மாமாவின் மரணசெய்தி..

by suja13suja Fri Mar 30, 2012 11:44 pm

அதிகாலை வேளையில்
அலறி அழைத்த தொலைபேசியில் வந்தது
அன்பும் பாசமுமாய்
தோளில் தூக்கி வளர்த்த
மாமாவின் மரணசெய்தி ....
கணக்கிட்டது பல காரணங்களை
பணம் மட்டுமே பிரதானமென
மாறிவிட்ட பொருளாதார மனது...
பயணதூரம் கணக்கிடப்பட்டது முதலில்
தொலைவும் அதிகம் பணமும் விரயம்,
பிள்ளைகளின் படிப்பு பாழகுமோ ஒருநாள்?
எங்கள் வீட்டு துயரத்திற்கு
துக்கம் கேட்காமல் போனாரே!
அம்மாவும் தம்பியும் போனால் போதாதோ?
என்றெல்லாம் எண்ணமிட்டது மனது
இறுதியாய் முடிவெடுத்து
ஒரு ரூபாய் செலவழித்து
தொலைபேசியில் இரங்கல் தெரிவித்து
ஊரிலேயே இல்லை நான்
என்கிற ஒற்றை பொய்யுடன் முடிந்து போனது
மாமாவின் மரணசெய்தி.......

[You must be registered and logged in to see this image.]

by **கவியருவி ம. ரமேஷ்** Sat Mar 31, 2012 10:07 pm

என் பாட்டிக்கு வயது 105 -110 வரை இருக்கும் என்று பேசிக்கொண்டார்கள். சென்ற வியாழக் கிழமை (29ம் தேதி) இறந்துவிட்டார்கள். நாங்கள் (பேரன்கள் பேத்திகள் பெற்றெடுத்தப் பிள்ளைகள் 10 பேர்) மற்றும் பல உறவுமுறையினர் மற்றும் நண்பர்கள் ஊரார் என்று ஒன்று திரண்டு நேற்று மாலை சூப்பராக அடக்கம் செய்தோம்.

என் பாட்டி இறந்ததில் எனக்கு மகிழ்ச்சியே. காரணம் இந்த வயதுவரை நன்றாக இருந்து இறந்தார் என்பதுதான். நாம் எல்லாம் எத்தனை ஆண்டுகள் வாழப்போகிறோம் என்று தெரியவில்லை.

தயவு செய்து பிள்ளைகளின் படிப்பு, பணம், பயண தூரம் என்று கணக்குப் போடாதீர்கள். மரணத்துக்குச் சென்று வாருங்கள். ஒருவருடைய மரணம் நமக்கு நிறைய படிப்பினையைத் தரும் என்பது நான் கற்றுக் கொண்ட பாடம்.

நானும் என் நண்பர்களும் எங்க ஊரில் யார் இறந்தாலும் நன்றாக அடக்கம் செய்வோம். ஊரார் பாராட்டுவார்கள் என்பதற்காக அல்ல. எங்களின் திருப்திக்காக. பக்கத்து ஊர் காரர்களுக்கு எங்கள் மேல் பொறாமையாகவே இருக்கும்.