சென்னை: ""பலனைப் பற்றிக் கவலைப்படாமல் செயலில் இறங்கினால், மகத்தான
சாதனைகள் நிகழ்த்த, இறையருள் பக்கபலமாக இருக்கும்,'' என, முதல்வர் ஜெயலலிதா
கூறியுள்ளார்.
-

எம்.எல்.ஏ.,க்கள் மனோகரன், செல்வராஜு, திண்டுக்கல் மாவட்ட அவைத் தலைவர்
சீனிவாசன், குன்னம் சட்டசபைத் தொகுதி செயலர் முத்து தமிழ்ச்செல்வன்
ஆகியோரது இல்லத் திருமணங்களை, நடத்தி வைத்து, முதல்வர் ஜெயலலிதா
பேசியதாவது:
-
அழகிய நிகழ்வு:

திருமணம் என்பது, இரண்டு உயிர்கள், ஒன்றை ஒன்று
புரிந்துகொண்டு, வாழ்க்கையை ஆனந்தமயமாக்குகின்ற அழகிய நிகழ்வு. பெற்றோரைப்
பிரிந்து புதிய வாழ்வில் அடியெடுத்து வைக்கும் மணமகளை, கண்ணின் இமைபோல்
காக்க வேண்டியது, மணமகனின் கடமை. கணவனுக்குச் சிக்கல் வரும்போது
விடையாகவும், விக்கல் வரும்போது நீராகவும் மனைவி இருக்க வேண்டும். கடற்கரை
ஓரம் வளர்ந்திருந்த மரத்தின் கிளை, கடல் நீருக்கு மேல் நீட்டிக்
கொண்டிருந்தது. அதன் உச்சியில், கடற்குருவி கூடு கட்டியிருந்தது. அதனுள்
முட்டையிட்டு, குஞ்சுகள் வெளிவரும் நாளை எதிர்பார்த்து, ஆண் குருவியும்,
பெண் குருவியும் காத்திருந்தன.

ஆறுதல்:

ஒரு நாள் வீசிய கடும் காற்றில், கூடு கடல் நீரில்
விழுந்தது. இரு குருவிகளும் பதறின. முட்டைகளை மீண்டும் காணாமல் உயிர் வாழ
மாட்டேன் என, பெண் குருவி அழுதது. "கவலைப்படாதே, கடற்கரையின் அருகில்,
நீரில் தான் கூடு விழுந்துள்ளது. முட்டை உடையாது; மீட்டுவிடலாம்' என, பெண்
குருவிக்கு ஆண் குருவி ஆறுதல் கூறியது. மேலும், தண்ணீரை வற்ற வைத்தால்,
கூட்டை எடுத்து விடலாம் என, இரு குருவிகளும் தண்ணீரை வாயில் எடுத்து,
வெளியே தூரத்தில் சென்று கொட்டிக் கொண்டிருந்தன. இதை, அந்த வழியே வந்த
முனிவர் ஒருவர் பார்த்து, என்ன நடந்தது என, தன் ஞானத்தில் தெரிந்து
கொண்டார்.

சாதனைகள் புரிய...:

குருவிகளுக்கு உதவ தன் தவ வலிமையால், கடல்
நீரை வற்ற வைத்தார். இதனால், குருவிக் கூடு கரை ஒதுங்கியது. இதை,
குதூகலத்துடன் பார்த்த குருவிகள், ஆளுக்கொரு முட்டையை எடுத்துக் கொண்டு
பறந்தன. முட்டைகள் மீட்கப்பட்டது குருவிகளின் உழைப்பால் இல்லை. முனிவரின்
தவ வலிமையால் தான். ஆனால், குருவிகள் கத்திக் கொண்டு பறக்காமல்
இருந்திருந்தால், முனிவருக்கு குருவிகளின் பாதிப்பு தெரிந்திருக்காது. அவர்
வழியில் சென்றிருப்பார். எனவே, பலனை எதிர்பார்க்காமல், முழு ஆற்றலையும்
பிரயோகித்து, செயலில் இறங்கினால், மகத்தான சாதனைகள் புரிய, இறையருள்
பக்கபலமாக இருக்கும். இவ்வாறு ஜெயலலிதா பேசினார்.
-
========================================
நன்றி: தினமலர்