ஆஸ்ட்ரேலிய அணி மாற்றங்களின் இடைநிலையில் இருந்தாலும் இந்தியாவுக்கு எதிரான வரும் கோடைகால டெஸ்ட் தொடரை ஆஸ்ட்ரேலியா 2- 1 என்று வெற்றி பெறும் என்று முன்னாள் ஆஸ்ட்ரேலிய கேப்டன் ஸ்டீவ் வாஹ் தெரிவித்துள்ளார்.

டிசம்பர் 26ஆம் தேதி பாக்சிங் டேயில் மெல்போர்னில் முதல் டெஸ்ட் போட்டி துவங்குகிறது. மைக்கேல் கிளார்க் தலைமையில் இலங்கையில் டெஸ்ட் மற்றும் ஒரு நாள் தொடரைக் கைப்பற்றிய ஆஸ்ட்ரேலியா கடினமான தென் ஆப்பிரிக்காவில் ஒருநாள் தொடரை வென்று டெஸ்ட் தொடரை 1- 1 என்று டிரா செய்தது.

அடுத்ததகா நியூசீலாந்துடன் ஆஸ்ட்ரேலியா தங்கள் சொந்த மண்ணில் மோதுகிறது. இதனையடுத்து இந்தியா பயணம் மேற்கொள்கிறது.

"கூறுவது மிகக் கடினம் என்றாலும் ஆஸ்ட்ரேலியா இறுதியில் 2- 1 என்று வெல்லும்" என்றார் ஸ்டீவ் வாஹ்.

ஒரு அபாயம் உள்ளது, இந்த அணியில் அதிக திறமைகள் இருந்தாலும் இவர்கள் அனைவரும் ஒரு அணியாக இன்னமும் ஒன்று திரளவில்லை.

இந்திய அணி தோனியின் தலைமையின் கீழ் ஆஸ்ட்ரேலியாவை இந்த சமயத்தில் சொந்த மண்ணில் வீழ்த்தி விடும் மனோநிலையில் களமிறங்குவர் ஆனால் அது அவ்வளவு சுலபமல்ல.

இந்தியாவில் வந்து இந்திய நிலைமைகளில் ஆடுவது போல் அல்ல இது. ஆஸ்ட்ரேலிய ரசிகர்கள் ஒருதலைபட்சமானவர்கள், சூழ்நிலைமைகள் வருகை தரும் அணிக்கு எதிராகவே இருக்கும், பிட்ச்கள் எங்கள் பந்து வீச்சாளர்களுக்கே சாதகமாக இருக்கும். என்றார் ஸ்டீவ் வாஹ்.

2008ஆம் ஆண்டு தொடரில் ஏற்பட்டது போல் இரு அணிகளும் கசப்புணர்வுடன் விளையாடுமா என்ற கேள்விக்கு பதில் அளித்த ஸ்டீவ் வாஹ், "அது இப்போது வீரர்களின் மனதில் இருக்காது என்று கூற முடியும், சில சமயங்களில் வரலாறும் மரபும் உதவக்கூடும் ஆனால் நாம் நடந்ததை நினைத்துப் பார்க்கக்கூடாது.

இந்திய அணி கடந்த 15ஆண்டுகளில் சிறப்பாக வந்துள்ளது. அந்த அணி தற்போது ஒரு அபாயகரமான அணிதான். நான் விளையாடும்போது இந்தியாவும் ஆஸ்ட்ரேலியாவும் இரண்டு முதன்மை டெஸ்ட் அணிகளாக இருந்தன. இன்றும் அதே நிலை தொடர்வது மகிழ்ச்சியளிக்கிறது.

ஜாகீர் கான் அணியில் இல்லாமல் போனால் அது இந்தியாவுக்கு பெரிய இழப்பாகிவிடும், அவர் உலக அளவில் ஒரு அபாய்கரமான வீச்சாளராக கடந்த சில ஆண்டுகளாக திகழ்ந்து வருகிறார்.

சமீபத்தில் மேற்கிந்திய அணிக்கு எதிராக இந்தியா விளையாடியதை சிறிதளவு பார்த்தேன், உங்களிடம் உள்ள வேகப்பந்து வீச்சாளர்களான வருண் ஆரோன், உமேஷ் யாதவ் சிறப்பாகவே வீசுகின்றனர்.

அதேபோல் அஷ்வின், பிரக்யன் ஓஜா ஒரு சிறந்த கூட்டணியாக உருவாகியுள்ளனர். இந்த வீச்சாளர்களை ஆஸ்ட்ரேலிய வீரர்கள் பார்த்ததில்லை எனவே இது ஒரு புதிய அச்சுறுத்தலே.

இவ்வாறு கூறினார் ஸ்டீவ் வாஹ்.