நீயே தேடு - கதைப்பாடல்

by **அ.இராமநாதன்** Mon Mar 05, 2012 3:44 pm

-
அன்று ஒரு நாள் பள்ளியிலே
அனைத்து வகுப்பும் முடிந்தவுடன்
நன்றாய்ப் படிக்கும் நல்லதம்பி
நாடி வந்தான் ஆசானை!
-
'அய்யா எனக்கொரு சந்தேகம்
அதனைத் தீர்ப்பீர் அருள்கூர்ந்து'
என்றான், மகிழ்வாய் ஆசிரியர்
என்ன சொல், என நவின்றனரே!
-
'பாலும் நீரும் கலந்து வைத்தால்
பாலை மட்டும் குடிக்கின்ற
அன்னம் போல அவனியிலே
அறிவால் நல்லது தேடென்றீர்!
-
அன்னம் உண்டோ அறியேன் நான்
அப்படியானால் உலகத்தில்
இல்லாப் பொருளை எதற்காக
எடுத்துக்காட்டாய்ச் சொன்னீர்கள?
-
நன்றும் தீதும் பிரித்தறியும்
ஒன்று உலகில் கிடையாதா?
என்று கேட்டதும், சிரித்தபடி
'இதற்கா கவலைப்படுகிறாய்?
-
கோலப் பொடியும் சர்க்கரையும்
கலந்து தரையில் போட்டால்
வாழும் சிறிய எறும்புகளும்
வந்து எடுக்கும் சர்க்கரையை!
-
உலகம் இரண்டும் கலந்ததுதான்
உனக்குத் தேவை எதுவென்று
வளரும் நீயே தேடெ'ன்றார்
வணங்கி மகிழ்ந்தான் நல்லதம்பி!
-
==========================
.வளர்கவி,கோவை (கோகுலம், மார்ச், 2011)