விக்கிலீக்ஸின் கைகளில் சுவிஸ் ரகசியம்

by lakshman Fri Jun 17, 2011 12:24 pm

எந்திரன் சி.டி., நித்யானந்தா சி.டி. எல்லாம் தமிழக அளவில் பரபரப்பை கிளப்பியவை. அவற்றையெல்லாம் தூக்கி சாப்பிடும் வகையில் ஒட்டுமொத்த உலகையும் பரபரப்பு பற்றிக்கொள்ள வைத்திருக்கிறது விக்கிலீக்ஸின் ‘சுவிஸ் பேங்க்’ சி.டி. ‘அடங்க மறு அத்துமீறு’ என்பதற்கு நம் விடுதலைச் சிறுத்தைகளைவிட பொருத்தமானவர் விக்கிலீக்ஸ் ஜுலியன் அசான்ஜ்தான்.

அமெரிக்காவின் ராணுவ ரகசியங்களை வெளியே விட்டதற்காக சமீபத்தில் கைதாகி வெளியே வந்த அசான்ஜின் கைகளில் இப்போது ஸ்விஸ் வங்கியில் பணம் போட்டு வைத்திருக்கும் கறுப்புப் பணக்காரர்கள் பட்டியல்.

இந்தத் தகவல் பரவத் தொடங்கியதுமே இந்தியாவில், குறிப்பாக தமிழகத்தில் யார் யாருக்கு ஸ்விஸ் பேங்க்கில் அக்கவுன்ட் இருக்கிறது என்ற எதிர்பார்ப்பு மக்களிடம் எகிறத் தொடங்கியிருக்கிறது. அதேவேளை, நம்ம பேரு இதுல வெளியாகிடுமோ என்று பல அரசியல் முதலைகளும் அஞ்சிக் கொண்டிருக்கிறார்கள்.

சுவிட்சர்லாந்து நாட்டில் உலகின் கறுப்புப் பணத்தை போட்டு வைக்க நிறைய வங்கிகள் அந்நாட்டு அரசின் அனுமதியுடனேயே செயல்படுகின்றன. இதில்தான் அந்நாட்டுக்கு முக்கிய வருவாய் ஆதாரமே இருக்கிறது.

அந்த வகையில் ஜூலியர் பேயர் என்ற தனியார் ஸ்விஸ் வங்கியில் தலைமை செயல் அலுவலராக பணியாற்றி விலகிய ருடோல்ஃப் எல்மர் என்ற அதிகாரி, கடந்த திங்களன்று விக்கிலீக்ஸ் ஆசிரியர் அசான்ஜை சந்தித்து இரண்டு சி.டி.க்களை கொடுத்தார். அதுதான் உலக உருண்டையின் அனைத்து மீடியாக்களிலும் பரபரப்பாக விவாதிக்கப்-பட்டுவருகிறது.

உலகின் பல நாடுகளில் இருந்து தொழிலதிபர்கள், அரசியல்வாதிகள், நிதி நிறுவனங்கள் என 2 ஆயிரம் அக்கவுன்ட்களின் விவரம் இந்த சி.டி.க்களில் இருக்கிறது.

‘‘இது முழுமையாக வெளியிடப்படும் என்ற நிபந்தனை-யுடன்தான் இந்த சி.டி.க்களை விக்கிலீக்ஸிடம் கொடுத்திருக்கிறேன். அவர்-களின் உறுதிப்பாட்டில் நம்பிக்கை வைத்துதான் இதை செய்திருக்-கிறேன்’’ என்று கூறியிருக்கிறார் எல்மர். இது தேச துரோகம் (!?) என்று எல்மர் மீது வழக்கு போட்டிருக்கிறது சுவிஸ் அரசாங்கம்.

கறுப்புப் பணம் வைத்திருப்-பவர்களின் பட்டியலை வெளியிட-வேண்டும் என்று உலகம் முழுவதும் கோரிக்கைகள் கிளம்பியதை அடுத்து, கடந்த 2009-ல் சில விவரங்களை வெளியிட்டது சுவிஸ் பேங்க்குகளின் கூட்டமைப்பு. அதில் உலகின் மற்ற நாடுகளைக் காட்டிலும் அதிக அளவு கறுப்புப் பணத்தை பதுக்கி வைத்திருப்பது இந்தியர்கள்தான் என்று குறிப்பிட்டது.

