சொரணையிலையோ தமிழர்காள்?

by ரௌத்திரன் Fri Jul 13, 2012 1:01 am

பண்டை பெருமை யாவையுமே கட்டிப்

பரண்மேல் தூக்கிப் போட்டுவிட்டுத்

தொண்டை கிழியக் கத்துகிறீர் உம்மால்

துலங்கும் நண்மை ஏதுமிலை!

அண்டை நாட்டில் அனுதினமும் நம்

அருமைச் சோதர் துடிக்கின்றார்!

கண்ட தல்லால் என்செய்தீர்?-தமிழ்க்

குலமென் றெங்கும் சொல்லாதீர்!

"வீர மற்றப் பேடிகளே-என்றும்

வெட்டிப் பேச்சில் வல்லவர்கள்!

சார மென்று ஏதுண்டு?- வெறும்

சக்கை தமிழர் கதைகள்காண்!

சீறும் புலிகள் என்றவர்யார்?-புன்மைச்

சிறுவ ளைவாழ் எலிகள்"எனக்

காறித் துப்பும் சரித்திரமே-இஃதை

கணமும் நினைக்க மறந்தீரே!

திலகம் இழந்த மாதர்களும்-தங்கள்

தாயை இழந்த மதலைகளும்

அலறும் குரல்கள் கேட்டிலிரோ?-அறிவு

ஐந்தாய்க் குறைந்து போனீரோ?

உலகம் முழுதும் இக்கொடுமை-தனையே

உள்ளம் நடுங்கப் பேசுகையில்

கலகம் என்ன நடந்ததென-நீரோ

கேளாக் குறையாய் இருக்கின்றீர்!

கூச விலையோ நும்தேகம்?-சற்றும்

குமைய விலையோ நும்நெஞ்சு?

பேசு வதற்கு ஒன்றுமிலை-இன்னும்

பேசு வதிலோர் பயனுமிலை!

பூசி மெழுகப் பார்க்காதீர்-நிஜத்தைப்

பூட்டி மறைக்க எண்ணாதீர்!

மீசை யன்றி மற்றேதும்-நும்

ஆண்மைக் குண்டோ சாட்சிசொல்லீர்!

இழுக்குக் கென்றே பிறந்தீரோ?-வெற்று

இன்ன லுக்கே வாழ்வீரோ?

கலக்கத் திற்கே பிறந்தீரோ?-இழவுக்

கண்ணீர் சிந்தப் பிறந்தீரோ?

வழக்கு இனியும் செய்வீரோ?-நம்

சுற்றம் அழிக்கத் துடிப்போர்க்குச்

சுளுக்கு எடுக்க வேண்டாமோ?-தமிழர்காள்!

சொரணை யிலையோ பொங்கிடுவீர்!

-------ரௌத்திரன்

[You must be registered and logged in to see this image.]

by **கலைவேந்தன்** Sat Jul 14, 2012 3:13 pm

தன்மானங் கெட்டுத் தறிகெட்டுச் சீரழிந்து
உன்மானம் போக்கிடும் சிங்களர்கள் - முன்னால்
விரிகூந்தல் பேரழகி கண்ணகியே இன்னோர்
எரிதழல் கொண்டுவா நீ.

( இன்னிசை வெண்பா )

by **கலைவேந்தன்** Sat Jul 14, 2012 3:15 pm

ரௌத்திரனின் இக்கவிதை என்னை பெரிதும் மகிழ்வித்தது. அரிய உயர்ந்த கவிதைகளைக் காணும்போது என் மனம் துள்ளும். அந்த துள்ளலை இங்கே கண்டேன்..

வாழிய ரௌத்திரன்..!

by Sponsored content

வித்யாசாகரின் எழுத்து பயணம்

தமிழ் அறிஞர்களின் மின்நூல்கள் - யாழ்பாவாணன்

சொரணையிலையோ தமிழர்காள்?

சொரணையிலையோ தமிழர்காள்?

Re: சொரணையிலையோ தமிழர்காள்?

Re: சொரணையிலையோ தமிழர்காள்?

Re: சொரணையிலையோ தமிழர்காள்?

Re: சொரணையிலையோ தமிழர்காள்?