா. பொதுச்சபை அல்லது பாதுகாப்பு கவுன்சில் அல்லது மனித உரிமை
கவுன்சில் அல்லது சர்வதேச அமைப்பு ஆகியவற்றில் ஏதாவது ஒரு அமைப்பினால்
விசாரணைக்கு ஏற்பாடு செய்யலாம்.


இலங்கையில் போர்க்குற்ற செயலில் ஈடுபட்டதற்காக அந்த நாட்டு அரசு பகிரங்கமாக பொது மன்னிப்பு கேட்க வேண்டும்.


இவ்வாறு பான் கி மூன் தெரிவித்துள்ளார்.


அதே நேரத்தில், இது போன்ற விசாரணைக்கு இலங்கை அரசு ஒருபோதும்
ஒப்புக்கொள்ளாது என ஐ.நா. அதிகாரிகள் சிலர் தெரிவித்தனர். சர்வதேச
கோர்ட்டில் உறுப்பினராக இலங்கை இல்லை. எனவே, ஐ.நா. பாதுகாப்பு கவுன்சில்
ஒப்புதல் அளித்தால் மட்டுமே போர்க்குற்ற விசாரணையை இலங்கைக்கு எதிராக
தொடங்க முடியும். சூடான் மற்றும் லிபியா விவகாரங்களில் இது போன்று ஒப்புதல்
அளிக்கப்பட்டது.


அதுபோன்று இலங்கைக்கு எதிராகவும் பாதுகாப்பு கவுன்சிலில் தீர்மானம்
நிறைவேறுமா என்பது சந்தேகம். ஏனெனில், `வீட்டோ' அதிகாரம் கொண்ட ரஷியா, சீனா
ஆகிய இரண்டு நாடுகளும் இலங்கைக்கு ஆதரவாக இருக்கின்றன. அதுபோல, பாதுகாப்பு
கவுன்சிலில் தற்காலிக உறுப்பினராக இருக்கும் இந்தியாவும் இலங்கையை
ஆதரிக்கிறது. இத்தகைய காரணங்களால், இலங்கைக்கு எதிராக போர்க்குற்ற
நடவடிக்கை எடுப்பதில் சிக்கல் ஏற்பட்டுள்ளது.