தாயின்றி நானில்லையே!

by **yarlpavanan** Tue Jul 10, 2012 5:59 am

அன்பிற்குப் பொருள்
அன்னையைத் தவிர வேறேது?
உண்மை தான்...
தாயன்புக்கு நிகராக
எவரது அன்பும் ஈடாகாதே!
தாயே! - நீங்கள்
ஊட்டிய அன்பு தானே
உங்களை
அடிக்கடி நினைவூட்டுகிறதே!
ஐயிரண்டு மாதங்கள்
அக்கறையாய் என்னைச் சுமந்து
பத்துத் திங்கள்
பக்குவமாய் என்னைச் சுமந்து
இருநூற்று எண்பத்தொரு நாள்
அன்போடு என்னைச் சுமந்து
தாய் மண்ணில் - என்னை
தவழ விட்ட தாயே...
நீயின்றி நானில்லைத் தாயே!
அன்பு காட்டி வளர்த்த தாயே
தாய்ப் பாலோடு அன்பு கலந்து
தமிழறிவு ஊட்டிய தாயே
உன்னாலன்றோ
நானின்று அறிஞனானேன்!
ஊர் கடந்து நாடு சுற்றி
உலகம் பறந்து வந்தாலும்
தாயே
உன்னாலன்றோ நானுயர்ந்தேனென
நினைக்காத நாளுமில்லையே!
உண்ண உணவின்றி
உடுக்க உடையின்றி
உதவுவார் எவருமின்றி
தெருவழியே அலைந்த போதும்
உன்னையன்றி எவரையும் - நான்
நினைக்கவில்லைத் தாயே!
தாயே - உங்கள்
வழிகாட்டலின் படி
வாழ்வதனாலன்றோ - இன்றும்
நான் நானாக வாழ்கின்றேன் தாயே!