வன்னியில்
கிளிநோச்சி கிருஷ்ணபுரத்தில்
முன்னைநாள்
நவம் அறிவுக்கூடத்திற்கு முன் பக்கமாய்
கோயில் கொண்டிருந்த
கிழக்கு நோக்கி முகம் பார்த்து வீற்றிருந்த
ஆனைமுகனைப் பார்த்து
எங்கிருந்தோ வந்த கௌதம புத்தர்
"இது என் இருப்பிடம் - நீ
இங்கே இருக்க முடியாது" என்று
மோதிக்கொள்ள முனைந்தார்!
"உலகைப் படைத்த சிவன்-பார்வதி
வழித்தோன்றலில் வந்த
நமக்குள்ளே நாம்
மோதிக்கொள்வது சரியா?
என்னை எழுப்பாமல் - நீ
விரும்பிய இடத்தில் இருக்கலாமே!" என்று
பிள்ளையாரும் பணிவாகப் பதிலளித்தார்!
"ஒற்றைக் கொம்பொடித்து வீசி
நீயும்
கயமுகா சூரனைக் கொன்றிருக்கலாம்...
ஆனால்
பிரபாவையும் புலிகளையும் அழித்த
இலங்கைப் படைகளின் முன்னே
உன்னால்
ஒன்றும் செய்ய முடியாது...
இப்ப நீ எழும்பாவிடில்
படையினரைக் கூட்டி வந்து
உன்னைத் தூக்கி வீசவா?" என்று
புத்தரும் விடாப்பிடியாய்
பிள்ளையாரை நெருக்கினார்!
சிவனுக்குச் செய்தி எட்ட
"அரச வாழ்வு வேண்டாம்
இல்லற வாழ்வு வேண்டாம் என்ற
நீயா
பிள்ளையாரை
இருந்த இடத்தை விட்டு
வெளியேறு என்கிறாய்" என்று
அவர்கள் முன் தோன்றிய
சிவபெருமானார்
புத்தரை
அமைதி வழிக்கு இழுக்க முயன்றார்!
மோதல் செய்தி கேட்ட
ஏசுநாதரும் அங்கு வந்து
"எத்தனையோ இடமிருக்க
மாற்றான் இடத்தைப் பறிப்பது
ஆண்டவருக்கு
வெறுப்பை ஏற்படுத்தும் செயல்;
ஆகையால்
ஆண்டவரின் விருப்புக்கு இசைந்து
அமைதிக்கு வாரும்" என
புத்தருக்கு வழிகாட்டினார்!
மோதல் செய்தி கேட்ட
நபிகள் நாயகம் ஸல்லல்லா
வந்தங்கே
"பிறர் உடைமைகளை
தனதாக்க முனைவது
ஒறுப்புக்குரிய செயல் என
எல்லாம் வல்ல அல்லா
எமக்கு வழிகாட்டுகிறார்" என்று
புத்தரிடம்
அமைதிக்கு வாரும்" என
பணிவாகக் கேட்டார்!
நானே
பட்டறிந்து பெற்ற
(காட்டில் துறவறம் பூண்டு)
என் அறிவை விட
பிறரறிவு பெரிதல்ல என்று கூறி
சிவனை, ஏசுவை, நபியை விரட்டி
பின்
இலங்கைப் படையினரை அழைத்து
மேற்கு நோக்கிப் பார்க்கும் வண்ணம்
பிள்ளையாரைப் பக்குவமாகத் தூக்கி
பிறிதோரிடத்தில் வைத்த பின்
புத்தரும்
பிள்ளையார் இருந்த இடத்தில்
இருந்துவிட்டார்!
(சான்று:பிள்ளையாரைப் பிறிதோரிடத்தில் வைத்த பின் புத்தரை நாட்டிய செய்தி 06/06/2012 யாழ்பாணத்திலிருந்து வெளிவரும் உதயனில் ஆறாம் பக்கத்தில் காணப்படுகிறது.)

சண்டை மதங்களின் - சமயங்களின் பெயரால். ஆனால் அவை போதிப்பது அன்பை. சமத்துவத்தை.

கவிதைக்குப் பாராட்டுகள்

கருத்துத் தெரிவித்த கவியருவி ம. ரமேஷ், தமிழ்த்தோட்டம் (யூஜின்) ஆகியோருக்கு நன்றி.