மறு பக்கம்

by **அ.இராமநாதன்** Mon May 09, 2011 2:13 pm

-
முற்றும் இல்லறத்தை விட்டு துறவறப் பாதையில் செல்பவனிடம்
சற்றும் மறக்கவொட்டாமல் அதையே புலம்பித் தீர்க்கும் மனிதர்கள்!
-
சித்தம் செப்பனிட வாழ்வில் பொருளாசையை ஒதுக்கியவனிடம்
நித்தம் காசு பெருகிட வழி கேட்கும் விந்தையான மனிதர்கள்!
-
திருமணம் வேண்டாம் என்று விலகித் தனியாக வாழ்பவனிடம்
மறுமணம் பற்றிக் கேட்டுத் துளைக்கும் பெண்ணாசைக் கணவர்கள்!
-
மறுபிறவி அறவே அகன்றிட இப்பிறவியில் சேதி சொல்பவனிடம்
எப்பிறவியிலும் மருமகளைப் பற்றியே புலம்பும் மாமியார்கள்!
-
மதி பெருக்கிட வாரீர் எனக் கூவி அழைப்பனிடம், இருக்கும்
நிதி பெருக்கிட வழி முறை பகன்றிட வினவும் பேராசைக்காரர்கள்!
-
காட்டிற்குச் சென்று தன்னந்தனியே அமைதியாய் வாழும் போதும்
நாட்டை, அக்காட்டை அழித்து , இட்டு வரும் இயற்கை எதிரிகள்!
-
நடப்பது யாவும் அவன் செயலே எனத் திண்ணமாக உரைப்பனிடம்
கடந்தவை, நடப்பவை, வருபவை யாண்டுக்கும் அலைபாயும் மனதினர்!
-
உண்மையை உணர்ந்து இவர்கள் வாழப்போவது எப்பொழுது?
உண்மையில் துறவியாகி அறிவினை வழங்குவேன் அப்பொழுது..!
-
===================================================
>திரு உறையோன்
நன்றி: தமிழ்முரசு 30-1-11