பென்னாகரம்: பென்னாகரம் அருகே அரசு மாதிரிப்பள்ளியில் ஆசிரியர்கள் பணிக்கு வராத நிலையில், மாணவர்கள் மட்டுமே கடந்த ஒரு வாரமாக பள்ளிக்கு வந்து செல்கின்றனர். தர்மபுரி மாவட்டம் பென்னாகரம் அருகே சின்னம்பள்ளியில் கடந்த 2009-2010ம் கல்வியாண்டில் புதிதாக மாதிரிப் பள்ளி தொடங்கப்பட்டது. மத்திய அரசு நிதியுதவியுடன் தொடங்கப்பட்ட இந்த பள்ளியில் 6ம் வகுப்பு முதல் 12ம் வகுப்பு வரை உள்ளன. இதில் பென்னாகரம், கொப்பலூர், கலப்பம்பாடி, சின்ன கடைமடை, அரக்காசன அள்ளி, பெரும்பாலை மற்றும் சுற்றுவட்டார பகுதிகளைச் சேர்ந்த மாணவ, மாணவிகள் படித்து வருகின்றனர். முதல் ஆண்டில் 200 மாணவ, மாணவிகள் படித்தனர். இந்த ஆண்டு 160 மாணவ, மாணவிகள் படித்து வருகின்றனர். பள்ளி தொடங்கியதும் 3 ஆசிரியர்கள் நியமிக்கப்பட்டு பாடம் நடத்தினர். பள்ளிக்கு கூடுதல் கட்டிடங்கள் கட்ட இடம் தேர்வு செய்யப்பட்டுள்ளது. ஆனால் இதுவரை கட்டுமானப் பணி தொடங்கவில்லை. இந்நிலையில், இந்த ஆண்டு ஆசிரியர்கள் யாரும் பள்ளிக்கு வரவில்லை. ஆசிரியர்கள் விடுப்பு எடுத்துள்ளார்களா என்பதும் மாணவர்களுக்கு தெரியவில்லை. பள்ளி தொடங்கி ஒரு வாரம் ஆகியும் ஆசிரியர்கள் வராததால் மாணவ, மாணவிகள் அதிர்ச்சியடைந்துள்ளனர். அருகில் உள்ள அரசு பள்ளியில் இருந்து ஒரு ஆசிரியர் மட்டும் தினமும் காலையில் பள்ளிக்கு வந்து மாணவர் வருகையை பதிவு செய்து விட்டு சென்று விடுகிறார். மற்ற நேரங்களில் மாணவர்கள் மட்டுமே பள்ளியில் இருக்கின்றனர். ஆசிரியர்கள் இல்லாததால் புதியதாக மாணவர் சேர்க்கையும் நடைபெறவில்லை. இது குறித்து தர்மபுரி மாவட்ட கல்வி அலுவலர் (பொறுப்பு) ஆறுமுகம் கூறுகையில், ‘விசாரித்து நடவடிக்கை எடுக்கப்படும்‘ என்கிறார்.

நன்றி : தினகரன்

" longdesc="90" />

கொடுமை