என் பெயர் காற்று

by arivusumi Sun Oct 09, 2011 8:01 am

நான் பொதுவாக
அமைதியானவன்.
அனைவரிடத்தும் அன்பு செலுத்துபவன்.
கடமையில் தவறாதவன்.

எனைப் பாடாத புலவர்கள்
இம்மண்ணில் பிறந்ததில்லை.
எனை நேசிக்க மறுத்து
இம்மண்ணில் யாரும் வாழ்ந்ததில்லை.

மனித நாகரிக
வளர்ச்சியில் என் பங்கு பெரிது.
என்னால் தான் மனிதன்
உலகை அறிந்தான்.

எனைத் தடுத்து நிறுத்த
யாரும் இன்னும் பிறக்கவில்லை.
நான் ஆர்ப்பரித்தெழுந்தால்
அடங்கிப் போகும் பூமி.

மண்ணில் படுத்து உறங்குபவனும்
மாளிகையில் படுத்து உறங்குபவனும்
இருவரும் எனக்கு சமம் தான்.

அனைவரிடத்தும் செல்வேன்
அவர்களை ஆரத் தழுவி
ஆனந்தம் தந்து பின்
அகல்வேன்.

நானின்றி அணுவும் அசையாது.
சுத்தமாய் நானிருந்தால் தான்
சுகமாய் மனிதன் உயிர்வாழ முடியும்.

என்னை அசுத்தப் படுத்தும்
மனிதர்களே...!
நிறுத்திக் கொள்ளுங்கள்.
இல்லையேல்
உம்மூச்சுக் காற்றை நான்
நிறுத்த வேண்டியதிருக்கும்.

ஆம்.
என் பெயர் காற்று.