புதுடில்லி: டில்லி டெஸ்டில், பேட்ஸ்மேன்கள் சொதப்ப, இந்திய அணி முதல் இன்னிங்சில் 209 ரன்களுக்கு சுருண்டது. பந்துவீச்சில் மிரட்டிய வெஸ்ட் இண்டீஸ் அணி 116 ரன்கள் முன்னிலை பெற்றது.
இந்தியா வந்துள்ள வெஸ்ட் இண்டீஸ் அணி, மூன்று போட்டிகள் கொண்ட டெஸ்ட் தொடரில் பங்கேற்கிறது. முதல் டெஸ்ட், டில்லியில் உள்ள பெரோஷா கோட்லா மைதானத்தில் நடக்கிறது. முதல் நாள் ஆட்டநேர முடிவில் வெஸ்ட் இண்டீஸ் அணி 5 விக்கெட்டுக்கு 256 ரன்கள் எடுத்திருந்தது.
ஓஜா துல்லியம்:
நேற்று இரண்டாம் நாள் ஆட்டம் நடந்தது. ஓஜா "சுழலில்' கார்ல்டன் பாக் (27), கேப்டன் டேரன் சமி (5) அவுட்டாகினர். சதம் கடந்த சந்தர்பால் (118), கூடுதலாக 7 ரன்கள் மட்டும் எடுத்து, இஷாந்த் "வேகத்தில்' பெவிலியன் திரும்பினார். ரவி ராம்பால் (12), அஷ்வின் பந்தில் அவுட்டானார். பிடல் எட்வர்ட்ஸ் (10), ஓஜா பந்தில் வெளியேற, வெஸ்ட் இண்டீஸ் அணி முதல் இன்னிங்சில் 304 ரன்களுக்கு "ஆல்-அவுட்' ஆனது.
சுழலில் அசத்திய பிரக்யான் ஓஜா 6, அஷ்வின் 3 விக்கெட் கைப்பற்றினர்.
சேவக் அரைசதம்:
பின், இந்திய அணிக்கு சேவக், காம்பிர் ஜோடி சூப்பர் துவக்கம் அளித்தது. முதல் விக்கெட்டுக்கு 89 ரன்கள் சேர்த்த போது, துரதிருஷ்டவசமாக காம்பிர் (41) "ரன்-அவுட்' ஆனார். மறுமுனையில் அதிரடி காட்டிய சேவக், டெஸ்ட் அரங்கில் தனது 28வது அரைசதத்தை பதிவு செய்தார். இவர், 55 ரன்கள் (9 பவுண்டரி) எடுத்த நிலையில் பிஷூ சுழலில் சிக்கினார்.
யுவராஜ் வீண்:
அடுத்து வந்த "மிடில் ஆர்டர்' பேட்ஸ்மேன்கள், ஏனோதானோ என ஆடி வெறுப்பேற்றினர். அனுபவ சச்சின் (7), லட்சுமண் (1) விரைவாக வெளியேறினர். டெஸ்ட் போட்டிக்கு தான் லாயக்கில்லை என்பதை யுவராஜ் சிங் (23) மீண்டும் ஒத்துக் கொண்டார். கேப்டன் தோனி, அஷ்வின் "டக்-அவுட்' ஆக, இந்திய அணி 7 விக்கெட்டுக்கு 154 ரன்கள் எடுத்து தத்தளித்தது.
டிராவிட் அபாரம்:
இதற்கு பின் போராடிய "இந்திய பெருஞ்சுவர்' டிராவிட், அணியை ஓரளவுக்கு மீட்டார். டெஸ்ட் அரங்கில் தனது 61வது அரைசதத்தை பூர்த்தி செய்தார். இவருக்கு இஷாந்த் சர்மா (17) ஒத்துழைப்பு தந்தார். நிதானமாக ஆடிய டிராவிட் 54 ரன்கள் எடுத்திருந்த போது ராம்பால் வேகத்தில் அவுட்டானார். இந்திய அணி முதல் இன்னிங்சில் 209 ரன்களுக்கு சுருண்டது.
வெஸ்ட் இண்டீஸ் சார்பில் டேரன் சமி 3, ரவி ராம்பால், பிஷூ தலா 2 விக்கெட் கைப்பற்றினர்.
மோசமான துவக்கம்:
பின் 95 ரன்கள் முன்னிலையுடன், இரண்டாவது இன்னிங்சை துவக்கிய வெஸ்ட் இண்டீஸ் அணிக்கு பாவல் (0) மீண்டும் ஏமாற்றினார். முதல் இன்னிங்சில் அரைசதம் அடித்த பிராத்வைட் (2), இம்முறை சோபிக்கவில்லை. இரண்டாம் நாள் ஆட்டநேர முடிவில் வெஸ்ட் இண்டீஸ் அணி 2 விக்கெட்டுக்கு 21 ரன்கள் எடுத்து 116 ரன்கள் முன்னிலை பெற்றது.
கைவசம் நிறைய விக்கெட்டுகளை இருப்பதால், வெஸ்ட் இண்டீஸ் அணி வலுவான முன்னிலை பெற்று, இந்தியாவுக்கு கடும் நெருக்கடி கொடுக்க வாய்ப்பு உள்ளது.

