கங்கை அவள் கண்ணுக்குள்..

by **அ.இராமநாதன்** Mon Oct 10, 2011 10:44 am

கம்பராமாயணத்தில் ஒரு காட்சி.

இராமனது வெற்றிச் செய்தியைச் சீதையிடம்
சொல்கிறான் அனுமன்.

ஆனந்தக் கண்ணீர் விடுகிறாள் சீதை. அனுமனோ
“அம்மா… உங்களைக் கொடுமைப்படுத்திய இந்த
அரக்கியரை அழிக்க இதுவே நல்ல தருணம்.
அனுமதியுங்கள்’ என்கிறான்.

அரக்கியர் சீதை பின் ஒளிகிறார்கள். சீதையோ
“இவர்கள் என்ன தவறு செய்தார்கள்? அவன்
சொன்னதைச் செய்தார்கள்? பாவம்… இவர்களை
விட்டு விடு’ என்று கண்ணில் கங்கையைப் பாய
விடுகிறாள்.

கண்ணகி, சீதை என்றில்லை.. இந்திய நாட்டில்
இருக்கும் ஒவ்வொர பெண்ணுமே கண்ணுக்குள்
ஒரு கங்கையைக் கட்டி வைத்துத்தான் வாழ்க்கை
நடத்துகிறாள்.

அந்தக் கங்கைகள் எத்தனையோ ஆண்களின்
பாவங்களைக் கழுவி இருக்கின்றன. அம்மாவாய்,
மனைவியாய், காதலியாய், தோழியாய், எத்தனை
எத்தனையோ ஆண்களின் பாவங்களை கழுவிய
கண்ணீர்க் கங்கைகள் பாய்ந்து கொண்டேதான்
இருக்கின்றன.

ஒட்டு மொத்த ஆண் குலத்தின் சகல பாவங்களையும்
கழுவக்கூடிய கங்கை ஒவ்வொரு பெண்ணின்
கண்ணுக்குள்ளும் இருக்கிறது. எல்லையே இல்லாத
இரக்கம்தான் பாவங்களைக் கழுவும் நிஜமான
அற்புத சக்தி.

அந்தக் கங்கை அவள் கண்ணுக்குள்!

கங்கா ஸ்நானம் ஆச்சா என்று கேட்டுக் கொள்கிற
ஆண்கள் பெண்மையின் நிஜமான கங்கை எங்கே
பாய்கிறது என்று தெரிந்து கொள்வது நல்லதல்லவா?

- சுகி. சிவம்

நன்றி: மங்கையர் மலர்