பாமகவிலிருந்து தி.வேல்முருகன் நீக்கம்: ஜி.கே.மணி அறிவிப்பு

by **அரசன்** Thu Nov 03, 2011 6:46 pm

பாமக தலைவர் ஜி.கே.மணி வெளியிட்டுள்ள அறிக்கையில்,

பாட்டாளி மக்கள் கட்சியைச் சேர்ந்த பண்ருட்டி சட்டப் பேரவைத் தொகுதியின் முன்னாள் உறுப்பினர் தி.வேல்முருகன் கடந்த 3 மாதங்களுக்கு முன்பு கடலூர் மாவட்ட நிருவாகிகள் கூட்டம் என்ற பெயரில் ஒரு கூட்டத்தைக் கூட்டினார்.

அதில் பங்கேற்ற 200க்கும் மேற்பட்டோரிடையே உரையாற்றிய வேல்முருகன், பா.ம.க. தலைமையை கடுமையாக விமர்சித்துள்ளார். தனி ஆளாக போராடி இயக்கத்தை தோற்றுவித்து, வளர்த்தெடுத்ததுடன் கல்வி மற்றும் வேலைவா ப்பில் பின்தங்கிய நிலையிலிருந்த மிக பிற்படுத்தப்பட்ட சமுதாயத்தினரின் முன்னேற்றத்திற்காக பல்வேறு போராட்டங்களை நடத்தியும், பலமுறை சிறைக்குச் சென்றும் 20 விழுக்காடு இடஒதுக்கீட்டை பெற்றுத் தந்த பா.ம.க. நிறுவனர் மருத்துவர் அய்யா அவர்களை நமது இயக்கத்தில் இதுவரை எவரும் பேசாத வகையில் மிகவும் அருவருக்கத்தக்க, இழிவான வார்த்தைகளால் வேல்முருகன் ஒருமையில் பேசியுள்ளார். இதைக்கேட்டு பொறுக்கமுடியாத பல நிருவாகிகள் கூட்டத்திலிருந்து வெளியேறினர். அதன்பிறகும் பா.ம.க. பொதுச் செயலாளர் வடிவேல் இராவணனைப் பற்றி தனிப்பட்ட முறையில் தரக்குறைவாக விமர்சித்துள்ளார். கட்சியின் தலைமை நிருவாகக் குழு உறுப்பினர்களையும் ஒட்டுமொத்த பாட்டாளி மக்கள் கட்சியையும் நா கூசும் வார்த்தைகளால், எவராலும் பொறுத்துக்கொள்ள முடியாத அளவிற்கு விமர்சித்திருக்கிறார்.

இதை தாங்கிக் கொள்ள முடியாத கடலூர் மாவட்ட நிருவாகிகள் பா.ம.க. நிறுவனர் மருத்துவர் அய்யாவை சந்தித்து இதுபற்றி முறையிட்டுள்ளனர். பா.ம.க. நிறுவனரையும், நிருவாகிகளையும் மிகக் கடுமையாக விமர்சித்துள்ள வேல்முருகனை இனியும் கட்சியில் வைத்திருக்கக்கூடாது என்றும், அவர் மீது கடுமையான நடவடிக்கை எடுக்க வேண்டும் என்றும் வலியுறுத்தினார்கள். எனினும் வேல்முருகன் மீது எந்த நடவடிக்கையும் எடுக்கப்படாததால், கடலூர் மாவட்ட நிருவாகிகள் மீண்டும் பா.ம.க. நிறுவனர் மருத்துவர் அய்யாவையும், கட்சியின் முக்கிய நிருவாகிகளையும் சந்தித்து, வேல்முருகனின் பேச்சு பதிவு செய்யப்பட்ட குறுந்தகட்டை கொடுத்து அதை பார்த்துவிட்டு நடவடிக்கை எடுக்கும்படி முறையிட்டனர்.

அந்தக் குறுந்தகட்டை பார்த்த மருத்துவர் அய்யா மற்றும் நிருவாகிகள் மிகுந்த மன வேதனைப்பட்ட போதிலும், வேல்முருகன் திருந்துவதற்கு வாய்ப்பளிக்க வேண்டும் என்ற நோக்கத்தில் அவர் மீது நடவடிக்கை எடுப்பதை தவிர்த்தனர். ஆனால், வேல்முருகனோ தனது போக்கை மாற்றிக் கொள்ளாமல் ஒருசில நிகழ்ச்சிகளில் பங்கேற்றதைத் தவிர வேறு கட்சிப் பணிகளிலும் ஈடுபடாமல் இருந்துவந்தார். உள்ளாட்சி தேர்தலிலும் பா.ம.க.விற்காக அவர் பணியாற்றவில்லை. மாறாக பொதுமக்களிடமும் கட்சியினரிடமும் பா.ம.க.வைப் பற்றியும் மருத்துவர் அய்யாவைப் பற்றியும் தொடர்ந்து இழித்தும் பழித்தும் பேசி வந்தார். இந்தச் செய்தி பரவியதால் பா.ம.க.வின் மாநில, மாவட்ட, ஒன்றிய நிருவாகிகளிடமும் தொண்டர்களிடமும் பெரும் கொந்தளிப்பு ஏற்பட்டது.

