முகமூடி.

by **அ.இராமநாதன்** Mon Dec 26, 2011 4:18 pm

அடுத்தவனை நசுக்க
ஆயத்தமாகையில்
பயங்கரவாத முகமூடி.

சபல முகமூடி, சாதி முகமூடி,
தமிழ் முகமூடி, கருணை முகமூடி,
இப்படி
முகமூடிகள் கணக்கு
முளைத்துக் கொண்டே இருக்கும்.

சிரிக்க ஒரு முகமூடியும்
அழ ஒரு முகமூடியும்

சில மனிதன்

வைத்திருக்கிறான்.

முகமூடி அணிந்து அணிந்து
முகம் மறந்த மனிதன்

ஏதாவது ஒரு முகமூடியையே

முகமாக்கிக் கொள்கிறான்.

கொடுமை என்னவென்றால்
குழந்தைப் பருவம் மட்டுமே

முகமூடி அணியாத பருவம்.

காந்தி முகமூடி

நேரு முகமூடி என்று

அதற்கும் பல

பொம்மை முகமூடிகளைப்

பொறுத்தி விடுகிறான்

எந்த சகமனிதனும்
எந்த சகமனிதனை

சந்திக்கப் போகையிலும்

முகமூடியில்லாமல் போவதேயில்லை.

எப்போது மனிதன்
முகமூடியைக் கழட்டுவான் ?

இறந்த பிறகா ?

ஆம்.
அந்த முடிவில்தான் மனிதன்

முகமூடியைக் கழட்டி விடுகிறான்.

அவன் உண்மை முகத்தை
முகமூடி அணிந்த மற்ற மனிதர்கள்

பார்த்துப் போவார்கள்.

ஆனால் அந்த நேரத்தில்
எல்லா மனிதர்களும் சேர்ந்து

” நல்லவன் ” என்ற முகமூடியை

அவனுக்கு அணிவித்து விடுகிறார்கள்.

– பா. விஜய் -
நன்றி : தமிழ்ச் சிறகு இலக்கிய மலர் – இதழ் எண் 16