கவிதை கவிதாயினி ச.சந்திரா

by **eraeravi** Thu Nov 11, 2010 12:11 pm

மிதி வண்டி
ஏழைகளின் புஷ்ப வாகனம் நீ
சிறார்களின் சொர்க்க வாகனம் நீ
எத்தனை முறை மிதித்தாலும்
எதிர்த்தே பேசாத
மௌன வாகனமும்நீயே!
உண்ணாமலேயே உழைக்கும்
உன்னத வாகனமும் நீதான் !
இயந்திரம் இல்லாமலேயே
சுழலும் இரும்பு வாகனமாம்
மிதிவண்டியே 1உன் சிறப்பு
இவ்வுலகில் எதற்குண்டு?
சுமைகளையெல்லாம் தயங்காமல்
சுமந்து செல்லும் மிதிவண்டியே !
நீ எதிர்க்காற்றுக்கு மட்டும்
அஞ்சிப் பின் வாங்குவது ஏனோ?

நாற்காலி -

மேசைக்கு அந்தப்புறம்
உனக்கு ஒரு மதிப்பு !
மேசைக்கு இந்தப்புறம்
உனக்கு வேறு மதிப்பு !
உன்னை வைத்தல்ல
நாற்காலியே !உனக்கு மதிப்பு !
நீ இருக்கும் இடத்தை
வைத்தேஉனக்கு மதிப்பு !
நீ சுழன்றாலோ உனக்கு
தனி மதிப்பு !நாற்காலியே !
மனித அத்தியாயத்தின்
இறுதி நாளில் கூட
உயிரற்ற ஜீவனைச் சுமக்கும்
மனிதாபிமானம் கொண்ட நீ
சில நேரங்களில் மின்சார
நாற்காலியாய் உருமாறி
தூக்குத்தண்டனைக்கு
துணைபோவதும் ஏனோ ?

தங்கம்

பொருளாதாரத்தை அளவிடும் அடிக்கோல்
தகுதியை நிர்ணயிக்கும் அளவுகோல்
திருமண வாழ்வின் திறவுகோல்
ஆபரண மாளிகையின் மந்திரக்கோல்
வார்த்தையாய் வலம் வரும்போது நீ அன்புக்கோல்
செல்வந்தருக்கு உறவுக்கோலாய் இருக்கும் தங்கமே !
நீ ஏழைகளுக்கு மட்டும் ஏன் இன்னும்
மரணக்கோலாய் இருக்கின்றாய் ?
கவிதாயினி ச.சந்திரா கவிதை கவிதாயினி ச.சந்திரா 289723