எட்வர்ட்ஸ் "150'
நேற்றைய இரண்டாம் நாள் ஆட்டத்தில், இந்திய "மாஸ்டர் பேட்ஸ்மேன்' சச்சின் விக்கெட்டை கைப்பற்றிய, வெஸ்ட் இண்டீஸ் வேகப்பந்துவீச்சாளர் பிடல் எட்வர்ட்ஸ், டெஸ்ட் அரங்கில் தனது 150வது விக்கெட்டை பதிவு செய்தார். இதன்மூலம் இம்மைல்கல்லை எட்டிய 12வது வெஸ்ட் இண்டீஸ் பவுலர் ஆனார். முதல் மூன்று இடங்களில் வால்ஷ் (519 விக்.,), அம்புரோஸ் (405 விக்.,), மார்ஷல் (376 விக்.,) உள்ளனர்.

கீழே விழுந்த பராமரிப்பாளர்
நேற்றைய இரண்டாம் நாள் ஆட்டத்தின் தண்ணீர் இடைவேளையின் போது, பெரோஷா கோட்லா மைதான பராமரிப்பாளர் ஒருவர் கீழே விழுந்ததால் பரபரப்பு ஏற்பட்டது. வீரர்களுக்கு தண்ணீர் கொண்டு வரும் போது, திடீரென மைதானத்தில் விழுந்தார். இதனை கவனித்த வெஸ்ட் இண்டீஸ் வீரர்கள், மற்ற மைதான பராமரிப்பாளர்களுக்கு தகவல் கொடுத்தனர். அவருக்கு முத<<லுதவி அளிக்கப்பட்டது. மயக்கம் தெளிந்த நிலையில் அந்த நபர், தானாகவே நடந்து பெவிலியனுக்கு திரும்பினார்.

ரசிகர்கள் அதிகரிப்பு
டில்லி டெஸ்டின் இரண்டாம் நாள் ஆட்டத்தை காண, அதிக அளவில் ரசிகர்கள் வந்தனர். சுமார் 42 ஆயிரம் பேர் அமர்ந்து போட்டியை காணும் வசதி கொண்ட பெரோஷா கோட்லா மைதானத்திற்கு நேற்று 13, 451 பேர் வந்திருந்தனர். நேற்று அரசு விடுமுறை என்பதால் ரசிகர்களின் எண்ணிக்கை அதிகமானது எனக் கூறப்படுகிறது.

சச்சின் மீண்டும் ஏமாற்றம்
சச்சினுக்கு"சதத்தில் சதம்' என்பது எட்டாக் கனியாக உள்ளது. டில்லியில் நடக்கும் முதல் டெஸ்டின் முதல் இன்னிங்சில் 7 ரன்களுக்கு அவுட்டான இவர், மீண்டும் ஏமாற்றினார். கடந்த மார்ச் மாதம் தென் ஆப்ரிக்காவுக்கு எதிரான உலக கோப்பை (50 ஓவர்) தொடரின் லீக் போட்டியில் தனது 99வது சர்வதேச சதத்தை (48 ஒருநாள்+51 டெஸ்ட்) அடித்தார். அதன்பின் இவர் விளையாடிய நான்கு ஒருநாள் (2, 53, 85, 18 ரன்கள்), ஐந்து டெஸ்ட் (34, 12, 16, 56, 1, 40, 23, 91, 7 ரன்கள்) போட்டியில் ஒரு சதம் கூட அடிக்க முடியாமல் தவித்து வருகிறார்.

ஒரே நாளில் 17 விக்கெட்
நேற்றைய இரண்டாம் நாள் ஆட்டத்தில் பவுலர்களின் ஆதிக்கம் மேலோங்கி இருந்தது. மொத்தம் 17 விக்கெட் வீழ்த்தப்பட்டன. இதில் வெஸ்ட் இண்டீஸ் சார்பில் 7, இந்தியா சார்பில் 10 பேட்ஸ்மேன்கள் அவுட்டானார்கள்.

ஓஜா அபாரம்
நேற்று சுழலில் அசத்திய இந்திய வீரர் பிரக்யான் ஓஜா 6 விக்கெட் கைப்பற்றினார். இதன்மூலம் டெஸ்ட் அரங்கில், தனது சிறந்த பந்துவீச்சை பதிவு செய்தார். முன்னதாக கடந்த ஆண்டு நியூசிலாந்துக்கு எதிராக ஆமதாபாத்தில் நடந்த டெஸ்டில் 107 ரன்கள் கொடுத்து 4 விக்கெட் கைப்பற்றி இருந்தார். தவிர ஓஜா முதன்முறையாக ஐந்து அல்லது அதற்கு மேல் விக்கெட் சாய்த்துள்ளார்.
* தவிர, பெரோஷா கோட்லா மைதானத்தில் வெஸ்ட் இண்டீசுக்கு எதிராக சிறந்த பந்துவீச்சை பதிவு செய்த இந்திய பவுலர் என்ற சாதனை படைத்தார். முன்னதாக இங்கு, கடந்த 1983-84ல் முன்னாள் கேப்டன் கபில்தேவ் 77 ரன்கள் கொடுத்து 6 விக்கெட் கைப்பற்றினார்.

நன்றி தினமலர்