பிள்ளைக் காதல் பாரதி

by **கவினா** Fri Jan 27, 2012 5:59 pm

ஏ! பாரதியே
அந்த சின்னவளை
நான்
தெரிந்து கொள்ளலாமா?
அட
உன்னவளை
நான் தெரிந்து கொள்ளலாமா?

ஒன்பதாம் வயதிலேயே
உன்னை திருடிச்சென்ற
அந்த ஊர்வசியை
நான்
யாரென்று தெரிந்து கொள்ளலாமா?

தீர்த்தகரைக்கு
வருவதாய் சொல்லி
வராமல் போன
அந்த கண்ணம்மாவை
யாரென்று சொல்.

உனக்கு திலகமிட்டதுமே
தீர்ந்துபோனாளென்றாயே
அந்த திலகவதி
யாரென்று சொல்.

திரையிட்டு முகத்தை
மறைத்து வைத்தல்
தில்லி துருக்கர்
செய்த வழக்கமென
சொல்லி திரிந்தவன்
நீதானே பாரதி.

கண்டுபிடிக்க முடியாத அளவிற்கு
உன் கண்மணியின் முகத்தை
ஏன் மறைத்தாய் பாரதி?

சின்னஞ்சிறு கிளியென்று
இத்தனை சின்னதாய்
தடயம் தந்தால்
எப்படி கண்டறிவதாம்
உன் கண்மணியை.

ஏ பாரதியே!
நீ பாட்டு கற்றுகொண்ட
அந்த பள்ளிக்கூடத்தை
நாங்கள்
பார்க்க வேண்டாமா?

தீக்குள்
விரலை விடும்போதுகூட
அவளை தீண்டுமின்பம்
தோன்றுவதாய் சொன்னாயே.
அந்த தித்திப்பானவளை
நாங்கள் தெரிந்து கொள்ள வேண்டாமா?

வெறும்
நினைவுகளால் மட்டுமே
உனது முப்பது வருடங்களை
நிரப்பி சென்றவளை
யாரென்று சொல் பாரதி.

கண்டதில்லை பாரதி
இதுவரை
நான் கண்டதில்லலை பாரதி.
உன்னைபோல்
ஒரு கண்ணிய காதலனை
கண்டதில்லை பாரதி.
இதுவரை
நான் கண்டதில்லை பாரதி.