இந்த நிலையில்தான் கடந்த 30.10.2011 அன்று பா.ம.க.வின் தலைமை நிருவாகக் குழு கூட்டம் சென்னையில் நடைபெற்றது. அதில் பேசிய பா.ம.க. பொதுச் செயலாளர் வடிவேல் இராவணன், 3 மாதங்களுக்கு முன் நடைபெற்ற கூட்டத்தில் தம்மைப் பற்றி வேல்முருகன் பேசிய பேச்சின் முழு வடிவத்தையும் வேதனையுடன் படித்துக் காட்டினார். பா.ம.க.விற்காக ஆரம்பத்திலிருந்தே அர்ப்பணிப்பு உணர்வுடன் உழைத்துவரும் தம்மை எவரும் இப்படியெல்லாம் விமர்சித்ததில்லை என்றும், தம்மையும், மருத்துவர் அய்யா உள்ளிட்ட நிருவாகிகளையும் விமர்சித்த வேல்முருகன் மீது நடவடிக்கை எடுக்க வேண்டும் என்றும் கேட்டுக் கொண்டார். அவரது கருத்தை பா.ம.க. நிருவாகக் குழு உறுப்பினர்கள் அனைவரும் ஆதரித்ததுடன் எங்களைப் பற்றியும் அவதூறாக பேசிய வேல்முருகன் மீது நடவடிக்கை எடுக்க வண்டும் என்று வலியுறுத்தினார்கள்.

இதுகுறித்து கட்சி நிருவாகக்குழு விரிவாக விவாதித்து வேல்முருகனை கட்சியின் அடிப்படை உறுப்பினரிலிருந்து நீக்க முடிவு செய்தது. அதன்பின் 31.10.2011 அன்று நடைபெற்ற தலைமை நிருவாகக் குழு உறுப்பினர்கள் மாநிலத் துணைப்பொதுச் செயலாளர்கள் மற்றும் முக்கிய நிருவாகிகள் அடங்கிய கூட்டத்திலும் இதுகுறித்து விவாதிக்கப்பட்டது. அக்கூட்டத்திலும் வேல்முருகனை கட்சியிலிருந்து நீக்க வலியுறுத்தி தீர்மானம் நிறைவேற்றப்பட்டது.

இருப்பினும் வேல்முருகன் திருந்துவதற்கு இன்னொரு வாய்ப்பு அளிக்க வேண்டும் என்பதற்காக அவர்மீதான நடவடிக்கையை கட்சித் தலைமை நிறுத்தி வைத்திருந்தது. ஆனால், வேல்முருகன் பத்திரிகையாளர்களை அழைத்து பா.ம.க.வையும் அதன் தலைமையையும் இழித்தும் பழித்தும் பேட்டி கொடுத்தார். 2.11.2011 அன்று கடலூரில் கட்சி நிருவாகிகள் என்ற பெயரில், ஒரு கூட்டத்தை கூட்டிவந்து அவர்களிடையே கட்சி தலைமைக்கு சவால்விடும் வகையிலும், எச்சரிக்கும் வகையிலும் வேல்முருகன் பேசியது பற்றி நாளேடுகளிலும், தொலைக்காட்சிகளிலும் செய்திகள் வெளிவந்துள்ளன.

இதையடுத்துதான் வேல்முருகன் தொடர்ந்து பல மாதங்களாக கட்சிக்கு அவப்பெயர் ஏற்படுத்தும் வகையிலும், கட்சியின் கட்டுப்பாட்டை மீறி, கட்சிக்கு களங்கமும், கட்சி நலனுக்கு குந்தகமும் ஏற்படுத்தும் வகையிலும் செயல்பட்டுவருவதால் இனியும் பொறுத்துக்கொள்ள முடியாது என்ற நிலையில், கட்சியின் தலைமை நிருவாகக் குழு கூட்டம், முக்கிய நிருவாகிகள் கூட்டம் ஆகியவற்றில் நிறைவேற்றப்பட்ட தீர்மானங்களின் அடிப்படையில் அவர் கட்சியின் அடிப்படை உறுப்பினர் உட்பட அனைத்து பதவிகளிலிருந்தும் இன்றுமுதல் (3.11.2011) நீக்கப்படுகிறார். பா.ம.க. நிறுவனர் மருத்துவர் அய்யா, பா.ம.க. இளைஞரணித் தலைவர் மருத்துவர் அன்புமணி இராமதாஸ் ஆகியோரின் ஒப்புதலுடன் இந்த முடிவு எடுக்கப்பட்டிருக்கிறது. எனவே இவருடன் பா.ம.க.வினர் எந்தவிதத் தொடர்பும் வைத்துக்கொள்ள வேண்டாம் என்று கேட்டுக் கொள்ளப்படுகிறார்கள்.
இவ்வாறு ஜி.கே.மணி கூறியுள்ளார்.

தாங்க்ஸ் :http://www.nakkheeran.in/