1. பிரம்மபுரம்: பிரம்மதேவர் படைப்புத் தொழிலைப் பெற வேண்டி பூசித்துத் திருவருள் பெற்றார். அதனால் "பிரம்மபுரம்' என பெயர் பெற்றது.

2. வேணுபுரம்: வேணு என்றால் மூங்கில். சூரபத்மனுக்கு அஞ்சிய இந்திரன் மூங்கில் உருவங்கொண்டு தவம் செய்தமையால், இறைவன் மூங்கிலாய் முளைத்து அருள்புரிந்தார். அதனால் "வேணுபுரம்' என பெயர் பெற்றது.

3. புகலி: சூராதியவுணர்கள் கொடுமையைத் தாங்க முடியாத அமரர்கள், கந்தவேளைத் தந்தருளுமாறு புகலிடமாகப் புகுந்தனர். அதனால் "புகலி' என பெயர் பெற்றது.

4. வெங்குரு: பிரம்மனால் இகழப்பட்ட அசுர குருவாகிய சுக்கிரன், நாரதருடைய உபதேசத்தின்படி வந்து பூசித்து தேவ குருவுக்கு இணையாகிய தகைமையைப் பெற்றார். நரகர்கள் தன்னைக் கொடியவன் என்று இகழும் பழி நீங்க யமன் வழிபட்டு, முன்னுணர்ச்சி பெற்று மௌன நிலை பெற்றான். இவற்றால் "வெங்குரு' என பெயர் பெற்றது.

5. தோணிபுரம்: உலகனைத்தும் அழியுமாறு கற்பாந்தத்தில் எழுந்த பெருவெள்ளத்தில் அழியாமல், பிரணவ உருவாகத் தோணிபோல் மிதந்தது. அதனால் "தோணிபுரம்' என்ற பெயர் பெற்றது.

6. பூந்தராய்: சங்க நிதி, பதும நிதி என்ற இரு நிதிகளின் அதிதேவதைகள் வேண்டுவோர் வேண்டியவற்றை மாறாது வழங்கும் வன்மையைப் பூந்தராயிருந்து பூசித்துப் பெற்றன. திருமால் வெண்பன்றி உருக் கொண்டு இரணியனைக் கொன்று பூமியைத் தரித்தார். இவ்விரு காரணங்களால் "பூந்தராய்' என்ற பெயர் பெற்றது.

7. சிரபுரம்: பாற்கடலில் தோன்றிய அமுதத்தை திருமால் தேவர்களுக்குப் பகிர்ந்தளிக்கும்போது, சிலம்பன் என்ற அசுரன் அமர வடிவு கொண்டு இருந்ததனைச் சூரியன் காட்ட, விஷ்ணு சட்டுவத்தால் வெட்டினார். அவனது சிரம் ராகுவாக நின்று பூஜித்து நவகிரகங்களில் ஒன்றாகப் பதம் பெற்றது. அதனால் "சிரபுரம்' என்ற பெயர் பெற்றது.

8. புறவம்: சிபிச் சக்கரவர்த்தியிடம் இந்திரன் பருந்தாகவும், அக்னிதேவன் புறாவாகவும் சென்று சோதிக்க, புறாவின் எடைக்கு நிகராக சிபி தன் உடலின் தசையறுத்து நிரப்பியும் போதாமை கண்டு துலையேறினான். அந்தப் பாவம் நீங்க புறாவாகிய தீக்கடவுள் பூசித்தான். அதனால், "புறவம்' என்ற பெயர் பெற்றது.

9. சண்பை: கபிலர் சாபத்தால் யாதவன் ஒருவன் வயிற்றுதித்த இரும்புலக்கையைப் பொடியாக்கிக் கொட்டிய துகள்கள் சண்பைப் புற்களாய் முளைத்தன. அப்புற்களைப் பிடுங்கி யாதவர்கள் ஒருவரை ஒருவர் அடித்து மாய்ந்தனர். அப்பழி போகுமாறு கண்ணனும் அம்முனிவரும் பூசித்தனர். அதனால் "சண்பை' என பெயர் பெற்றது.

10. காழி: காணிதன் என்ற நாகராஜனும், நடனத்தில் தோல்வியுற்ற காணியும் பூசித்து அருள் பெற்றனர். அதனால் "காழி' என பெயர் பெற்றது.

11. கொச்சை வயம்: ஆற்றினிடையே பராசர முனிவர் மச்சகந்தியைக் கலந்ததனால் உண்டா கிய கெட்ட நாற்றமும் பழியும் முனிவர்களது இகழ்வும் நீங்கும்படி பூசித்தார். அதனால், "கொச்சை வயம்' என்ற பெயர் பெற்றது. கொச்சை- தீ நாற்றம்; வயம்- சயம் (நீங்கியது).

12. கழுமலம்: உரோம முனிவர் பூசித்து ஞானோபதேசம் பெற்று உலகிலுள்ள உயிர் களின் மலங்களைக் கழுவும் வரம் பெற்றார். அதனால் "கழுமலம்' என பெயர் பெற்றது.