[You must be registered and logged in to see this image.]

ஒரு தலைசிறந்த கனடியக்
குடிமகனும், அரசியல்வாதியுமான கனடாவின் புதிய ஜனநாயகக் கட்சியின் தலைவர்
திரு. ஜாக் லேட்டனின் திடீர் மறைவையொட்டி கனடிய தமிழர் பேரவையும் அதனது
அங்கத்தவர்களும் ஆழ்ந்த கவலையும் இழப்பும் அடைந்துள்ளனர்.

ஜாக்
என்று எல்லோராலும் செல்லமாக அழைக்கப்பெற்ற திரு. லேட்டனின் நாட்டுப்
பற்றும், புதிய குடிவரவாளர்களுக்கும், வறுமைக் கோட்டுக்கு கீழே வாழும்
மக்களுக்காக அவர் பாடுபட்ட சேவையுணர்வும் அளப்பரியது.

கனடா வாழ்
தமிழர்களின் மனதில் ஜாக் ஒரு சாதாரண பாராளுமன்ற உறுப்பினராக இடம்பெறவில்லை.
அவரை எல்லோரும் அல்லலில் உதவிபுரியும் ஒரு சிறந்த நண்பராகவே கருதி
வந்தோம்.

[You must be registered and logged in to see this image.]










இரண்டு வருடங்களுக்கு முன்பு திரு. லேட்டனும் அவரது புதிய
ஜனநாயகக் கட்சியும் இணைந்து ஈழத் தமிழர்களுக்கு உதவிபுரிய வேண்டி கனடிய
பாராளுமன்றத்தில் ஒரு அவரச விவாதப் பிரேரணையை கொண்டுவந்தமை நாம்
மறக்கமுடியாது.

அத்துடன் அண்மையில் வான்கூவர் நகரில் நடந்த புதிய
ஜனநாயகக் கட்சியின் கொள்கை மகாநாட்டில் இலங்கையில் தமிழ் மக்களுக்கு
நடந்துகொண்டிருக்கும் துர்செயல்களை விசாரிக்க ஐக்கிய நாடுகள் சபை ஒரு
பாரபட்சமற்ற விசாரணைக் குழுவை நியமிக்க வேண்டுமெனவும் தீர்மானம் எடுத்தனர்.











அண்மையில் நடந்த புதிய ஜனநாயகக் கட்சியின் வருடாந்த மகாநாட்டில்
பங்குபெற்றபோது, இலங்கையின் போர்க் குற்றவாளிகளை அடையாளம் கண்டு நீதிமன்றம்
முன் நிலைநிறுத்த கனடிய தமிழர் பேரவை முயற்சியெடுப்பது பற்றி திரு.
லேட்டன் ஆழ்ந்த ஈடுபாட்டை வெளிப்படுத்தினார்.

[You must be registered and logged in to see this image.]

திரு.
ஜாக் லேட்டன் தமிழர் சமூக நிகழ்வுகளில் பங்குபெறுவதை பெருமையுடனும்
பெருமகிழ்வுடனும் ஏற்றுக்கொண்டார். கடந்த வருடம் நடந்த கனடியத் தமிழர்
நடைபவனி மற்றும் கனடிய தமிழர் பேரவையின் வருடாந்த இராப்போசன விருந்தில்
திரு. லேட்டன் ஆற்றிய சிறப்புரைகள் மறக்க முடியாதவை.

கனடிய
தமிழர்கள் முற்போக்கு அரசியலில் ஈடுபடுவதை என்றும் ஊக்குவித்தார் திரு.
லேட்டன். முதல் கனடியத் தமிழ் பாராளுமன்ற உறுப்பினரான செல்வி. ராதிகா
சிற்சபேசன், திரு. லேட்டனின் தலைமையின் கீழ் உருவானவர் என்பது யாவரும்
அறிந்ததே.

[You must be registered and logged in to see this image.]

திரு. லேட்டனின் அறிவு, ஊக்குவிப்பு, பண்பான ஆலோசனைகளால் கனடிய தமிழ் சமூகம் அடைந்த பயன்கள் அளப்பரியாதவை.

திரு. ஜாக் லேட்டனின் மறைவால் துயருறும் அவரது மனைவி திருமதி ஒலிவியா
சோவ், அவரது பிள்ளைகளான சாரா, மைக்கல் மற்றும் அனைத்துக்
குடும்பத்தினருக்கும் கனடா தமிழர்கள் சார்பில் கனடிய தமிழர் பேரவை தமது
ஆழ்ந்த அனுதாபங்களையும் கவலையையும் தெரிவித்துக் கொள்கின்றோம்.


ஏழை மக்களின் முன்னேற்றத்திற்காகவும் நாட்டின் மேம்பாட்டுகாகவும் தினம்
தினம் வாழ்ந்து போராடிய திரு. லேட்டன் தனதன்புக் கனேடியர்களுக்கென
செதுக்கிய கடைசிச் செய்தி எம்மை மெய்சிலிர்க்கவைக்கின்றது:

“எனது நண்பர்களே!

கோபத்தைவிட அன்பு மேன்மையானது. பயத்தைவிட நம்பிக்கை மேன்மையானது.
விரக்தியைவிட நன்னம்பிக்கை மேன்மையானது. எனவே அன்புடனும்
நன்னம்பிக்கையுடனும் வாழ்ந்து இவ்வுலகில் ஒரு மாற்றத்தை உருவாக்குவோம்.” - ஜாக் லேட்டன்