சங்கரன் கோவில் இடைத் தேர்தலில் அதிமுக வேட்பாளர் முத்துச்செல்வி

மிகப்பெரிய வாக்கு வித்தியாசத்தில் முன்னிலையில், இவரை எதிர்த்துப் போட்டியிட்ட ஏனைய கட்சி வேட்பாளர் அனைவரும் டெபாசிட் இழந்த நிலையில், இறுதி வெற்றி வாய்ப்பு அவருக்கே என்னும் நிலை தோன்றியிருப்பதாகவும், தமிழகச் செய்திகள் தெரிவிக்கின்றன. இந்த இடைத்தேர்தல், அதிமுகவுக்கு என்ற கட்சிக்கு ஒரு இடைத்தேர்தல் என்பதிலும் பார்க்க, அதிமுக பொதுச் செயலர் ஜெயலலிதாவுக்கு ஒரு கௌரவப் பிரச்சனையாக மாறியிருந்தது குறிப்பிடத்தக்கது.

கடந்த பொதுத் தேர்தலில் அதிமுகவின் கூட்டணிக் கட்சியாக இருந்து வெற்றி பெற்று, தற்போது தமிழக எதிர்க்கட்சியாக உள்ள தேமுதிக தலைவர் விஜயகாந்துடன் சட்டசபையில் ஏற்பட்ட வாக்குவாதத்தில், திராணியிருந்தால் சங்கரன் கோவில் இடைத் தேர்தலில் ஜெயித்துக் காட்டுங்கள் பார்க்கலாம் என்ற சவால் எழுந்தது. அதனால் சங்கரன் கோவில் முன்னாள் உறுப்பினர் அமைச்சர் கருப்பசாமி மரணமடைந்ததை அடுத்து அத் தொகுதிக்கான இடைத்தேர்தலாக அல்லாமல், அதிமுகவின் சவால் தேர்தலாக அமைந்தது. கடந்த 18-ந்தேதி நடந்த இத் தேர்தலில் அ.தி.மு.க. சார்பில் முத்துச்செல்வி, தி.மு.க. சார்பில் ஜவகர் சூரியகுமார், ம.தி.மு.க. சார்பில் சதன் திருமலைக்குமார், தே.மு.தி.க. சார்பில் முத்துக்குமார், பா.ஜ.க. சார்பில் முருகன் உள்பட 13 பேர் போட்டியிட்டனர்.

242 வாக்குச்சாவடிகளில் நடந்த இந்த தேர்தலில் மொத்தம் 1,59,760 வாக்குகள் பதிவாகின. இது 77.52 சதவீதம் ஆகும். மின்னணு வாக்குப்பதிவு எந்திரங்கள் பலத்த பாதுகாப்புடன் புளியங்குடி வீராச்சாமி செட்டியார் கல்லூரியில் வைக்கப்பட்டன. இன்று காலை 8 மணிக்கு ஓட்டு எண்ணிக்கை தொடங்கி,. முதலில் தபால் ஓட்டுகள் எண்ணப்பட்டன.

முன்னதாக தபால் ஓட்டுக்கள் எண்ணப்பட்டன. பதிவான 16 ஓட்டுக்களில் 13 ஓட்டுக்களை அதிமுக வேட்பாளரும், 3 ஓட்டுக்களை மதிமுக வேட்பாளரும் பெற்றனர். வாக்கு எந்திரங்களின் வாக்குகள் எண்ணப்படத் தொடங்கிய போது, முதலில் இருந்தே அதிமுக வேட்பாளர் முத்துச்செல்வி முன்னிலையில் இருந்து வந்தார்.

பிந்திக்கிடைத்த தகவல்களின்படி, அதிமுக - 64,619, திமுக -19,490, மதிமுக -15, 908, தேமுதிக - 8,400 என்ற நிலையில் இருப்பதாகவும், அதிமுகவுடன் நேரடிச் சவாலில் இருந்த, தமிழக சட்டசபையில் தற்போது இரண்டாவது நிலைக் கட்சியான, தேமுதிக இத் தேர்தலில் நான்காம் இடத்திற்குத் தள்ளப்பட்டிருப்பதாகவும் தெரிவிக்கப்படுகிறது.

பகிர்வுக்கு நன்றி