பீஜிங்:சீனாவில், குற்றவாளிகளை பொது இடத்தில் வைத்து அவமானப்படுத்தும் சம்பவங்கள் அதிகரித்து வருகின்றன. இதற்கு மனித உரிமை அமைப்புகள் கடும் எதிர்ப்பு தெரிவித்துள்ளன.கடந்த 1966ம் ஆண்டு, சீனாவில் மாவோ தலைமையில் புரட்சி வெடித்தது. புரட்சியை அடக்குவதற்கு, போலீசார் நூதன வழிமுறையை கையாண்டனர். குற்றவாளிகள் போன்று, பொது இடத்தில் புரட்சியாளர்களை வைத்து அணிவகுப்பு நடத்தி அவர்களை அவமானப்படுத்தினர்.

இந்த நிலையில், குற்றவாளிகள் மற்றும் குற்றவாளிகளாக கருதப்படும் நபர்களை, பொது இடங்களில் வைத்து அவமானப்படுத்தி தண்டனை கொடுக்கும் நூதன முறை தற்போதும் அங்கு தொடர்கிறது. இதை அந்நாட்டு அரசு சட்டவிரோதமான செயல் என்று அறிவித்தபோதும், போலீசார் அதை கைவிடுவதாக இல்லை. சமீபகாலமாக அங்கு குற்றவாளிகள் மற்றும் குற்றவாளிகளாக கருதப்படுபவர்களை, பொது இடத்தில் வைத்து அவமானபடுத்தும் நிகழ்ச்சிகள் தொடர்கதையாகி உள்ளன.

இது, சர்வதேச மனித உரிமை ஆர்வலர்கள் மத்தியில், கடும் அதிருப்தியை ஏற்படுத்தி உள்ளது.கடந்த எட்டு மாதங்களுக்கு முன், சான்சி மாகாணத்தை சேர்ந்த துவன் திங்மேய் என்ற கிராமவாசி உள்ளூர் அரசு ஊழியர் மீது, உயரதிகாரிகளிடம் புகார் கொடுத்தார். புகார் மீது நடவடிக்கை எடுக்காததால், பீஜிங்கில் உள்ள போலீஸ் தலைமை அலுவலகத்தில் புகார் கொடுக்க வந்தார். அவரை போலீசார் உடனடியாக சொந்த ஊருக்கு வலுக்கட்டாயமாக திருப்பி அனுப்பிவிட்டனர். ஊருக்கு திரும்பிய துவனுக்கு அதிர்ச்சி காத்திருந்தது. அரசு ஊழியர் மீது பொய் புகார் கொடுத்ததாக கூறி, கிராமத்தார் முன்பு போடப்பட்டிருந்த சிறிய மேடையில் ஏற்றி, அவரை போலீசார் தலையை பிடித்து தள்ளி அவமானப்படுத்தினர்.

இதுகுறித்து துவன் கூறுகையில்,"போலீசார் என்னை கொடிய குற்றவாளிபோல் நடத்தினர்'என்றார்.இதேபோன்று, கடந்த சில நாட்களுக்கு முன், அரசு கட்டுமானத் திட்டங்களை செயல்படுத்தவிடாமல் சீர்குலைக்கும் முயற்சியில் ஈடுபட்டதாகவும், சட்டம் ஒழுங்கு பிரச்னைக்கு ஊறு விளைவித்ததாகவும் கூறி சான்சி மாகாணத்தை சேர்ந்த ஒரு பெண் உட்பட, 18 பேரை போலீசார் ஆயிரக்கணக்கான விவசாயிகளுக்கு மத்தியில் வைத்து அவமானபடுத்தினர். அவர்களது கழுத்தில் பெயர் எழுதிய மரப்பலகைகளும் தொங்கவிடப்பட்டிருந்தன.

பொருளாதாரத்தில் சீனா வல்லரசு நாடுகளுக்கு சவால் விடும் வகையில் வளர்ந்து வரும் நிலையில், போலீசாரின் இதுபோன்ற பழமைவாத தண்டனைகள், மனித உரிமை ஆர்வலர்கள் மத்தியில் கடும் அதிருப்தியை ஏற்படுத்தி உள்ளன. இதுபோன்ற செயல்கள் சட்டவிரோதமானது என அந்நாட்டு கோர்ட்டும் அறிவித்துள்ளது.ஆனாலும் போலீசார் இதை விடுவதாக இல்லை.இதுகுறித்து கருத்து தெரிவித்த அரசு அதிகாரிகள் சிலர்,"சில குற்றங்களை தடுப்பதில் எங்களுக்கு பல நடைமுறை சிரமங்கள் உள்ளன. இதுபோன்று வித்தியாசமான தண்டனைகள் மூலம் மட்டுமே, சில குற்றங்களை தடுக்க முடியும். இதன்மூலம் மற்றவர்களும் குற்றங்களை செய்ய தயங்குவர்' என்றனர்.சீனாவில், இந்த ஆண்டு மட்டும் இதுபோன்று 20 சம்பவங்கள் நடந்துள்ளதாக, அந்நாட்டு ஊடகங்களில் தகவல்கள் வெளியாகி உள்ளன.

நன்றி ,தினமலர்

ஒ கோ