ஷார்ஜா: ஷார்ஜாவில் நடந்த பாகிஸ்தான், இலங்கை அணிகளுக்கு இடையிலான மூன்றாவது மற்றும் கடைசி டெஸ்ட் "டிரா' ஆனது. இதன்மூலம் பாகிஸ்தான் அணி 1-0 என தொடரை கைப்பற்றி கோப்பை வென்றது. மழை காரணமாக இலங்கை அணிக்கு ஏமாற்றமே மிஞ்சியது.
ஐக்கிய அரபு எமிரேட்ஸ் (யு.ஏ.இ.,) சென்றுள்ள பாகிஸ்தான், இலங்கை அணிகள் மூன்று போட்டிகள் கொண்ட டெஸ்ட் தொடரில் மோதின. அபுதாபியில் நடந்த முதல் டெஸ்ட் "டிரா' ஆனது. துபாயில் நடந்த இரண்டாவது டெஸ்டில் வெற்றி கண்ட பாகிஸ்தான் அணி 1-0 என தொடரில் முன்னிலை வகித்தது. மூன்றாவது டெஸ்ட் ஷார்ஜாவில் நடந்தது.
முதல் இன்னிங்சில் இலங்கை 413, பாகிஸ்தான் 340 ரன்கள் எடுத்தன. பின் இரண்டாவது இன்னிங்சை துவக்கிய இலங்கை அணி, நான்காம் நாள் ஆட்டநேர முடிவில் 5 விக்கெட்டுக்கு 164 ரன்கள் எடுத்து, 237 ரன்கள் முன்னிலை வகித்திருந்தது. பரணவிதனா (66), குலசேகரா (4) அவுட்டாகாமல் இருந்தனர்.
மழையால் பாதிப்பு:
நேற்றைய ஐந்தாவது மற்றும் கடைசி நாள் ஆட்டம் மழை காரணமாக தாமதமாக துவங்கியது. இரண்டாவது இன்னிங்சை தொடர்ந்த இலங்கை அணிக்கு குலசேகரா (7) ஏமாற்றினார். இரண்டாவது இன்னிங்சில் இலங்கை அணி 6 விக்கெட்டுக்கு 181 ரன்கள் எடுத்திருந்த போது "டிக்ளேர்' செய்தது. பரணவிதனா (76), ஹெராத் (1) அவுட்டாகாமல் இருந்தனர்.
கடின இலக்கு:
பின், 255 ரன்கள் எடுத்தால் வெற்றி என்ற கடின இலக்கோடு இரண்டாவது இன்னிங்சை துவக்கிய பாகிஸ்தான் அணிக்கு முகமது ஹபீஸ் (13) ஏமாற்றினார். அடுத்து வந்த அசார் அலி (7), யூனிஸ் கான் (11) சொற்ப ரன்களில் வெளியேறினர். சிறிது நேரம் தாக்குப்பிடித்த டபிக் உமர் (39) ஆறுதல் அளித்தார். இரண்டாவது இன்னிங்சில் பாகிஸ்தான் அணி 4 விக்கெட்டுக்கு 87 ரன்கள் எடுத்திருந்த போது, போதிய வெளிச்சமின்மை காரணமாக கடைசி நாள் ஆட்டம் முடிவுக்கு வந்தது. இதனால் இப்போட்டி "டிரா' என அறிவிக்கப்பட்டது. இதன்மூலம் மூன்று போட்டிகள் கொண்ட டெஸ்ட் தொடரை பாகிஸ்தான் அணி 1-0 என கைப்பற்றி கோப்பை வென்றது. ஆட்ட நாயகன் விருது இலங்கை அணியின் சங்ககராவுக்கு வழங்கப்பட்டது. தொடர் நாயகன் விருதை சங்ககரா (இலங்கை), சயீத் அஜ்மல் (பாகிஸ்தான்) பகிர்ந்து கொண்டனர்.

நன்றி தினமலர்