சென்னை: தமிழகத்தில் துவங்கவிருக்கும் கூடன்குளம் அணுமின் நிலையத்தில் தற்போது வரை அணு சம்பந்தமான எந்த பணியையும் ஆரம்பிக்கவில்லை. இதே நேரத்தில் ஹாட் ரன் ' நிலை முடிந்து விட்டது . இதனால் அணு மின் நிலையத்தை மூட முடியாது என அணுசக்தி ஆணைய தலைவர் ஸ்ரீகுமார் பானர்ஜி சென்னையில் நிருபர்களிடம் கூறினார்.

செயலாக்கம், பாதுகாப்பு விஷயங்கள் குறித்து எடுத்துரைப்பதற்காக மத்திய அணுசக்தி ஆணையம்( ஸ்ரீகுமார் ) , மற்றும் அணுசக்தி கழகம் ( ஜெயின் ) தலைவர்கள் நேற்று சென்னை வந்தனர். தமிழக முதல்வர் ஜெ.,வை சந்திப்பார்கள் என தெரிவிக்கப்பட்டது. ஆனால் முதல்வர் அலுவலகத்தில் இருந்து உரிய நேரம் ஒதுக்கவில்லை. இதனால் இன்று சந்திப்பார்களா என்று எதிர்பார்க்கப்படுகிறது.

தலைமைச்செயலாளருடன் சந்திப்பு:சென்னை வந்த இந்திய அணுசக்தி கழக தலைவர் ஸ்ரீகுமார் பானர்ஜி, தமிழக தலைமைச்செயலாளரை சந்தித்து பேசினார். இதன் பின்னர் அவர் பத்திரிகையாளர்களுக்கு பேட்டியளிக்கையில், கூடங்குளத்தில் 99 சதவீத பணிகள் முடிவடைந்து விட்டன. கூடங்குளம் விவகாரம் தொடர்பாக போராட்டக்காரர்களுடன், மத்திய அரசு அமைத்த நிபுணர் குழு ஒரு வாரத்தில் பேச்சுவார்த்தை நடத்தப்படும். அணுஉலை தொடர்பான மக்களின் அச்சத்தை போக்க நடவடிக்கை எடுக்கப்பட்டு வருகிறது என்றும் கூறினார். அவர் மேலும் கூறுகையில்; தமிழகத்திற்கு இந்த திட்டம் முக்கியமானது. இது நி‌‌றைடேறும் பட்சத்தில் 6 ஆயிரம் மெகாவாட் மின்சாரம் கிடைக்கும். தற்போ‌து அணு சம்பந்தமான எவ்வித பணியும் நடக்கவில்லை. அதே நேரத்தில் ஹாட் ரன் ' நிலை முடிந்து விட்டதால் அணு உலையை மூட முடியாது. இன்னும் பணி துவக்காமல் இருந்தால் அங்கு இருக்கும் பொருட்கள் துருப்பிடிக்க ஆரம்பித்து விடும் என்றார்.

தமிழக அரசும் - மத்திய அரசும் கருத்தொற்றுமை இல்லை: கூடன்குளம் அணுசக்தி மையம் செயல்பட துவங்கி விபத்துக்கள் எதுவும் ஏற்பட்டால் பெரும் சேதம் ஏற்படுமோ என்ற பீதியில் அப்பகுதி மக்கள் பலக்கட்ட போராட்டங்களை நடத்தினர். இதில் தமிழக அரசும் மக்களுக்கு துணையாக இருக்கும் என்றார் முதல்வர் ஜெ., மேலும் இந்த அணுமின் நிலையம் தொடர்பான அச்சம் தொடர்பாக இதன் செயல்பாட்டை நிறுத்துவதுடன் மூடவும் வேண்டும் என ஜெ., மத்திய அரசுக்கு கடிதம் எழுதினார்.

இந்த அணுமின் நிலையம் பாதிப்பை ஏற்படுத்தாத வண்ணம் உயர் நுட்ப விஷயங்களுடன் அமைக்கப்பட்டுள்ளது. இத்துடன் மின்பற்றாக்குறையை சமாளிக்க அணுஉலை பெரிதும் அவசியமாக கருதப்படுகிறது என்றும் பிரதமரும் கருத்து தெரிவித்தார்.

இதனை தொடர்ந்து பிரதமர் அலுவலக இணை அமைச்சர் நாராயணசாமி சென்னை வந்தார். அதிகாரிகளுடன் ஆலோசனை நடத்தியதும், போராட்ட மக்களை சந்தித்து பேசினார். மேலும் மக்களின் அச்சத்தை போக்கிடவும் மக்களிடம் சந்தித்து இந்த விஷயத்தை தெளிவுபடுத்தவும் இதற்கிடையில் ஒரு குழு அமைக்கவும் முடிவு செய்யப்பட்டுள்ளது.

மத்திய அரசு சுமுக முறையில் கொண்டு சென்று அணுமின் நிலையத்தை திறப்பதற்கான வழிமுறை காணும் செயலில் ஈடுபட்டு வருகிறது, காரணம் 15 ஆயிரம் கோடி வீணாகி விடக்கூடாது என்பதே என்று மத்திய அரசு செயலர் ஒருவர் கூறினார்.

போராட்டம் தொடர்கிறது: இடிந்தகரை பகுதியில் மக்கள் இன்றுடன் 19 வது நாளாக போராட்டத்தை துவக்கியுள்ளனர். தூத்துக்குடி மாவட்டத்தில் விசைப்படகுகள் மற்றும் நாட்டு படகுகள் கடலுக்கு செல்லாமல் தங்களுடைய எதிர்ப்பை தெரிவித்து வருகின்றனர். இன்று கூடன்குளத்தில் கடைகள் அடைக்கபடுகிறது.


தூத்துக்குடியில் ஆர்ப்பாட்டம் : கூடன்குளம் அணு மின் நிலையத்திற்கு எதிர்ப்பு தெரிவித்து அணு சக்தி எதிர்ப்பு மக்கள் இயக்கத்தின் சார்பில் இன்று தூத்துக்குடியில் உள்ள அம்புரோஸ் பூங்கா அருகே ஆர்ப்பாட்டம் நடத்தினர். தூத்துக்குடி மறைமாவட்ட ஆயர் இவோன் அம்புரோஸ் துவக்கி வகித்தார். அணு சக்தி எதிர்ப்பு மக்கள் இயக்க அமைப்பாளர் உதயகுமாரன் தலைமை வகித்தார்.

நிரூபித்தால் தீ்க்குளிக்க தயார் : தூத்துக்குடி ஆர்ப்பாட்டத்தின்போது நிருபர்களிடம் பேசிய உதயகுமாரன் ; நாங்கள் வெளிநாட்டில் இருந்து காசுவாங்கி கொண்டு போராட்டம் நடத்துவதாக சிலர் தவறான செய்தியை பரப்பி வருகின்றனர். எங்களுக்கு எந்தவொரு வெளிநாட்டு அமைப்பில் இருந்தும் பணம் வரவில்லை. அப்படி இருப்பதாக நிரூபித்தால் நாங்கள் தீக்குளிப்போம் என்றார். மேலும் அணுசக்தி கழக தலைவர் ஜெயின் மற்றும் அதிகாரிகள் மீது வழக்கு தொடருவோம் என்றார்.

நன்றி தினமலர்