நெல்லை அருகே உள்ள மேலகுன்னத்தூர் கிராமத்தைச் சேர்ந்தவர் திருமலை (35) பிரபல ரவுடி. இவர் மீது கடந்த 2009-ம் ஆண்டு கூட்டுறவு பாங்கி கேசியர் பால்சாமி என்பவரை வெட்டிக்கொலை செய்த வழக்கு, பல்வேறு கொலை முயற்சி வழக்கு, அடிதடி வழக்குகள் உள்ளன.

இது தொடர்பாக நெல்லை டவுண் போலீசார் இவரை குண்டர் தடுப்பு சட்டத்தின் கீழ் கைது செய்து சிறையில் அடைத்திருந்தனர். கடந்த 2 மாதத்திற்கு முன்புதான் ஜெயிலில் இருந்து திருமலை ஜாமீனில் வெளியே வந்தார். இன்று காலை 7.30 மணி அளவில் திருமலை மோட்டார் சைக்கிளில் நெல்லை டவுனுக்கு வந்து கொண்டிருந்தார்.




கல்லணை பள்ளி அருகே உள்ள மெயின் ரோட்டில் வந்த போது 3 மோட்டார் சைக்கிள்களில் வந்த கும்பல் அவரை வழிமறித்தது.

நிலைகுலைந்த திருமலை மோட்டார் சைக்கிளை போட்டுவிட்டு அருகில் உள்ள தெருவில் புகுந்து ஓடினார். ஆனால் அந்த கும்பல் அவரை ஓட ஓட விரட்டி சரமாரி வெட்டியது.

நீள கொடுவாளால் அவரை தலையை ஆடு அறுப்பது போல் வெட்டி அறுத்தது. இதில் அவரது தலை துண்டாகி இறந்தார். தலை அவர் மடியில் விழுந்தது. அதன் பிறகு அந்த கும்பல் அங்கிருந்து தப்பி ஓடியது.

சம்பவ இடத்துக்கு மாநகர போலீஸ் கமிஷனர் வரதராஜூ, துணை கமிஷனர் ஜெயபாலன், உதவி கமிஷனர் ஸ்டாலின் ஆகியோர் விரைந்து சென்று விசாரணை நடத்தினார்கள்.

தீவிர விசாரணை நடத்தியதில் பல திடுக்தகவல்கள் கிடைத்தன. கடந்த 2009-ம் ஆண்டு மேல குன்னத்தூரில் தாமிரபரணி நீரிணைப் பயன்படுத்தும் விவசாயிகள் சங்க தேர்தல் நடந்தது. இதில் அந்த பகுதியை சேர்ந்த 2 பிரிவினர் போட்டியிட்டனர். இதில் ஒரு தரப்பினருக்கு ஆதரவாக கூட்டுறவு வங்கியில் கேசியராக பணிபுரிந்த பால்சாமி என்பவர் செயல்பட்டு வந்தார்.

இது மற்றொரு எதிர்தரப்பினருக்கு ஆதரவாக செயல்பட்டு வந்த திருமலைக்கு கடும் ஆத்திரத்தை ஏற்படுத்தியது. இதனால் கடந்த 2009-ம் ஆண்டு பால்சாமியை திருமலையும், அவரது ஆதரவாளர்கள் 11 பேரும் சேர்ந்து வெட்டிக் கொலை செய்தனர்.


இந்த கொலை வழக்கு நெல்லை கோர்ட்டில் நடந்து வருகிறது. பால்சாமியின் கொலைக்கு பழிக்குப்பழி வாங்க அவரது ஆதரவாளர்கள்தான் இன்று காலை மோட்டார் சைக்கிள்களில் வந்து திருமலையை கொடூரமாக வெட்டி கொலை செய்து விட்டு தப்பி ஓடியது தெரிய வந்தது.

தப்பி ஓடியவர்களை போலீசார் தீவிரமாக தேடிவருகிறார்கள்.

நன்றி : நக்கீரன்