சீனப்புது வருடமும், பஞ்ச பூதங்களும்

by **அ.இராமநாதன்** Wed Jan 25, 2012 8:58 am

[You must be registered and logged in to see this image.]

இந்த வருடம், சீனப் புது வருடத்தின் முதல் நாள் ஜனவரி 23ஆம்
தேதியன்று கொண்டாடப்படுகிறது. இந்த வருடம் சீன காலண்டர் படி
4709 ஆம் வருடம்.
-
சீனர்கள் தங்களது முதல் அரசனை "மஞ்சள் அரசன்' என்றும் அவன் கி.மு. 2697இல்
ஆட்சி பீடத்தில் ஏறினான் என்றும் அதன்படி 4708 வருடங்கள் முடிந்துவிட்டன
என்றும் நம்புகின்றனர். நம்முடைய தமிழ் புதுவருடத்துக்கும் இந்தச் சீனப் புது
வருடத்துக்கும் ஒரு ஒற்றுமை என்னவென்றால், அவர்கள் நம்மைப்போல
"60 சுழற்சி ஆண்டு' முறையைப் பின்பற்றுகிறார்கள்.
-
அதன்படி இந்த வருடம் "நீர் - கடல்நாகத்தின்' ஆண்டு. எலி, பசு, புலி, கடல்நாகம்,
பாம்பு, குதிரை இப்படி ஒவ்வொரு ஆண்டும் ஒரு விலங்கின் பெயரைக் கொண்டு அழைக்கப்படுகிறது. இந்த 60 வருடக் கணக்கு "தண்டு-பிரிவு' கணக்குப்படி
எண்ணப்படுகிறது. அதாவது ஆண்டுத் தண்டில் பஞ்சபூதங்கள் இருப்பதாகக் கொண்டு,
ஒவ்வொரு பூதத்துக்கும் 12 வருடம் மேனிக்கு 60 ஆகிறது. இந்த வருடத்திய
பஞ்சபூதம் "நீர்', விலங்கு "கடல் நாகம்'. இதில் ஒரு வித்தியாசம் என்னவென்றால்,
சீனர்களது பஞ்சபூதங்கள் நம்மிலிருந்து வேறுபடுகின்றன.
-
அவை "உலோகம்', "நீர்', "மரம்', "நெருப்பு', "பூமி'.
கடல் நாகம் ஒரு பழமையான உயிரினம். ஆகாயத்திலிருந்து பறந்து வந்ததாக
நம்புகிறார்கள். சீனர்களைப் பொறுத்தவரை "சொர்க்கலோக சக்தியின் மறுவடிவம்'
இந்தக் கடல் நாகம் என்று நம்புகிறார்கள். பண்டையக் காலத்தில் சீனமன்னர்
சொர்க்கத்திலிருந்து வந்ததாகக் கருதினர்.
-
கடல் நாகத்தை அழிக்கவல்ல ஆற்றல் பெற்றவர் இந்த மன்னர் மட்டுமே!
இந்தக் கடல் நாகத்துக்கு ஒன்பது ஆண் பிள்ளைகள் இருப்பதாக நம்புகின்றனர்.
ஒவ்வொரு மகனுக்கும் ஒவ்வொரு ஆர்வம், குணாதிசயம் என்று ஐதிகம். முதல்
மகனுக்கு இசை மீது ஆர்வம். இரண்டாமவன் போரிலும், மூன்றாமவன் சாகசங்களிலும்,
நான்காமவன் ஊளையிடுவதில் வல்லவர்கள். ஐந்தாவது அமைதி, நெருப்பு
இவற்றில் ஆர்வம் உள்ளவனாகவும், ஆறாவது வீரத்திலும், ஏழாவது நீதியிலும்,
எட்டாவது இலக்கியத்திலும், ஒன்பதாவது பிள்ளை நீர் சம்பந்தப்பட்ட
விஷயங்களில் ஆர்வமுள்ளவனாக இருப்பதாகவும் நம்புகிறார்கள்.
-
இந்த விலங்குகள், பஞ்சபூதங்கள் இவற்றைக் கொண்டே சீன ஜோஸ்யமும்
அமைக்கப்பட்டிருக்கிறது. உதாரணத்திற்கு, நீங்கள் "நாய்' வருடத்தில் பிறந்திருந்தால்,
இந்த வருடம் உங்களுக்குக் கொஞ்சம் சுமாராக இருக்குமாம்.
ஏனென்றால் நாய்க்கும், கடல் நாகத்திற்கு ஆகாதாம்.
-
அதேபோல, நீங்கள் "முயல்' வருடத்தில் பிறந்திருந்தால், இந்த ஆண்டு ரொம்ப
சூப்பராக இருக்குமாம். முயலும் கடல் நாகமும் நண்பேன்டா! மற்றபடி விவரமான
பலன்களுக்கு சீன ஜோஸ்யரையோ, இணையத்தில் சீன ஜாதகப் பலன்களையோ
வலைபோட்டுத் தேடித் தெரிந்துகொள்ளவும்!
-
நீளமான பீன்ஸ் நீண்ட ஆயுளைக் குறிக்கும் என்பதால், இந்த புது வருடத்தில்
சீன மக்கள் "நீள பீன்ஸ்களை' வெளுத்துக் கட்டுவார்களாம். ஏதாவது ஒரு சைனீஸ்
ரெஸ்டாரண்ட் போய் இந்த நீள பீன்ஸ் கிடைக்கவில்லையென்றால் குறைந்தபட்சம்
நீளமான நூடுல்ஸையாவது நீங்களும் சாப்பிட்டு ஆயுளை நீட்டிக் கொள்ளலாமே!
நம்பிக்கை தானே வாழ்க்கை!

====================================
>தி.சு.பா.
நன்றி: கல்கி
==============================================