கண்ணீரின் மகத்துவம்..!

by **அ.இராமநாதன்** Sat Jun 23, 2012 10:20 pm

-
உருதுக் கவிஞர் கைபி ஆஸ்மி திரைப்பட
பாடலாசிரியரும் கூட..

அவருடைய திரைப்பட பாடல்கள் மெட்டுக்களை
ஊன்று கோல்களாக்கிக் கொண்டு நடக்கும்
நொண்டிகளல்ல,

அவருடைய பாடல்களுக்கு இசை என்பது மாராப்பு.

இசையையும், பாடுவோர் குரலையும் நீக்கிவிட்டால்
உங்கள் பாடல்களில் ஏதாவது மிஞ்சுமா? -
என்று நண்பர்கள் கேட்டதற்கு கைபி சொன்னார்.
நீக்கி விட்டுப் பார்த்தால் என் பாடல்களின் அர்த்தம்
பொங்கி வழியும்.

திரைப்படக் காதலர்களிடம் அசைவப் பாடல்களையே
கேட்டுக் கேட்டுக் காயம்பட்ட நம் இதயத்தை கைபியின்
பாடல்கள் இதமாக வருடுகின்றன.

காதலன் பாடுகிறான்:

மென்மையின் பிரார்த்தனை நீ
கர்வப் பூக்களின் பணிவு நீ
இயற்கை
பரவசத்தில் முணுமுணுத்த
பைரவி ராகம் நீ
உன் மேனியில
ஆயிரம் ராகங்கள் உறங்குகின்றன
விழிகளால் மீட்டப்படும்
வீணை நீ
காதல் புரிந்து கொள்ள முடியாத
புதிர் நீ,
நிம்மதியைப் பறிக்கும்
நிம்மதி நீ!

இந்த அழகான வரிகளையே சாதாரணமாக்கி விடுகிறது
கடைசி வரி. 'என் கண்ணீரை யாரும் துடைத்துவிடக்கூடாது'
என்கிறான் காதலன். ஏனாம்?

இந்த
அழகிய கண்ணீரில்தான்
நி தெரிந்து கொண்டிருக்கிறாய்

காதல் கண்ணீரின் மகத்துவத்தை இவ்வளவு அழகாக
இதுவரை யார் சொல்லியிருக்கிறார்கள்?
கண்ணீரின் மீது நமக்குப் பிரியமே வந்துவிடுகிறதே!
-
=============================================
>அப்துல் ரகுமான்
நன்றி: அவளுக்கு நிலா என்று பெயர் - கட்டுரைகள்