வார்சா: யூரோ கோப்பை கால்பந்து தொடரில், ரஷ்யா, போலந்து ரசிகர்கள் இடையே கடும் மோதல் ஏற்பட்டது. இவர்களை கட்டுப்படுத்த போலீசார் தடியடி, கண்ணீர் புகை குண்டு வீச்சு, ரப்பர் குண்டுகளை கொண்டு துப்பாக்கி சூடு நடத்தினர். இதில் 15 பேர் காயமடைந்தனர். 130 பேர் கைது செய்யப்பட்டனர்.
இரண்டாம் உலகப் போருக்குப் பின், ரஷ்யா-போலந்து இடையிலான உறவு மிக மோசமாக உள்ளது. அண்டை நாடுகளாக இருந்தாலும், இந்தியா, பாகிஸ்தான் ரசிகர்கள் போலத்தான் அவ்வப்போது மோதிக்கொள்வர்.
நேற்று முன்தினம் ரஷ்யா, போலந்து அணிகள் பங்கேற்ற, யூரோ கோப்பை லீக் போட்டி வார்சா நகரில் நடந்தது. இப்போட்டி துவங்கும் முன், மைதானத்துக்கு செல்லும் வழியில் விஸ்டுலா ஆற்றுப் பகுதியில், போலந்து ரசிகர்கள் சிலர், ரஷ்யாவை குறித்து மோசமான வார்த்தைகளைப் பயன்படுத்தி பாட்டு பாடினர். சிலர், ரஷ்ய எதிர்ப்பு "பேனர்களை' காட்டினர்.
இதையடுத்து மைதானத்தை நோக்கி ஊர்வலமாக வந்து கொண்டிருந்த ஆயிரத்துக்கும் அதிகமான ரஷ்ய ரசிகர்கள், வன்முறையில் ஈடுபடத் துவங்கினர். முகத்தை மறைத்திருந்த சில இளம் ரசிகர்கள், போலீசை நோக்கி முதலில் கற்களையும், பாட்டில்களையும் எறிந்தனர். ஆங்காங்கே, தெருக்களில் இரு நாட்டு ரசிகர்களும் மோதலில் ஈடுபட்டனர்.
இரும்பு "பைப்' கொண்டு தலையில் பலமாக தாக்கியதால், போலந்து ரசிகர் ஒருவர் மயங்கி விழுந்தார். இதேபோல, ரஷ்ய ரசிகர்கள் பலரும் ரோட்டில் ரத்த வெள்ளத்தில் கிடந்தனர்.
இதையடுத்து போலீசார் தடியடி நடத்தினர். பின் கண்ணீர் புகை குண்டுகளை வீசியும் கூட்டம் கலையாததால், ரப்பர் குண்டுகளை பயன்படுத்தி துப்பாக்கி சூடு நடத்தினர். இதில் 15க்கும் மேற்பட்டோர் காயமடைந்தனர். இரு தரப்பில் இருந்தும் 130 ரசிகர்களை போலீசார் பிடித்துச் சென்றனர்.
தண்டனை உறுதி:
ஏற்கனவே செக் குடியரசுக்கு எதிரான முதல் போட்டியின் போது, மைதானத்தில் இனவெறியை தூண்டும் "பேனர்களை' வைத்திருந்தனர் ரஷ்ய அணியினர். இதுகுறித்து ஐரோப்பிய கால்பந்து கூட்டமைப்பு விசாரித்து வருகிறது. இதில் ரஷ்ய கால்பந்து கூட்டமைப்பு தண்டனையை எதிர் நோக்கியுள்ளது. இப்போது, மீண்டும் ரஷ்ய ரசிகர்கள் வன்முறையில் ஈடுபட்டு, சர்ச்சை கிளப்பியுள்ளனர்.
பரபரப்பான ஆட்டம் "டிரா'
ரஷ்யா, போலந்து அணிகள் மோதிய யூரோ கோப்பை கால்பந்து லீக் போட்டி "டிரா' ஆனது.
"ஏ' பிரிவு லீக் போட்டியில் போலந்து அணி, ரஷ்யாவை சந்தித்தது. ஆட்டத்தின் 37வது நிமிடத்தில் கிடைத்த "பிரீ கிக்' வாய்ப்பில் ஆன்ட்ரூ ஆர்ஷவின் அடித்த பந்தை, லாவகமாக பெற்ற ரஷ்யாவின் ஆலன் ஜகோயவ் அருமையான கோலாக மாற்றினார். முதல் பாதியில் ரஷ்யா 1-0 என முன்னிலை பெற்றது. இதற்கு 57வது நிமிடத்தில் போலந்து கேப்டன் ஜாக்கப் பிளாஸ்சிகவுஸ்கி, ஒரு கோல் அடித்து பதிலடி கொடுத்தார். இறுதியில் போட்டி 1-1 என்ற கணக்கில் "டிரா' ஆனது.

நன்றி தினமலர்