ஜூலை 5ந்தேதியிலிருந்து தபால் ஊழியர்கள் காலவரையற்ற வேலைநிறுத்தம்

சென்னை, ஜூன். 21-
தபால் துறையில், `கன்சல்டன்சி' என்ற பெயரில் தனியார் தலையீட்டை தடுக்கக்கோரி, அடுத்த மாதம் (ஜூலை) 5-ந் தேதியில் இருந்து காலவரையற்ற வேலைநிறுத்தம் அறிவித்து உள்ளனர்.

இதுபற்றி, தேசிய தபால் ஊழியர் சம்மேளன (என்.எப்.பி.இ.) பொது செயலாளர் எம்.கிருஷ்ணன், எப்.என்.பி.ஓ. பொதுசெயலாளர் டி.தியாகராஜன், அகில இந்திய அஞ்சல் 3-ம் பிரிவு ஊழியர்கள் சங்க பொதுச்செயலாளர் கே.வி.ஸ்ரீதரன் ஆகியோர் சென்னையில் நேற்று நிருபர்களிடம் கூறியதாவது:-

தபால் துறை சமூக நோக்கத்துடன் செயல்படும் துறையாகும். அகில இந்திய அளவில் மட்டுமின்றி உலக அளவில் இந்திய தபால் துறைக்கு தனி மதிப்பு உள்ளது. குக்கிராமங்களில் இருந்து, மெகா நகர் வரையில், ஏறக்குறைய 1.5 லட்சம் தபால் அலுவலகங்கள் உள்ளன. இவற்றில் ஏறக்குறைய 5.5 லட்சம் அஞ்சல் ஊழியர்கள் அர்ப்பணிப்பு உணர்வுடன் செயல்பட்டுவருகிறார்கள். மத்திய அரசின் தாராளமய கொள்கை அறிவிப்புக்குப்பின் தொழில் துறை மட்டுமின்றி அரசின் பொதுத்துறைகளிலும் எண்ணற்ற மாற்றங்கள் தலைதூக்கத்தொடங்கிவிட்டது.

சமீப காலமாக தபால் துறையிலும் தனியார் நுழையும் அளவுக்கு நிலைமை வளர்ந்துள்ளது. தபால் துறையின் நிர்வாக வசதிக்கான `கன்சல்டன்சி' என்ற பெயரில், அமெரிக்காவைச் சேர்ந்த `மெக்கன்சி' நிறுவனத்தை மத்திய அரசு ஒப்பந்தம் செய்துள்ளது தொலைத்தொடர்புத்துறை மந்திரியாக இருந்த ஆ.ராசா பதவியில் இருந்தபோது, இந்த ஒப்பந்தம் போடப்பட்டுள்ளது. இதற்காக, தபால் துறை, ஆண்டுக்கு 12 கோடி ரூபாய் மெக்கன்சி நிறுவனத்துக்கு வழங்க வகை செய்யப்பட்டுள்ளது. ஆலோசனை வழங்குகிறோம் என்ற பெயரில், மெக்கன்சி நிறுவனம் காலெடுத்து வைத்ததும், நாடு முழுவதும் உள்ள தபால் நிலையங்களில் பெரும்பாலானவற்றுக்கு மூடுவிழா நடத்தி உள்ளது. தமிழ்நாட்டில் நூற்றுக்கும் மேற்பட்ட தபால் நிலையங்கள் மூடப்பட்டுள்ளன. நாடு முழுவதும் இன்னும் 10 ஆயிரம் தபால் நிலையங்களை மூட வேண்டும் என்று வாய்மொழி உத்தரவு பிறப்பிக்கப்பட்டுள்ளது. அதைத்தொடர்ந்து, ரயில்வே மெயில் சர்வீஸ் (ஆர்.எம்.எஸ்.) மீது கைவைக்கப்பட்டது. அதன்பின், ஊழியர் குறைப்பு என்ற பெயரில், தபால் பட்டுவாடாவில் கைவைத்தது. காலை, மாலை என இரு முறை இருந்த தபால் பட்டுவாடா ஒரே முறை என மாற்றியது. இவைமட்டுமின்றி ஸ்பீடு போஸ்டில் கைவைத்ததால் நிலைமை மிக மோசமாகி உள்ளது. 24 மணி நேரத்தில் செல்லவேண்டிய தபால்கள் 72 மணிநேரம் கழித்துசெல்லும் அளவுக்கு டெலிவரி சிஸ்டம் முடங்கிப்போனது. சென்னை பூங்கா நகர் தபால் நிலையத்துக்கு மட்டும் ஸ்பீடு போஸ்டு மூலம் கிடைக்கவேண்டிய வருமானத்தில், கடந்த ஆண்டு 30 லட்சம் ரூபாய் நட்டம் ஏற்பட்டுள்ளது. ஒட்டுமொத்தமாக, தபால் துறையில் தமிழ்நாட்டுக்கு மட்டும் கடந்த 6 மாதங்களில் 30 கோடி ரூபாய் நட்டம் ஏற்பட்டுள்ளது.

மெக்கன்சி நிறுவனத்தின் செயல்பாடுகளால், தபால் துறைக்கு விமோசனம் கிடைக்காது, தனியார் கூரியர் நிறுவனங்கள் முழு அளவில் காலூன்றவே இது வழி வகுக்கும். மெக்கன்சி நிறுவனத்தின் செயல்பாடுகளுக்கு, என்.எப்.பி.இ., எப்.என்.பி.ஓ. உள்ளிட்ட அனைத்து தொழிற்சங்கங்களும் கடும் எதிர்ப்பு தெரிவித்தது. நிலைமை இப்படியே போனால், தொலைத்தொடர்புத்துறை சந்தித்துவரும் 2ஜி ஸ்பெக்ட்ரம் ஊழலைப்போல், தபால் துறையும் வெகு விரைவில் மெகா ஊழலை சந்திக்க நேரிடும். அது மட்டுமின்றி தபால் துறை அடியோடு சீரழிந்துவிடும். மெக்கன்சி நிறுவனத்திடமிருந்து தபால் துறையை காப்பாற்றவேண்டும் என்றும், அதனுடன் போடப்பட்டுள்ள ஒப்பந்தத்தை விலக்கி கொள்ளவேண்டும் என்று பல முறை கேட்டோம். எங்கள் கோரிக்கை ஏற்கப்படவே இல்லை.

இந்த நிலையில், எங்கள் கோரிக்கையை முன்வைத்து, அடுத்த மாதம் ஜூலை 5-ந்தேதியில் இருந்து காலவரையற்ற வேலை நிறுத்தம் செய்ய உள்ளோம். இதற்கான `ஸ்டிரைக் நோட்டீஸ்' முறைப்படி கொடுத்துள்ளோம். மத்திய அரசு இந்த விசயத்தில் உடனடியாக தலையிட்டு எங்கள் கோரிக்கையை நிறைவேற்ற வேண்டுகிறோம். பதவி உயர்வுக்கோ, சம்பள உயர்வுகோரியோ நாங்கள் இந்த வேலை நிறுத்த போராட்டத்தை அறிவிக்கவில்லை. காலம்காலமாக சமூக நோக்கத்துடன் மக்கள் சேவையில் ஈடுபட்டுள்ள தபால் துறையை தனியார் தலையீட்டில் இருந்து விடுவிக்க வேண்டும். இதுவே ஒட்டுமொத்த தபால் ஊழியர்களின் வேண்டுகோள் ஆகும். இவ்வாறு அவர்கள் கூறினார்கள்.

நடக்கட்டும்