இணையத்தளத்தில் ஏமாற்றுக் காதலர்களின் வலையில் விழும் பிரித்தானியர்கள்!

பிரித்தானியாவில் 200,000 பேர் இணையத்தளத்தில் ஏமாற்றுக் காதலர்களின் வலையில் விழுகின்றார்கள் என தெரிவிக்கப்பட்டுள்ளது.

பெரும்பாலும் சிப்பாய்களினதும் மொடல்களினதும் களவாடப்பட்ட படங்களைப் பயன்படுத்திப் போலியான அடையாளங்களை உருவாக்கியே இவர்கள் மற்றவர்களைக் காதல் வலையில் விழவைக்கின்றார்கள்

இதற்கு காதல் வலைத்தளங்களையும் Facebook போன்ற சமூக வலைத்தளங்களையும் இவர்கள் பயன்படுத்துகின்றார்கள்.

முதலில் இவர்கள் தமது வலையில் விழுபவரோடு நீண்ட கால உறவு வைத்துக் கொள்வார்கள். பின்னர் திடீரெனத் தமக்கு அவசர தேவையாகப் பணம் தேவைப்படுகின்றது என்றும் உதவுமாறும் கேட்டுக்கொள்வர்.

ஆய்வாளர்களைப் பொறுத்தவரையில் வலையில் விழுந்தவர்களுக்குச் சந்தேகம் எழமுன்னர் ஆயிரக்கணக்கான பவுண்களை அவர்கள் கையளித்திருப்பர்.

இந்த ஆய்வினை லெய்செஸ்ரர் பல்கலைக்கழகத்தின் ஆய்வாளர்களும் வெஸ்ற்மினிஸ்ரர் பல்கலைக்கழகத்தின் ஆய்வாளர்களும் இணைந்து ஒன்லைன் ஆய்வை YouGov தளத்தில் மேற்கொண்டனர்.

இதில் ஏமாற்றப்பட்டவர்கள் பலர் காவற்றுறைக்கு முறையிட்டிருந்தாலும் வேறுசிலர் இந்தக் காதல் தொடரலாம் என்ற நப்பாசையிலும் தாம் ஏமாற்றப்பட்டு விட்டோம் என்பதை வெளியில் சொல்ல முடியாமலும் முறையிடாமல் உள்ளார்கள்.