கூடங்குளம் அணுமின் நிலைய பிரச்னைக்கு தீர்வு காண, மத்திய அரசு தீவிரமாக உள்ளது. மத்திய அரசின் 15 பேர் குழுவினரும், மாநில அரசின் ஆறு பேர் குழுவினரும், அடுத்த வாரம் போராட்டக் குழுவினரை சந்தித்துப் பேசவுள்ளனர். இந்த சந்திப்புக்கான ஏற்பாடுகள் குறித்து, தமிழக அரசின் தலைமைச் செயலருடன் அணுசக்தித் துறையின் தலைவர் தொடர்ந்து பேசி வருகிறார்.

இதுதொடர்பாக, டில்லியில் நிருபர்களிடம் பிரதமர் அலுவலக இணை அமைச்சர் நாராயணசாமி கூறியதாவது:கூடங்குளம் அணுமின் நிலைய பிரச்னையை தீர்க்க வேண்டும் என்பதில், மத்திய அரசு தீவிரமாக உள்ளது. பிரதமரை தமிழக அனைத்துக் கட்சி குழு சந்தித்து விட்டு சென்ற பின், தலைசிறந்த நடுநிலையான விஞ்ஞானிகளை கொண்ட 15 பேர் கொண்ட குழு அமைக்கப்பட்டது. தமிழக அரசின் சார்பிலும், ஆறு பேர் கொண்ட குழு அமைக்கப்பட்டுள்ளது.

இந்த இரண்டு குழுவினரும், போராட்டக் குழுவினருடன் அடுத்த வாரம் சந்தித்துப் பேசவுள்ளனர். இதற்கான ஏற்பாடுகள் முடுக்கி விடப்பட்டுள்ளன. இந்த சந்திப்புக்கான ஏற்பாடுகளை இறுதி செய்வதற்காக, தமிழக அரசின் தலைமைச் செயலருடன், இந்திய அணுசக்தித் துறையின் தலைவர் ஸ்ரீகுமார் பானர்ஜி தொடர்ந்து பேசி வருகிறார். ஒரு சில நாட்களில், சந்திப்புக்கான தேதி இறுதி செய்யப்படும்.

மோதல் இல்லை:கூடங்குளம் அணுமின் நிலையப் பிரச்னையில், மாநில அரசுடன் எவ்வித கருத்து வேறுபாடும் இல்லை. முழு ஒத்துழைப்பை மாநில அரசு தருகிறது. எனவே, பிரச்னைக்கு விரைவில் சுமுக தீர்வு கிடைத்துவிடும் என்ற நம்பிக்கை உள்ளது.
கூடங்குளத்தில் 1,000 வாட் மின் உற்பத்தித் திறனை கொண்ட முதல்கட்ட அணுமின் உலையின் பணிகள் எல்லாம், 98 சதவீதம் முடிந்து விட்டன. இரண்டாம் கட்ட அணுமின் உலையின் பணிகளும், 95 சதவீதம் வரை முடிந்துள்ளன. ரஷ்யாவின் வி.வி.ஆர்., தொழில் நுட்பத்துடன் கட்டப்பட்டுள்ள மின் நிலையம் இது என்பதால், பாதிப்பு வராது.

ஊழியர் பற்றாக்குறை:போராட்டக் குழுவினர் தொடர்ச்சியாக இடைஞ்சல் செய்து வருவதாலேயே, ஊழியர் பற்றாக்குறை ஏற்பட்டு, அங்குள்ள அணுமின் உபகரணங்கள் பழுதடைந்து பாதிப்பு ஏற்படலாம் என்பதில் உண்மையில்லை. மொத்தம் 200 பேர் வரை, பராமரிப்புப் பணிகளுக்காக தேவைப்படுகின்றனர். ஆனால், 150 பேர் வரை தான் தற்சமயம் உள்ளனர். இவர்களையும் உள்ளே விடாமல் செய்கின்றனர். இது ஏற்றுக் கொள்ள முடியாத ஒன்று.

கூடங்குளம் அணுமின் கழிவுகளை இங்கேயே வைத்திருக்கமாட்டோம். இதனால், நிச்சயம் பாதிப்புகள் வராது. இங்குள்ள கழிவுகளை, இங்கேயே கொட்டி வைத்திருக்காமல், அதை தாரப்பூர் உள்ளிட்ட வேறு இடங்களுக்கு கொண்டு செல்வதற்கான திட்டங்கள் தான் தீட்டப்பட்டுள்ளன. எனவே, அணுமின் கழிவு பயம் தேவையில்லை.
இவ்வாறு நாராயணசாமி கூறினார்.

நாராயணசாமி பிரதமர் அலுவலக இணை அமைச்சர் :காந்திய வழியில் போராடுவதாக போராட்டக் குழுவினர் கூறுகின்றனர். உண்மையில், நிலைமை அவ்வாறு இல்லை. அணுமின் நிலையத்தில் பணியாற்றும் அதிகாரிகள், ஊழியர்களுக்கு இடைஞ்சல் செய்கின்றனர். இவர்கள் தங்களது பணியைச் செய்ய முடியாத வகையில், மிகுந்த அச்சத்தை போராட்டக் குழுவினர் ஏற்படுத்தியுள்ளனர். அணுமின் நிலைய அதிகாரிகளும், ஊழியர்களும் பணிக்குச் செல்வதற்குக் கூட தடுக்கப்பட்டால், அது காந்தியவழி என்று கூற முடியாது.

நன்றி தினமலர்