நதியைப் பாடு தம்பி - சிறுவர் பாடல்

by **அ.இராமநாதன்** Fri Apr 29, 2011 12:56 pm

-
வீறுமிக்க வீரன் போல்
போகும் நதியைப் பாரு
சேறுமிக்க வயலைக்கூட
செழுமையாக்கும் ஆறு..!
-
அள்ளிப் பருகத் திறந்து கிடக்கும்
அமுத நீரைப் பாரு
வெள்ளிச் சதங்கை ஓசையெழுப்பி
செல்லும் அழகைப் பாரு..!
-
விளையும் நாணல் கரையின் ஓரம்
வணங்குவதைப் பாரு
நெளியும் மீன்கள் பளிங்கு நீரில்
நீந்தும் அழகைப் பாரு..!
-
களங்கமற்ற குழந்தை போல
கலகலப்பாய்ச் சிரித்து
குளங்கள் ஏரி நிரம்ப வைத்து
கொஞ்சும் அழகைப்பாரு..!
-
மருந்து போன்ற மூலிகையின்
மணம் சூழும் அருவி
தரையில் இறங்கி ஊர்கள் தோறும்
தவழும் அழகைப் பாரு..!
-
பவளம், முத்து, விளைச்சலாகும்
பரந்த கடலை நோக்கி
கவனத்தோடு தேடி ஓடும்
கடமை உணர்வைப் பாரு..!
-
கழனி செழிக்கப் பாயும் நதியில்
கழிவைக் கலக்க வேண்டாம்
உழவு மூலம் விளைச்சலாகும்
உணவும் நஞ்சாய் மாறும்
-
கட்டுப்பட்டு நடக்கும் நதியில்
குப்பை கொட்ட வேண்டாம்
கட்டும் அணையில் சேமிப்பதால்
காலத்துக்கு உதவும்..!
-
அக்கரைக்கு தோணி ஒன்று
அழைத்துச் சென்றதுண்டு
இக்கரைக்கும் அக்கரைக்கும்
இன்று பாலம் உண்டு..!

============================

>சி.விநாயகமூர்த்தி
நன்றி: சிறுவர்மணி - தினமணி- 23-4-11