புதுடெல்லி : ஸ்பெக்டரம் பிரச்னை தொடர்பாக மத்திய தொலைத் தொடர்புத் துறை அமைச்சர் ஆ.ராசா நேற்றிரவு ராஜினாமா செய்தார். தி.மு.க. தலைமையின் உத்தரவுப்படி பிரதமர் மன்மோகன் சிங்கிடம் அவர் தனது ராஜினாமா கடிதத்தை கொடுத்தார். ஜி-2 ஸ்பெக்டரம் அலைவரிசை ஒதுக்கீடு பிரச்னையால் மத்திய தொலைத்தொடர்பு துறை அமைச்சர் ஆ.ராசாவை ராஜினாமா செய்யும்படி எதிர்க்கட்சிகள் வலியுறுத்தி வருகின்றன. இந்த பிரச்னையை நாடாளுமன்றத்தில் இன்று முதல் தீவிர மாக கிளப்பி, அவை அலுவல்களை முடக்க அவை திட்டமிட்டு உள்ளன.

இந்த பிரச்னை தொடர்பாக நேற்று முன்தினம் இரவும், நேற்று காலையும் சென்னையில் தி.மு.க. தலைவர் கருணாநிதியை ஆ.ராசா சந்தித்துப் பேசினார். பின்னர், நேற்றிரவு டெல்லிக்கு அவர் புறப்பட்டுச் சென்றார். அங்கு பிரதமர் மன்மோகன் சிங்கை சந்தித்து தனது ராஜினாமா கடிதத்தை கொடுத்தார். தி.மு.க. தலைமையின் உத்தரவுப்படி, ஆ.ராசா ராஜினாமா செய்தார்.

இது தொடர்பாக தி.மு.க. தலைமை அலுவலகம் நேற்றிரவு வெளியிட்ட அறிக்கையில், ‘கடந்த 1999ம் ஆண்டு முதல் மத்திய அரசின் தொலைத்தொடர்புத் துறை எந்த முறையைப் பின்பற்றி ஜி&2 ஸ்பெக்டரம் ஒதுக்கீட்டை செய்து வந்ததோ, அதே முறையைப் பின்பற்றிய ஆ.ராசாவை அமைச்சர் பொறுப்பில் இருந்து விலக்க வேண்டும் என்று சில எதிர்க்கட்சிகள் திட்டமிட்டு நாடாளுமன்ற நடவடிக்கைகளை ஸ்தம்பிக்கச் செய்து வருகின்றன. நாடாளுமன்ற ஜனநாயக நடவடிக்கைகள் தொடர்ந்து நடைபெறவும், நாட்டு மக்களுக்கு தேவையான பிரச்னைகளில் விவாதித்து முடிவு எடுக்கவும் வழி வகுக்கும் வகையில், ஆ.ராசாவை அமைச்சர் பொறுப்பில் இருந்து இன்றிரவே விலகிக் கொள்ள வேண்டும் என்று தி.மு.க. முடிவு எடுத்து. அவருக்கு அறிவுறுத்தி உள்ளது. இது தொடர்பாக தி.மு.க. தலைவரும், முதல்வருமான கருணாநிதியின் விரிவான அறிக்கை தனியாக வெளியிடப்படும்.

இவ்வாறு அறிக்கையில் கூறப்பட்டு உள்ளது. பிரதமரிடம் ராஜினாமா கடிதம் கொடுத்தப் பிறகு நிருபர்களுக்கு பேட்டி அளித்த ஆ.ராசா, ‘‘அரசுக்கு தர்மசங்கடம் ஏற்படுவதை தடுக்கவும், நாடாளுமன்றம் அமைதியாக நடக்கவும் எனது கட்சித் தலைவர் கூறிய ஆலோசனையின்படி பதவியை ராஜினாமா செய்தேன். இப்படி செய்ததால், குற்றத்தை ஒப்புக் கொண்டதாக அர்த்தமில்லை. என் மீதான குற்றச்சாட்டுகளை சட்டப்படி சந்தித்து நிரபராதி என்பதை நிரூபிப்பேன்’’ என்றார்.

இந்நிலையில், குளிர்கால நாடாளுமன்ற கூட்டத் தொடரில் முக்கியமசோதாக்களை நிறைவேற்ற மத்திய அரசு முடிவு செய்துள்ளது. இது தொடர்பாக பிரதமர் மன்மோகன் சிங், காங்கிரஸ் தலைவர் சோனியா காந்தி ஆகியோர் கட்சியின் மூத்த தலைவர்களுடன் டெல்லியில் நேற்று ஆலோசனை நடத்தினர்.

நன்றி தினகரன் .