பூஜைக்கான மலர்....

by பிரேமலதா Fri May 20, 2011 5:33 pm

மழைச் சாரலின் மாலை நேரம்
வானவில்லின் வண்ணங்கள் இதயத்தினுள்

ஊரறிந்த உறவுகள் வீட்டிற்குள்
எனக்கான உறவோ என் மனக் கூட்டிற்குள்

இதழோர புன்னகையோடு - உன்
காதலின் கனம் என் நினைவுகளில்

விழிகளின் விளிம்பில் - நீ
பதிந்த முத்தம் கவிதையாய்...

என் உள்ளங்கை ரேகையில் - நீ
வரைந்த உனது பெயர் காவியமாய்...

தலையில் நீ வைத்துவிட்ட தாழம்பூ
தன்நிலைவிட்டு; உன் நிலை காட்டுகிறது

நெற்றியின் நடுவில் நீ தீட்டிய
குங்குமம் குருதியாய் உறைந்திருக்க...

சொந்தங்கள் கூடி சொற்போர் புரிகின்றன
என்னை யாருக்கோ சொந்தமாக்க!

பந்தங்கள் கூடி பரிசளிக்கின்றன
எனை பரிசம் போட்டு பாதியாக்க!

எத்தனை ஜென்ம பந்தம் நம் காதல்!
ஈரமாய் நம் ஜீவனுக்குள்ளே ஜீவிக்க

உனதானவள் நான் என்பதறிந்தும் - என்
பெண்மை தீண்டா உன் தூய்மையையும்

புனிதமான நம் காதலையும் காத்து நிற்கும்
உன் கண்ணியத்தின் தன்மையை

தரகு கொடுத்து வரவு வாங்கும்
இந்த அறிஞர்களிடம் எப்படி புரியவைப்பது?

மலர்களின் வாசனையில் இந்த
நந்தவனம் நனையலாம் - ஆனால் அது

நந்தவனத்திற்குச் சொந்தமில்லை
மலர்கள் சேருமிடம் தெய்வத்தின் சந்நிதி

எனக்கான தெய்வம் நீ...
உன் பூஜைக்கான மலர் நான்...