டாப் 5 கறுப்புப் பண நாடுகளின் பட்டியலில் ஆயிரத்து நானூற்று ஐம்பத்தாறு பில்லியன் டாலருடன் முதலிடம் வகிக்கிறது இந்தியா. ஒரு பில்லியன் என்றாலே நூறு கோடி ரூபாய் என்று அர்த்தம். அப்படியென்றால் ஆயிரத்து நானூற்று ஐம்பதாயிரம் கோடி பில்லியன் என்றால்... அதுவும் அமெரிக்க டாலர் என்றால்... அதை கணக்கு போட்டு முடிப்பதற்குள் நம் கைகாசை போட்டு குளுகோஸ் ஏற்றிக்கொள்ளவேண்டும். இப்படி கறுப்புப் பணத்தைக் கணக்கு போட்டுப் பார்ப்பதற்கே இந்தியனுக்கு களைப்பு தட்டும் அளவுக்கு இந்திய அரசியல்வாதிகளும், முதலாளிகளும் சுவிஸ் பேங்க்கில் போட்டு வைத்திருக்கிறார்கள்.

இதனால்தான் வேறெந்த நாடுகளை விடவும் இந்தியாவில் இதுபற்றி அறிய மக்கள் ஆர்வமாகவும், அரசியல்வாதிகள் அச்சமாகவும் இருக்கிறார்கள்.

இந்நிலையில் மூத்த வழக்கறிஞர் ராம்ஜெத்மலானி, ‘‘இந்தியாவிலிருந்து சுமார் 70 லட்சம் கோடி ரூபாய் அளவுக்கு கறுப்புப் பணம் ஜெர்மனி, சுவிஸ் உள்ளிட்ட வெளிநாட்டு வங்கிகளில் முதலீடு செய்யப்பட்டிருக்கிறது. முதலீடு செய்தவர்களின் விவரங்களை இந்திய அரசு வெளியிடவேண்டும்’’ என்று கோரி உச்ச நீதிமன்றத்தில் வழக்கு தொடுத்தார்.

இதையடுத்து மத்திய அரசு, சிலரது பெயர்கள் அடங்கிய பட்டியலை உச்ச நீதிமன்றத்துக்கு சீல் இடப்பட்ட கவரில் கொடுத்து, ‘இவற்றை வெளியிட்டால் இந்தியாவின் இமேஜுக்கு ஆபத்து வர வாய்ப்புள்ளது. எனவே பெயர்களை வெளியிடவேண்டாம்’ என்று கேட்டுக்கொண்டது.

சுவிஸ் பேங்க் பூதம் விக்கிலீக்ஸ் வழியாக வெடித்திருக்கும் நிலையில், இவ்வழக்கு ஜனவரி 19-ம் தேதியன்று விசாரணக்கு வந்தது.

அப்போது, ‘‘வெளிநாட்டு வங்கிகளில் கணக்கு வைத்திருப்-பவர்களின் பெயரை அறிந்து கொள்ள இந்திய மக்களுக்கு உரிமை இல்லையா? இதில் ஏன் மத்திய அரசு தயக்கம் காட்டுகிறது? இது சீரியஸான விஷயம்’ என மத்திய அரசை மொத்தி எடுத்திருக்கிறது உச்ச நீதிமன்றம். பி.ஜே.பி. தலைவர் நிதின் கட்கரியும் மத்திய அரசை இந்த விஷயத்தில் தாக்கி வருகிறார்.

இந்நிலையில் ‘விக்கிலீக்ஸ் சி.டி.க்களில் அடங்கியுள்ள விவரங்கள்’ என சிலவற்றை வெளியிட்டு ஆங்கில சேனல்கள் அனலை உற்பத்தி செய்துவருகின்றன. இதுபற்றி சில சேனல்காரர்களிடம் பேசியபோது, ‘‘இந்தியாவில் கறுப்புப் பண பட்டியலை வெளியிட-வேண்டிய பொறுப்புகளில் உள்ளவர்களே அந்தப் பட்டியலில் இருக்கிறார்கள். தமிழ்நாட்டிலிருந்து மூன்று கட்சிகள் சார்பில் சுவிஸ் பேங்க்கில் கணக்கு வைத்திருக்கிறார்கள். எதிரெதிர் முகாம்களில் இருக்கும் இவர்கள் ஸ்விஸ் பேங்க்கில் கணக்கு வைத்திருப்பதில் மட்டும் கூட்டணி வைத்திருக்கிறார்கள்.

குறிப்பாக சொல்ல வேண்டுமானால், தமிழ்நாட்டைச் சேர்ந்த செவத்த உடம்புக்காரருக்கு சுவிஸ் பேங்க்கில் அக்கவுன்ட் இருக்கிறது. டெல்லியில் பிஸியாக இருந்தும்கூட இதற்கெல்லாம் எப்படி நேரம் இருந்தது என்று தெரியவில்லை’’ என்கிறார்கள் திகில் கலந்த ஆச்சரியத்துடன்.

கிராமங்களில் காத்து கருப்பு அடிச்சா விபூதி போடுவார்கள். இந்த ‘கறுப்பு’க்கு அந்த ஆண்டவனால் கூட ஒன்றும் பண்ண முடியாது போல!

நன்றி : 2 ஜி சரிங்க பாஸ்